ال اقتاۋ اۋىلى – مال شارۋاشىلىعىن دامىتۋ, ونىڭ ىشىندە ەت, ءسۇت ءوندىرۋ, مال ازىعىن دايارلاۋ باعىتىندا جاڭاارقا اۋدانىنىڭ ەكونوميكاسىن العا سۇيرەپ وتىرعان ستراتەگيالىق ماڭىزى زور ەلدى مەكەننىڭ ءبىرى.
اقتاۋ جاڭاارقا اۋدانىنىڭ ورتالىعى – اتاسۋدان 122 شاقىرىم قاشىقتىقتا ورنالاسقان, كوتەرمە جول ارقىلى قاتىناس جاسايدى. 1964 جىلى سالىنىپ, رەسپۋبليكالىق ماڭىزى بار جولدار ساناتىنا ەنگەن وسى جولدىڭ بۇگىنگى تاڭدا ساپاسى ناشارلاپ, تالاپقا ساي ەمەستىگى اۋدان جانە اۋىل تۇرعىندارىن ايتارلىقتاي الاڭداتىپ وتىر. اتاپ ايتار بولساق, 2014 جىلى اتالعان جولدىڭ ءبىر بولىگىن سۋ شايىپ, جولدىڭ نەگىزى جارامسىز بولىپ قالعاندىقتان, قازىرگى تاڭدا ونىمەن ءجۇرۋ ۇلكەن قيىندىقتار تۋعىزۋدا, ال بۇگىنگىدەي كوكتەم ايلارىندا اۆتوكولىكپەن ءجۇرۋ مۇلدەم مۇمكىن ەمەس.
بۇل جول ارقىلى اقتاۋ اۋىلىنىڭ تۇرعىندارى عانا ەمەس, وبلىستىق ماڭىزى بار كەلەشەگى جارقىن مونوقالا جوباسىنا ەنگەن قالالاردىڭ ءبىرى بولىپ تابىلاتىن قاراجال قالاسىنىڭ تۇرعىندارى دا اۋدان ورتالىعى – اتاسۋ كەنتى مەن وبلىس ورتالىعى – قاراعاندى قالاسىنا قاتىنايدى. وسى جولمەن كولىكپەن ءجۇرۋ مۇمكىن بولماۋىنا بايلانىستى قاراجال قالاسىنىڭ تۇرعىندارى وبلىس ورتالىعىنا جايرەم كەنتى ارقىلى اينالما جولمەن 420 شاقىرىم ءجۇرىپ جەتۋگە ءماجبۇر. ال بۇل ءوز كەزەگىندە قاراجال قالاسىنىڭ تۇرعىندارىنا, جوعارىدا ايتىپ كەتكەنىمىزدەي, اۋدان ورتالىعى مەن وبلىس ورتالىعىنا جەتۋدە ۇلكەن قيىندىقتار تۋعىزىپ وتىر.
اقتاۋ اۋىلى مەن قاراجال قالاسىنىڭ كەيىنگى جىلدارى قايتا وركەندەپ, ونداعى تۇرعىندار سانىنىڭ ارتۋى نەگىزگە الىنا وتىرىپ, اتاسۋ – اقتاۋ – قاراجال باعىتىنداعى كوتەرمە جول كۇردەلى جوندەۋدەن وتكىزىلگەن جاعدايدا, قاراجال قالاسى مەن اقتاۋ اۋىلىنىڭ جاڭاارقا اۋدانىمەن ءوزارا بايلانىسى جاقسارىپ, وبلىستىڭ ىشكى الەۋەتى ارتار ەدى ءارى ەكى ايماقتىڭ ءبىر-بىرىمەن ساۋدا-ساتتىعى, ەكونوميكالىق بايلانىستارى نىعايىپ قانا قويماي, جولدىڭ وبلىستىڭ كولىك-لوگيستيكالىق ينفراقۇرىلىمىن دامىتۋعا قوسار ۇلەسى دە زور بولارى ءسوزسىز ەدى.
مەن ۇكىمەت باسشىسى باقىتجان ساعىنتاەۆتان وسى كوتەرىلگەن ماسەلەنىڭ وزەكتىلىگىن ەسكەرە وتىرىپ, قاراعاندى وبلىسىنداعى اتاسۋ – اقتاۋ – قاراجال باعىتىنداعى كوتەرمە جولدى كۇردەلى جوندەۋدەن وتكىزۋگە قارجى قاراستىرۋدى سۇرادىم. بۇل ساۋالدى ارىپتەستەرىم م.التىنباەۆ پەن س.ەرشوۆ تا قولداپ, وعان ءوز قولدارىن قويعانىن ايتا كەتەيىن.
سەرىك اقىلباي,
سەنات دەپۋتاتى
