جازعى عۇمىرى كەلتەلەۋ دەمەسەڭ, بۋرابايدىڭ ءىشى-تىسى وسى ءبىر تۇستا توتىقۇستاي تۇرلەنىپ, قۇلپىرىپ سالا بەرەدى. قاتقىلدىعى جوق سامال قاناتى مامىق الاقانىمەن كۇلتەلى قاراعاي, سىرعالى قايىڭ, تەرەك, تال اتاۋلىنى ەركەلەتە سيپاپ, ەركىن جەلپىنەدى. كوكشەتاۋ, جەكەباتىر, بولەكتاۋ تاباندارىنان تەپسىنىپ شىققان ءمولدىر بۇلاق سۋلارى تابيعي ارنالارىنا ءتۇسىپ الىپ, شولپىداي سىڭعىرلاي قۇلدىراڭداپ, شورتاندى, شاباقتى, اۋليە كولدەرگە باعىت تۇزەيدى.
وسىنداي ءبىر ءسارۋارلى ساتتە سالت اتتى ءبىرجان سال قاسىندا ەكى سەرىكتەسىمەن بۇركىتتىنى ارتقا تاستاپ, جوكەي كولدى جاعالاي جەڭىل جورتپاقپەن كەلە جاتقان. كۇلتەلى شاشاقتارى توگىلىپ كەتكەن اق شارقاتتى موينىنا وراي تاستاپ, ءتورت سايدىڭ توعىسقان تۇسىنا ۇكى قاداعان قۇندىز بوركىن قامشىسىنىڭ سابىمەن انتەك كوتەرىپ, شەكەلەتە قوندىرعان سالدىڭ بۇيرەك بەت, قىران قاباقتى جۇزىندە مىنا تابيعاتپەن استاسىپ كەتكەن عاجاپ جاراسىمدىلىق بار ەدى.
ءبىرجاننىڭ سەرگەك قۇلاعى قوتىركول تۇستان سالعان توسىن ءاندى قاسىنداعىلاردان ىلكىم ەرتە شالسا كەرەك.
– ال, توقتاي قالىڭدار, – دەپ ات باسىن تەجەپ, ءان كوتەرىلگەن تۇسقا ەر ۇستىندە ەنتەلەي ەڭكەيىپ قالعان سال از-كەم ايالداعان.
– مىناۋ مەنىڭ «قاۋدىرلەتتىمىم» عوي. قاپ, اتتەگەنە... قايىرما تۇسىن بۇزىپ ايتتى-اۋ. الدە داۋىسى جەتپەدى مە, – دەگەن بىرجەكەڭ اتىن تەبىنە بەرگەن.
سويتكەنشە بولماي بۇلار قارسى بەتتەن قوس قارانى شالعان. ول ون ەكى اتا اتىعايدىڭ باعىس تابىنان شىققان ايباس ءانشى مەن ونىڭ نەمەرە اعاسى سايماساي بولاتىن.
ءبىرجان سال باستاعان توپ جاناسالاي بەرە ات باسىن ىرىككەن. سال اماندىق-ساۋلىقتان بۇرىن:
– ءان ايتقان قايسىڭ؟ – دەدى.
– مىناۋ ايباس ءىنىمنىڭ ەبى بار ەدى, – دەدى سايماساي قارسى الدىندا ناق ءبىرجاننىڭ ءوزى تۇرعانىن جاڭا اڭعارىپ, ابدىراعان قالىپتا.
