تورەشىنىڭ ىسقىرىعى ەستىلىسىمەن العا ۇمتىلعان شىعىسقازاقستاندىقتار قارسى قاقپانى بىرنەشە رەت نىساناعا الىپ ۇلگەردى. ءوز كەزەگىندە قوناقتار جيناقىلىق تانىتىپ, ادۋىندى شابۋىلدار دا ۇيىمداستىردى. «تورپەدو» ساپىنان الەكساندر شين, تالعات جايلاۋوۆ, دجوردان ساۋتورن, ال «رۋبيننەن» ماكسيم زيۋزياكين, ۆيتالي زوتوۆ سىندى حوككەيشىلەردىڭ ەسەپ اشاتىن مۇمكىندىكتەرى بولعان, الايدا ساتتىلىك جەتىسپەدى.
قوس كوماندا ءبىر-ءبىرىنىڭ قاقپاسىن تورۋىلداپ جۇرگەندە نەگىزگى ۋاقىت تا اياقتالىپ قالعان ەدى. جەڭىمپاز ۇجىم وۆەرتايم ارقىلى انىقتالدى. بۇل سىندا تۇمەندىكتەردىڭ جولى بولىپ, 66-مينۋتتا جەڭىس گولىن سوعىپ كەتتى. جالعىز شايبانىڭ اۆتورى – يگور سافارالەەۆ.
«تورپەدو» مەن «رۋبين» اراسىنداعى سەريالى ماتچتا رەسەيلىكتەر 1:0 ەسەبىمەن العا شىقتى.
– بۇل – سەرياداعى العاشقى ويىن. تارتىسقا تولى وتكەنىن كوردىڭىزدەر. ءبىزدى الدا قيىن ماتچتار كۇتىپ تۇرعانى انىق. جەڭىسكە جەتۋ ءۇشىن بارىمىزدى سالامىز, – دەيدى «تورپەدو» حوككەي كلۋبىنىڭ باس باپكەرى الەكسەي جداحين.
ايان ءابدۋالي,
«ەگەمەن قازاقستان»
