دەسەك تە, سايىن مۇراتبەكوۆتىڭ ارۋاعىنىڭ الدىنداعى پارىزدى ءبىز, جەرلەستەرى ءالى دە بولسا تولىققاندى اتقارا الماي جۇرگەنىمىزدى كۇللى قازاقتىڭ الدىندا قالاي تۇسىندىرەمىز؟
وسى رەتتە شىرىلداپ جازۋشىنىڭ تۋعان قارىنداسى مايرا مۇراتبەكوۆا عانا جۇگىرىپ ءجۇر. تۋما تالانتتى زيالى قاۋىم ۇمىتپاي, جازۋشىلار وداعىنىڭ توراعاسى نۇرلان ورازالين «ادەبيەتىمىزدە ۇلكەن ورنى بار قالامگەردىڭ ەسىمىن ەل ەسىندە ماڭگى ساقتاۋ ماقساتىندا تالدىقورعان قالاسىنداعى №9 مەكتەپكە سايىن مۇراتبەكوۆ اتىنىڭ بەرىلۋىنە ىقپال ەتۋىڭىزدى سۇرايمىز» دەپ جازعان حاتىن الماتى وبلىسىنىڭ اكىمى اماندىق باتالوۆ ەش كىدىرىسسىز جۇزەگە اسىرۋ ءۇشىن تالدىقورعان قالالىق اكىمدىگىنە جولدايدى. بىردەن زاڭناما شەڭبەرىندە قادام جاسالىپ, وسى يگى قادامدى اتالعان مەكتەپتەگى 102 مۇعالىمنىڭ قۋانا قولدايتىندىعى تۋرالى جەكە قولدارى قويىلعان حاتتاما وزگە دە قۇجاتتارمەن ءبىرگە قالا اكىمى ورىنباسارىنىڭ راستاۋىمەن الماتى وبلىستىق ونوماستيكالىق كوميسسياسىنىڭ بەكىتۋىنە 07.10.2016 جىلى جىبەرىلگەن. ءبىراق سىرعىتپا جاۋاپپەن ماسەلە اششى ىشەكشە سوزىلۋدا. سوندىقتان, وبلىس اكىمىنىڭ ورىنباسارى جاقسىلىق ومار جاقىندا جۋرناليستەرمەن بەيرەسمي كەزدەسۋ ءوتكىزگەندە ءبىز وسى ماسەلەنى كوتەرگەن ەدىك.
ءوڭىر باسشىسىنىڭ ورىنباسارى ونوماستيكالىق كوميسسيا جۇمىسىنىڭ رەتسىزدىگىن, كەزىندە تامىر-تانىستىق پەن اعايىندىققا جول بەرىلگەنىن وتكىر سىناپ الىپ, قازاقتىڭ سايىنىنىڭ ءجونى بولەكتىگىن باسا ايتتى. ورىندى ءسوزدى جۋرناليستەر قولداپ: «ول قازاقتىڭ سايىنى عوي. وقۋشىلار سايىن مۇراتبەكوۆتىڭ شىعارمالارىمەن بۇرىنعىدان دا جاقىن تانىسۋىنا نەگە جول اشپاسقا. قايتا سول مەكتەپ تۇلەكتەرى ماقتاناتىن بولادى», دەگەن سوڭ, ءوڭىر باسشىسىنىڭ ورىنباسارى بۇل ماسەلە تاياۋ ۋاقىتتا ناقتى شەشىمىن تاباتىندىعىن باسىن اشىپ ايتقان. ەندى ءتيىستى ورىننىڭ رەسمي بەكىتۋىن كۇتەمىز.
ءسويتىپ, زيالى قاۋىمنان باستاۋ الىپ, حالىق پەن بيلىكتەن قولداۋ تاپقان كوزايىم حاباردى ەل گازەتى «ەگەمەننىڭ» وقىرماندارىنا سۇيىنشىلەپ جەتكىزۋگە اسىقتىق.
نۇربول الدىباەۆ,
«ەگەمەن قازاقستان»
تالدىقورعان