– اپىرماي, ايباس-جان-اي, ءاندى وسىنشاما قورلارمىسىڭ. «قاۋدىرلەتتىم» سەن سالعانداي ەمەس, بىلاي ايتىلماس پا؟ – دەدى دە, الا قورجىننان بۇكتەمەلى دومبىراسىن سۋىرىپ الىپ رەتكە كەلتىرىپ, قويىن قالتاسىنان تۇيىنشەكتى شەشىپ, ءبىر تيەكتى الىپ, شاناق بەتىنە قوندىرعان. سويتكەن دە تىم سيرەك ورىندالاتىن سۇلۋ ءاندى اۋەلەتە شىرقاپ قويا بەرگەن. ءان ساعاققا سىرعىپ بارعان ساۋساق استىنان توگىلگەن اششى اۋەنمەن ىلەسىپ, بىردەن شانشىپ شىرقاۋ بيىككە كوتەرىلىپ الىپ, تومەنگە سورعالاي قۇيىلماي قۇيقىلجىعان قالپى تۇرىپ الادى ەكەن. تاپ وسىنداي سيپاتتا ءاندى ورىنداۋ ءۇشىن بىرجانعا عانا ءتان كومەكەي كەرەك بولار-اۋ, ءسىرا. ايباستىڭ ورتا جولدا مالتىعىپ, ءان اۋەنىن بۇزىپ العانى دا سودان عوي.
ءاننىڭ قايىرما تۇسى ءتىپتى دە عالامات اۋەن ىرعاعىمەن تولقىنداي تەپسىنىپ, بۋىرقانا بۇلقىنىپ, الۋان اجارمەن شىراي شاشىپ, جابىققان جانىڭدى ەرەكشە ءبىر جىگەرگە جەتەلەپ كەتەدى ەكەن.
«ە, مەنىكى بەكەرشىلىك ەكەن, بەيشارالىق ەكەن» دەپ ويلادى ايباس ءانشى. ات ۇستىندە اڭىرىپ تۇرىپ قالعان اتىعايدىڭ قوس جىگىتى ءان تىنىپ, بىرجەكەڭدەر قوزعالىپ كەتكەنشە اربالعان قالىپتارىنان جازباعان.
سايماساي ىنىسىنە قاراسا ونىڭ قوس جانارىنان سورعالاعان جاس قىزىل كۇرەڭ ءجۇزىن جۋىپ كەتىپتى.
ءسويتىپ, ۇلى ءبىرجاننىڭ «قاۋدىرلەتتىمى» سالمەن بىرگە كەتتى, ال ايباس بۇل ءاندى ورىنداي المايتىندىعىن, وعان ورەسىنىڭ جەتپەيتىندىگىن سەزگەن. سەزگەن دە نەشە رەت وقتالعانىمەن «قاۋدىرلەتتىمگە» قايتا اياق باسىپ, قول سوزباعان.
مىنە, بىزگە ءمالىم, بەيمالىم ءبىرجان سال ءانىنىڭ ءبىر تاريحى وسىلايشا ءتامام بولىپ ەدى.
ال مۇنداي وكىنىشتى جاعدايات اقان سەرىدە دە, ۇكىلى ىبىرايدا دا كوپ كەزدەسكەن. تالاي تايپالما ءان تابيعات قويناۋىنا ءسىڭىپ, كەلمەسكە كەتپەدى دەيسىڭ. مۇنىڭ مۇڭ شالعان وكىنىشى دە وسى عوي. «بارعا قاناعات, جوققا سالاۋات» دەيتىن قازاقي مىنەزگە سالساق قولداعى بار اسىل ءان مۇرامىزدى مانسۇقتاماي, بارىنشا قاستەرلەپ, شاشاۋ شىعارماي جيىستىرىپ, ءداستۇرلى ءان ونەرىن كەڭىنەن ناسيحاتتاپ, ۇرپاقتان-ۇرپاققا جەتكىزە بەرۋدە زور جاناشىرلىق, ىقتياتتىلىق, قامقورلىق, كاسىبي بىلگىرلىك كەرەك-اق.
