كونفەرەنتسيا باستالماس بۇرىن اكادەميا رەكتورى, قازاقستاننىڭ ەڭبەك ءسىڭىرگەن قايراتكەرى بيبىگۇل ءنۇسىپجانوۆا ءىس-شارانىڭ ماڭىزىن تۇسىندىرە كەلىپ, ستسەنوگرافيا فاكۋلتەتىنىڭ ستۋدەنتتەرى ۇيىمداستىرعان كورمەگە نازار اۋدارتتى. كورمەدەگى تالانتتى ءشاكىرتتەردىڭ شەبەرلىگىنىڭ عانا ەمەس, شىعارماشىلىق ەركىن قيال مەن ىزدەنىسى ءناتيجەسىندە دۇنيەگە كەلگەن ديپلومدىق جۇمىستىڭ سان ءتۇرلى ۇلگىلەرىن, نەگىزىنەن, ءتۇرلى سپەكتاكلدەر ءۇشىن ءازىرلەنگەن ساحنالىق كوستيۋمدەر, دەكوراتسيالىق, بۋتافوريالىق بۇيىمدار قۇرايدى.
م.اۋەزوۆ اتىنداعى قازاق اكادەميالىق دراما تەاترىنىڭ باس ستسەنوگرافى ە.تۇياقوۆ ستسەنوگرافيا ونەرىنىڭ جاڭا باعىتتارىنا, سۋرەتشىلەر قىزمەتىنىڭ قيىندىعىنا توقتالا تۇرىپ, اكادەميانىڭ ەلىمىزدەگى تەاترلاردى كاسىبي ماماندارمەن قامتاماسىز ەتۋدەگى ەڭبەگى اتاپ وتۋگە تۇرارلىق ەكەنىن ايتتى.
ساحنا مەرەكەسىنە وراي يسپانيادان, گەرمانيادان, رەسەيدەن, وزبەكستاننان ارنايى شاقىرىلعان مەيماندار مەن قازاقستاندىق ونەر زەرتتەۋشىلەرى بۇگىنگى تەاتر مادەنيەتى مەن دامۋىنا بايلانىستى وزەكتى ويلارىن ءوربىتتى. رەسەي فەدەراتسياسىنىڭ ەڭبەك ءسىڭىرگەن ءارتىسى, سانكت-پەتەربۋرگ مەملەكەتتىك كونسەرۆاتورياسىنىڭ پروفەسسورى نينا ارسەنتەۆا «بولاشاق وپەرا انشىلەرىن ءتاربيەلەۋدەگى ۆوكالدىق جانە درامالىق ونەر سينتەزىنىڭ ۇدەرىستەرى» دەگەن ماسەلەنى ماريا تەاترى تاجىريبەسى نەگىزىنە سۇيەنىپ, تالدادى. ال ۇلتتىق ساحنا ونەرىنىڭ جەتىستىگى مەن كەمشىلىگىن ساۋاتتى سارالاي وتىرىپ, اكتەرلەر مەن رەجيسسەرلەر قاۋىمىن سىني كوزقاراسىمەن قامشىلاپ جۇرەتىن بەلگىلى تەاتر سىنشىسى, «تەاتر ونەرىنىڭ تاريحى مەن تەورياسى» كافەدراسىنىڭ مەڭگەرۋشىسى ءسانيا قابديەۆا كلاسسيكا مەن زاماناۋي رەجيسسۋرانى شەبەر ۇشتاستىرىپ, جانرلىق, پىشىندىك جاعىنان ورىستەتۋدى قولعا العان قازاقستان تەاترلارىنىڭ دامۋىنىڭ نەگىزگى باعىتتارىنا توقتالدى.
ءار ەل ماماندارىنىڭ باسىن قوساتىن اۋقىمدى باسقوسۋلار تاجىريبە ءبولىسۋىمەن ءتيىمدى. وزبەكستان تەاترلارىنداعى باتىس ەۋروپا كلاسسيكاسىنىڭ ساحنالىق يگەرىلۋى تۋرالى ءسوز قوزعاعان پروفەسسور مۋحاببات تۋلياحودجاەۆانىڭ ويىن وسى ەلدەن كەلگەن ءارىپتەسى مارفۋا حاميدوۆا ونەرتانۋ عىلىمىنىڭ دامۋ سوقپاقتارىنداعى جاڭاشىلدىق سيپاتتار جايلى بايانداماسىمەن تولىقتىرىپ, جالعادى.
كونفەرەنتسيا جۇمىسى كەلن ۋنيۆەرسيتەتىنىڭ پروفەسسورى يرينا ميللەردىڭ, رەسەيلىك پروفەسسور ن.ارسەنتەۆانىڭ, ءوزبەكستاندىق ونەرتانۋشى م.تۋلياحودجاەۆانىڭ شەبەرلىك ساباقتارىمەن ۇشتاستى.
ايگۇل احانبايقىزى,
«ەگەمەن قازاقستان»
الماتى
