العاشقى كۇندەرى جەڭسىز كامزولدارى بار بىرنەشە كەلىن كويلەك ساتىلىپتى. كامزولى اناداي بولسىن, كويلەگىنىڭ ءتۇسى مىناداي بولسا ەكەن دەگەندەي, ازداپ بولسا دا تاپسىرىستار دا تۇسە باستاعان.
قازىر بارشامىزدىڭ باسىمىزدى قاتىرعان ءبىر ماسەلە – ءسان مەن ۇلتتىق ءداستۇردى ۇيلەستىرۋ. ۇلتتىق ناقىشى بار كيىمدەردى بارشاعا ۇنامدى, زاماناۋي ۇلگىدە تىگۋ. كوشەگە كيىپ شىققاندا, كوز ءسۇيسىنەرلىكتەي تالعامعا كوتەرۋ. سوندىقتان بولار, ءبىز بۇل جاڭالىققا ەلەڭ ەتتىك.ءاۋ باستان ىسمەرلىككە بەيىم اكتريسا بۇعان دەيىن دە ءوزىنىڭ شاعىن شەبەرحاناسىندا وتە ءساندى ۇلتتىق ناقىشتاعى پەردەلەر, توسەك جاپقىشتار تىگىپ, بولەك قىرىمەن تانىلىپ جۇرگەن بولاتىن. ارينە, ۇلتتىق, ساحنالىق كيىمدەر دە تىگىپ ءجۇر. بىراق, وعان سۇرانىس سيرەك. ال كەلىن كويلەكتىڭ ءجونى بولەك. كەلىن تۇسىرۋدەن ءۇمىت ەتپەيتىن ءۇي جوق.
– ءوزىم كەلىن بولىپ ءتۇسكەندە قىپ-قىزىل قىتاي حالاتىن كيىپ, كوپشىلىككە شاي قۇيعان بولاتىنمىن. كۇن ىستىق بولىپ, قوناقتار كەتكەن سوڭ قاراسام, قىزىل حالاتتىڭ بوياۋى دەنەمە ابدەن جۇعىپ قالىپتى. سول كەزدە نەگە قازاقشا «كەلىن كويلەك» تىكپەيدى ەكەن دەپ ويلاپ قويعانمىن. مىسالى, وزبەك حالقىندا كەلىندەر شاي قۇيعاندا, تويعا بارعاندا, قادىرلى قوناقتار كەلگەندە, كورشىلەردى كۇتكەندە كيەتىن ءتۇرلى-ءتۇرلى كويلەكتەرى بولادى. كەلىن بولىپ ءتۇسكەننەن كەيىن كۇندە سونى كەزەگىمەن تاڭەرتەڭ كيىپ شىعادى. ورامالدارى مەن باسقاسىن دا سوعان ۇيلەستىرىپ كيەدى.
ءبىز كەلىن كويلەكتەردىڭ ۇلگىسىن بارىنشا قاراپايىم, ويۋلارى نازىك, ءتۇستەرى اسا باجىرايماعان, كوزگە جۇمساق, دەنەگە ىڭعايلى ەتىپ تىگۋگە ۇمتىلدىق. جەڭدەرى مەن بەلىنە رەزەڭكە سالدىق. ول قىزمەت جاساعاندا, ىدىس-اياق جۋعاندا ىڭعايلى, ءتۇرىپ العانعا جاقسى. كەيبىر كامزولداردىڭ جاعاسىنا ازداعان جاساندى ەلتىرى سالىپ, تىگىپ كوردىك. ادەمى شىققان سىڭايلى. ويتكەنى, ۇلتتىق كيىم ۇلگىلەرىمىز تەرى, بىلعارىعا جاقىن, – دەيدى گۇلشارات جۇباەۆا.
ايناش ەسالي,
«ەگەمەن قازاقستان»
الماتى