ءان مەككەسى اتانعان كوكشەتاۋ ءوڭىرى ءبىرجان مەن اقان, ۇكىلى ىبىراي مەن بالۋان شولاق اندەرىن قاز-قالپىندا ساقتاپ, سىر-سيپاتى مەن بولمىس-بىتىمىنە سىزات تۇسىرمەي قۇنداۋدا قۇنسىزدىققا دۋشار بولىپ وتىرعاندىعىن اششى دا بولسا اشىق ايتۋعا ءتيىسپىز. ەڭ الدىمەن بۇل وڭىردە بەلگىلى انشىلەردىڭ ورىنداۋ شەبەرلىكتەرىن باعالاپ, ۇيرەتۋ, ۇيرەنەر تالاپتارى كەزىندە ەسكەرىلمەدى. سامارقاۋ بويكۇيەزدىكتىڭ سالدارىنان جانالى قاليەۆ, كارىم تاقاۋين, مۇسا اسايىنوۆ, كارىم ءىلياسوۆ, شەكتىباي ەڭسەباەۆ ءتارىزدى ون سان انشىلەردىڭ ءان ورىنداۋ شەبەلىكتەرىن شاشاۋ شىعارماي جيىستىرۋ, جاستارعا ۇيرەتۋ قولعا الىنبادى. ءداستۇرلى ءان ونەرىن ناسيحاتتايتىن ارنايى مەكتەپ جۇمىس ىستەمەدى, ءالى دە ىستەمەيدى. كەلە-كەلە ارقا ءانىنىڭ ءارلى دە اسەرلى, ءساندى دە سالتاناتتى, ايبىندى دا اجارلى كەسكىنى كومەسكى تارتىپ, بۇل كۇندە كەزىندە ءبىرجان سال, اقان سەرى, ۇكىلى ىبىراي, بالۋان شولاقپەن داڭقى اسقان وڭىردە داقپىرتتىڭ عانا قالعاندىعىن مويىنداۋ كەرەك.
كوكشەتاۋدىڭ كوك كۇمبەزىنەن كوتەرىلگەن ءان ارقا الابىن ەركىن ارالاپ, ءار تۇستان «كوكتەي گۇلدەپ كوتەرىلگەن» تالانتتار ءداستۇرلى ارقا ءان ونەرىنىڭ ءورىسىن كەڭەيتىپ, سىمباتىنا سۇلۋلىق قوسىپ, عاجاپ ءبىر بولمىس-ءبىتىمىن سومدادى.
جارىلعاپ ەسكى ءانشىنىڭ ماڭعازى ەدى,
كۇيدى ەرتتەپ, ءاندى مىنگەن ارداگەرى.
وسى ءاندى كوكشەتاۋدان ۇيرەندىم دەپ,
بايانعا الىپ كەلىپ جايعان ەدى, – دەگەن ءان جولدارىنان سول تۇستاعى ءاننىڭ باستاۋ كوزى كوكشەتاۋ ەكەندىگىن اڭعارۋ ەش قيىندىققا تۇسپەيدى. سول ءاندى ءىلىپ اكەتىپ, سان تاراۋ سوقپاق-سۇرلەۋگە سالىپ, ەلدەن ەلگە, ونەرپازدان ونەرپازعا تاراتا بەرۋ ءداستۇرى ول تۇستا استە كەمشىندىك تانىتپاعان. كەرىسىنشە, سۇلۋ اندەر ەش جەردى, قالىڭ ەلدى جاتسىنباي باۋىرباستى ءوز رۋحاني قازىناسىنا اينالىپ جۇرە بەرگەنى داۋسىز. ارقانىڭ كەز كەلگەن الابىندا ءبىرجان سال, اقان سەرى اندەرى جيىن-تويلاردىڭ ءسانى, جارمەڭكەلەردىڭ سالتاناتى رەتىندە ايتىلىپ, جىلى قابىلدانىپ ءجۇردى. ولاردى ءوز جۇرەگىن جارىپ شىققان ءتول تۋىندىلارىمەن قاتار ناسيحاتتاۋدا جارىلعاپبەردى, اسەت, ەستاي, عازيز, شاشۋباي, يسا, جاياۋ مۇسا, مايرا, ءمادي, ءيمانجۇسىپ ءتارىزدى تۇلعالار زور قىزمەت اتقاردى. بۇلاردىڭ قايسىسى بولسا دا ءبىر-ءبىرىنىڭ اندىك شىعارمالارىن شىرايلى قالپىمەن قالىڭ ەلگە تاراتۋدىڭ التىن كوپىرىنە اينالدى.
