مەملەكەتتىك تاپسىرىسپەن شىققان قوس تومدىقتى جازۋشىنىڭ ىلگەرىدە جارىق كورگەن «قىزىل جولبارىس» ەكى تومدىق رومانىنىڭ جالعاسى دەۋگە ابدەن كەلەدى. اينالىپ كەلگەندە ءتورت تومدى قۇرايتىن تاريحي رومانعا جازۋشى 17 جىلىن تولايىم جۇمساعانىن دا ايتۋ كەرەك.
تولعانىس, ىزدەنىس, جازۋشىلىق تالانتپەن ورىلگەن تومدار تاريحىمىزدى تەربەپ, جەتىسۋ وڭىرلەرىندە ءوتكەن تالاي ىلكىمدى وقيعالاردى دا ءتىرىلتىپ, شەجىرەمىزدى بايىتا ءتۇسپەك.
«ابىلايدىڭ اق تۋى» جاڭا تاريحي رومانىنىڭ العاشقى تومىندا وسىدان ءۇش عاسىر بۇرىن ەل اۋزىندا «اقتابان شۇبىرىندى, القاكول سۇلاما» دەگەن اتپەن ساقتالعان قازاق-قالماق قاقتىعىستارى سۋرەتتەلەدى. مۇنداعى وقيعالار نەگىزىندە ىلە, سىرداريا سياقتى ۇلى وزەندەردىڭ جاعالاۋلارىندا, قاراتاۋ بويىندا وتەدى.
ەكىنشى تومدا ەل باسىنا ءتۇسكەن ناۋبەت «اقتابان شۇبىرىندىنىڭ...» سوڭعى كەزەڭدەرى سۋرەتتەلەدى. سوڭعى كىتاپتا قاراتاۋ بويىندا, تاشكەنت قالاسى, توڭىرەگىندە, شۋ, قاراتال وزەندەرىنىڭ جاعالاۋلارىندا وتكەن شەجىرەلەردى شۇرايلى ءتىلمەن سۋرەتتەي وتىرىپ, ۇلتتىق دەربەستىك, مەملەكەتتىك قاۋىپسىزدىك, ەل تاعدىرىمەن ەگىز ەرلەردىڭ ءجۇرىپ وتكەن جولى ەگجەي-تەگجەيلى باياندالادى.
ادەبي تۋىندىلار تولە بي مەن ابىلاي حاننىڭ قارىم-قاتىناسىن تەرەڭ سۋرەتتەۋىمەن دە ەرەكشەلەنەتىنىنە توقتالعان ابزال. كىتاپتىڭ باستى كەيىپكەرلەرى – ابىلاي حان, تولە بي بابالارىمىزدان باستاپ, جالايىردىڭ ءۇش كوسەمى – ەسكەندىر بي, ەسكەلدى بي جىلگەلدى ۇلى, بالپىق اۋليە دەربىسالى ۇلى مەن قابان جىراۋ اسان ۇلى.
جازۋشىلىق ونەردى ۇلتتىق عىلىم اكادەمياسىنىڭ مۇراعاتتارىنداعى جىلدارىمەن بايىتقان ۇزاقباي دوسپانبەتوۆتىڭ ىزدەنىسى وسىلايشا ىلكىمدى تومدارعا اينالىپ, ادەبيەتىمىزدى بايىتىپ وتىر.
ايناش ەسالي,
«ەگەمەن قازاقستان»
الماتى