ەسىمدەرى اتالعان ۇلى تۇلعالاردىڭ ءان, انشىلىك ونەرىندە دۇنيەگە كەلگەن نەبىر اندەردىڭ سىر-سىمباتى مەن ىشكى ءيىرىم قالتارىستارىنا ۇڭىلسەڭىز تەك ارقا الابىنا ءتان, قازاقتىڭ باسقا ولكەسىندەگى اندەرمەن ەش شاتاستىرۋعا كەلمەيتىن كەسەك تە كەمەلدى كەسكىن, مىنەزىن باعامدار ەدىڭىز. مۇندا اسا الاپات كەڭدىك پەن شىڭىراۋ تەرەڭدىك, شىرقاۋ بيىكتىك پەن سارابدال سابىرلىق سيپاتتارى العا شىعادى. قايىرما يىرىمدەرىنە ەركەلىك پەن ەركىندىك, تەپسىنگەن تەگەۋىرىندىلىك پەن قايتپاس قاجىرلىلىق ءورىس اشىپ, ورمەك ءورىپ تۇسىرەدى. ماسەلەن, ۇلى ءبىرجاننىڭ «جانبوتاسىنىڭ» ساز, سارىنىنداعى كەككە سۋىرىلعان ىزالى اشۋ, شاعىمدانۋدان گورى شاعىپ جىبەرەر ۇلى جىگەر جاتقاندىعىن اڭدايمىز, ءتىپتى سوزدەن ادا قايىرما ىرعاعىنداعى توپان سۋداي قاپتاي توگىلگەن ەكپىننەن دۇلەي كۇش, تەمىر توپشىلى تەگەۋىرىن بوي بيىكتەتىپ وتىرادى.
ال اقان سەرىنىڭ «سىرىمبەتى» ءان ونەرىنىڭ ەۋروپالىق كلاسسيكاعا جۋىقتاپ بارار تەرەڭ سىرعا بويلاي تۇسكەن سابىرلىلىق سالتاناتى بەك قاتتى سۇيسىنتەدى.
ۇكىلى ىبىراي جاڭاعى ەكەۋىنە مۇلدەم ۇقسامايتىن (ۇستازدارى بولسا دا) ەرەكشە ءبىر ەكپىن, ەكپىن بولعاندا دا ەركەلىك, ەركىندىك سيپاتتاعى شالقىپ, تولقىپ كەتەتىن, ءسويتىپ وتىرىپ بۇيدا ۇزەر قۋاتتى مىنەزگە باي قالپىمەن قۋانتارى بار. ونىڭ «قىزىل اسىق», «تولقىن», «ون ساۋساق» اندەرىندە وسى جارقىن مىنەزدەر بوي بايقاستاتارىن سەزبەۋ مۇمكىن ەمەس. ال داڭقتى «گاككۋ» (ون سان نۇسقاسى بولا تۇرا) ءوزىنىڭ التىن جامبىداي جارق ەتكەن اسىل قالپىمەن ءان ونەرىنىڭ ولشەۋسىز بيىگىنە ورلەپ كەتكەندىگىن كىم دە بولسا مويىنداسا كەرەك.
وسىناۋ ۇلى تۇلعالاردىڭ اق جامبىداي ءمىنسىز سومداپ بەرىپ كەتكەن اندىك قۇندىلىقتارى ارقانىڭ تالاي انشىلەرىنە ۇلگىلىكتىڭ وتەۋىنە اينالعاندىعىن ايتپاي وتىرا الماساق كەرەك. ءماديدىڭ «قاراكەسەگى», يسانىڭ «جەلدىرمەسى» نەمەسە جاياۋ مۇسانىڭ «كوگەرشىنى», اسەتتىڭ اندەرىندە ءبىرجان سالدىڭ دياپازونى تىم بيىك كەڭ قۇلاشتى اندەرىنىڭ نەمەسە اقان سەرىنىڭ تەرەڭ تىنىستى, ۇكىلى ىبىرايدىڭ ەركە قىلىقتى ەكپىندى ءان ىرعاقتارىنىڭ مەنمۇندالاپ تۇرۋى تەگىن ەمەس. بۇل اندەر ءبىرىن-ءبىرى قايتالاۋدان اۋلاق, ايتسە دە ءبىر توپىراق, ءبىر الاپتىڭ اياسىندا تۋعاندىعىن ايقىنداي تۇسەر ورتاق مىنەزگە باي ەكەندىگى تەگىننەن-تەگىن ەمەستىگىن باستى ەرەكشەلىك ەسەبىندە العا تارتامىز. سوندىقتان دا ارقا ءوڭىرىنىڭ ءان مەكتەبى دەگەندە وسى ەرەكشەلىكتەردى ەسكەرۋ, ەلەۋ, ەسكە الۋ قاجەتتىگىن مويىنداتادى.
كوكشەتاۋدا اراگىدىك بولسا دا ءبىرجان, اقان, ۇكىلى ىبىراي ەسىمدەرىن ەسكە الۋعا قاتىستى وبلىستىق, رەسپۋبليكالىق دەڭگەيدە ءان بايقاۋلارى ءوتىپ كەلدى. وسى ورايدا جاڭاارقا, سەمەي, تالدىقورعان وڭىرىنەن كەلگەن انشىلەر بولماسا, بايقاۋ يەسى كوكشەتاۋ, قىزىلجار, كەرەكۋ, اقمولا, قوستاناي ماڭىنان موينى وزىق شىققان انشىلەردىڭ بوي كورسەتە قويمايتىندىعى كوڭىلگە رەنىش ۇيالاتاتىندىعى جاسىرىن ەمەس. بۇل, جوباسى, اتالمىش ايماقتاردا تالانتتار سارقىلىپ ءبىتتى دەگەندى استە بىلدىرمەيدى, ءداستۇرلى انشىلىك ونەردىڭ ءسونىپ, كەمىپ بارا جاتقاندىعىن اڭداتسا كەرەك دەگەن پىكىردى مويىنداۋعا ماجبۇرلەيدى. بۇل وڭىرلەردى دە كوكشەتاۋدىڭ كەبىن كيگەن كەمشىلىكتەر يەكتەپ السا كەرەك دەگەن جاعىمسىز ويعا تىرەلەمىز.
ول ول ما, جالپى رەسپۋبليكالىق دەڭگەيدە ەسىمدەرى اسپەتتەۋگە, ماقتان تۇتۋعا ابدەن لايىق تۇلعالار شىعارماشىلىعىن ناسيحاتتاۋ, وسى باعىتتا تۇراقتى ءارى تىندىرىمدى شارالار بەلگىلەپ, جۇمىس جۇرگىزۋ جەتىمسىرەپ وتىر.
سوزىندە ماعىنا, اۋەنىندە جاتىق جاراسىمدىلىق جوق اندەر باسىمدىق سيپاتقا يە بولعاندىعى سونداي, قازىرگى كۇندە سونداي ساپاسىز ءان-سىماقتار ساحنا ءتورىن بەرمەيتىن بولدى. حالىق اندەرىنىڭ ءىنجۋ جاۋھارلارىنان جاستارىمىز كىندىك ءۇزىپ كەتتى. ۇلتتىق قۇندىلىعىمىز سانالاتىن حالىقتىق تۋىندىلاردى تاپ بۇگىنگىدەي مانسۇقتاۋ ۇرپاقتىڭ رۋحانيات باعىتىنداعى جەتىمدىگىن, ءمۇساپىر حال-كۇيىن ودان ءارى تەرەڭدەتە تۇسەر جات قۇبىلىسقا ۇرىندىرىپ وتىر. ال ەسىمدەرى ەسكى كۇننەن ەل جادىندا ساقتالعانىمەن, ۇلى تۋىندىلارى ۇستارانىڭ جۇزىندە تۇرعان ءبىرجان, اقان, ۇكىلى ىبىراي, مۇحيت, اسەت, ەستاي, جاياۋ مۇسا, ءيمانجۇسىپ, ءمادي, مايرا, عازيز, يسا, شاشۋباي, كەنەن مۇرالارىن ناسيحاتتاۋدىڭ بۇگىنگى ءحالى جاۋاپتى باسشىلىق تاراپىنان جىبەرىلىپ وتىرعان كۇنى ەرتەڭ سان سوقتىرىپ, قاتتى وپىندىرار كەمشىلىك دەپ باعالانۋعا ءتيىس.
قازاق قولداعى بارىن قۇنتتامايتىن اڭعال-ساڭعال جۇرت. سوناۋ ءۇنتاسپا شىعا باستاعان العاشقى جىلداردا-اق ەرتە قامشىلاپ, ەرتە قولعا الاتىن شارالار مولىنان ەدى. ايتسە دە كوپ دۇنيەلەرىمىز وسىنداي وراشولاق ولاقتىعىمىزدان ۇمىت قالدى. ماسەلەن, امىرە قاشاۋباەۆتىڭ ءۇنىن ىزدەپ قانشا جىل سابىلدىق. جارقىن شاكارىم تاپتى, تاپتى دا ۇمىت قالدى. ونىڭ ايتۋىنشا, ءبىرسىپىرا قازاق انشىلەرىنىڭ اندەرى تۇسىرىلگەن بىلىك (ۆاليك) ماسكەۋدە قوزعالىسسىز جاتقان كورىنەدى. سودان بەرى زەرتتەيىن, تىڭداپ, كورەيىن, ەلگە اكەلىپ جۇرتقا ۇسىنايىن دەگەن ءبىر مامان شىققان جوق. بۇل نە؟ سالعىرتتىق پا, سالاقتىق پا؟
اناۋ ءبىر جىلدارى كورنەكتى عالىم اقسەلەۋ سەيدىمبەكوۆ پەن تاماشا ءانشى جانىبەك كارمەنوۆ تەلەديداردا اسا ءبىر قاجەتتى ادەبي-سازدى تانىمدىق حابارلار جۇرگىزدى. قالىڭ جۇرتتىڭ مەيىرىن ءسۇيسىنتىپ, سۋسىنىن قاندىرعانداي بولدى بۇل شارا. ويتكەنى, عۇلاما اقسەلەۋ ءۇش ءجۇزدىڭ ءانى مەن كۇيىن بارىنشا تەرەڭ زەرتتەپ, زەردەلەگەندىكتەن كەز كەلگەن ءانشىنىڭ ءومىرى, وسكەن ورتاسى, ۇستازى, ءاننىڭ شىعۋ تاريحى قاقىندا مول دەرەكتەردى اڭگىمە ۇستىندە ادەمىلەپ جەتكىزسە, جانىبەك سول اڭگىمەنى ۇستەمەلەي وتىرىپ عاجاپ ورىنداۋشىلىعىمەن تاڭداي قاقتىرىپ ەدى. حالىقتىڭ كوزايىمىنا اينالعان سول حابار سوڭعى كەزدە ەكرانعا شىقپايتىن بولدى. سويتسەك, الدەكىمدەر ءۇنتاسپادان ءوشىرىپ تاستاپتى دەپ ەستىدىم. ەستىگەن قۇلاقتا جازىق جوق. بۇل شىن مانىسىندە راس بولسا سۇمدىق قىلمىس قوي. ومىردەن وتكەن قوس ارىسقا ەندىگى جەردە ءۇنتاسپانىڭ كوك تيىنعا قاجەتى جوق. ول قازاق جۇرتىنىڭ ىزدەسە تاپتىرماس ۇلى مۇراسى, باعا جەتپەس جادىگەرى ەمەس پە ەدى.
بىلە بىلسەك, حالىقتىڭ ءانى مەن كۇيىن قىرىم مەن قىتايدان ىزدەستىرىپ تاپتىرىپ الىپ, فونوتەكا قورىنا قوسپاس پا, اراگىدىك بولسىن ەل ەسىنە سالىپ بەرىپ تۇرماس پا؟
ۇلى اباي «ءاندى سۇيسەڭ, مەنشە ءسۇي» دەگەندە ءبارىڭ ابايداي بول دەمەگەن. كەز كەلگەن قازاق بالاسى ءان مەن كۇيدەن ءلاززاتتانىپ قانا قويماي, سونىڭ قادىرىن ءبىلسىن, ءسۇيسىن, ءسۇيسىنسىن, جانىنا سەرىك ەتسىن دەگەن. «جاقسى ءاندى وي كوزىمەن تىڭداۋعا» ناسيحاتتاعاندىعى دا سودان.
ءان مەن كۇي حالىقتىڭ اۋەن مەن اۋەزگە, سيقىرلى سارىنعا تولى جاندى مىنەزى, ءۇن تىلىندەگى تاريحى. ولاي بولسا, سايىن دالادا سامعاپ ۇشقان قىراننىڭ قوس قاناتىنداي ءان مەن كۇيدەن كوز جازىپ, كىندىك ءۇزۋ, دالىرەك ايتساق, كوز جازدىرىپ, كىندىك ءۇزدىرۋ حالىققا جاسالعان قيانات, ورنى تولماس وكىنىش بولماق.
زامانىمىزدىڭ زاڭعار كومپوزيتورى ەركەعالي راحماديەۆتىڭ: «ەگەر وسىلاي ويسىز, قامسىز جىلجىپ جۇرە بەرەتىن بولساق قۇداي بىلەدى, 15-20 جىلدان كەيىن بە, جارتى عاسىردان كەيىن بە, سول سەگىز سەرىمىزدىڭ, مۇحيتىمىزدىڭ, ءبىرجانىمىزدىڭ, اقانىمىزدىڭ, ۇكىلى ىبىرايىمىزدىڭ, جاياۋ مۇسامىزدىڭ اندەرىن ايتاتىن ادامداردىڭ قالماۋى مۇمكىن» دەپ قاپالانۋى نەگىزسىز ەمەس. ەراعاڭنىڭ ەلدەن بۇرىن ەلەڭدەۋىن ۇلى جۇرەكتى ازاماتتىڭ ءداستۇرلى ءان ونەرىنە دەگەن بۇگىنگى ۇرپاققا, بيلىكتەگى ازاماتتارعا جۇكتەگەن اماناتى دەپ تە قابىلدانعانى ءجون.
جالپى, بابالارىمىزدىڭ رۋحاني مول مۇراسى, سونىڭ ىشىندە ارقانىڭ ءان مەكتەبى, ونىڭ ۇلىلى-كىشىلى جادىگەرلەرىن ساقتاپ قالۋ, ۇرپاقتان-ۇرپاققا جەتكىزۋ جۇگى الداعى عاسىرلارعا اپارامىز دەسەك جەڭىل جۇك ەمەس. تەك حان-قاراعا ورتاق جاۋاپكەرشىلىك, قامقورلىق, بىلىكتى دە ءبىلىمدى باسشىلىق قاجەت. ءبارىمىز ورتاق قاجەتتىلىك ۇدەسىنەن شىعۋ ءۇشىن سارىلا ىزدەنىپ, سارسىلا ەڭبەكتەنىپ, جۇمىلا قىزمەت ەتۋىمىز كەرەك. سوندا عانا بابادان قالعان ۇلى مۇرا الدىندا ار تازالىعىن اقتاپ الاتىن بولامىز.
تولەگەن قاجىباي,
قازاقستان جازۋشىلار وداعى
اقمولا وبلىستىق فيليالىنىڭ توراعاسى
