ەڭ الدىمەن, «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭنىڭ جوباسى مەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا بايانداما جاساعان پالاتانىڭ, زاڭناما جانە سوت-قۇقىقتىق رەفورما كوميتەتىنىڭ توراعاسى نۇرلان ءابدىروۆ اتالعان زاڭ جوبالارى ەلباسىنىڭ 2017 جىلعى 25 قاڭتارداعى ۇندەۋىندە كورسەتىلگەن تاپسىرماسىن ورىنداۋ ماقساتىندا ازىرلەنگەنىن, ولاردىڭ ساياسي جۇيەنى دەموكراتيالاندىرۋ, اتقارۋشى بيلىك ورگاندارىنىڭ جاۋاپكەرشىلىگى مەن تيىمدىلىگىن ارتتىرۋ ماقساتىن كوزدەيتىندىگىن اتاپ ءوتتى.
ادىلەت ءمينيسترى مارات بەكەتاەۆ قازاقستان ازاماتتارىنىڭ شەت ەلدەردە جەكە, وتباسىلىق جانە ىسكەرلىك مۇددەلەرىن قۇقىقتىق قورعاۋدى جەتىلدىرۋ بويىنشا مەملەكەت باسشىسىنىڭ تاپسىرماسىن ىسكە اسىرۋ ماقساتىندا دايىندالعان زاڭ جوباسى – «حالىقارالىق جەكە قۇقىق جونىندەگى گااگا كونفەرەنتسياسى جارعىسىن راتيفيكاتسيالاۋ تۋرالى» باياندادى. بۇل قۇجات حالىقارالىق جەكە قۇقىق ءجونىندەگى گااگا كونفەرەنتسياسىنىڭ جۇمىسىنا قاتىسۋدى ۇسىنادى. ال اتالعان ۇيىمعا الەمنىڭ 81 مەملەكەتى مەن ەۋروپالىق وداق كىرەدى.
«بۇل ۇيىمنىڭ ماقساتى – حالىقارالىق جەكە قۇقىق نورمالارىن ءبىرىزدەندىرۋ جانە وسى سالاداعى مەملەكەتتەردىڭ ىنتىماقتاستىعىنا جاردەم كورسەتۋ بولىپ تابىلادى. نەگىزىنەن, گااگا كونفەرەنتسياسىنىڭ اياسىندا 39 كونۆەنتسيا جاسالعان بولسا, ولاردىڭ بارلىعى دا ازاماتتىق ءىس جۇرگىزۋ شەڭبەرىندە قۇقىقتىق كومەك كورسەتۋگە باعىتتالعان», – دەدى بايانداماشى.
سونداي-اق, ءمينيستردىڭ ايتۋىنشا, قازاقستاننىڭ گااگا كونفەرەنتسياسىنداعى حالىقارالىق زاڭ شىعارۋشىلىق جۇمىسىنا تىكەلەي قاتىسىپ, شەت ەلدە ءبىزدىڭ ازاماتتارىمىزدىڭ قۇقىقتارى نەعۇرلىم ءتيىمدى قورعالۋىن قامتاماسىز ەتەدى. سونىمەن قاتار, بۇل ۇيىمعا مۇشەلىك گااگا كونفەرەنتسياسىنىڭ ساياساتىن بەلگىلەيتىن كەڭەستىڭ جۇمىسىنا قاتىسۋىنا دا ءمۇمكىندىك بەرەدى. جالپى ىستەر جانە ساياسات بويىنشا كەڭەس وتىرىسى جىل سايىن تۇراقتى بيۋرو ارقىلى ۇيىمداستىرىلادى.
وسىلايشا, حالىقارالىق شەڭبەردە اتقارىلاتىن شارۋاعا قاتىستى جان-جاقتى تۇسىنىك بەرگەن بايانداماشىعا دەپۋتاتتار تاراپىنان ساۋالدار دا قويىلدى. سونىڭ ءبىرى – كونفەرەنتسيا قۇرامىندا قازاقستان اتىنان ارەكەت ەتەتىن ءمۇددەلى مەكەمە تۋرالى بولاتىن. وعان ادىلەت ءمينيسترى بىلاي دەپ جاۋاپ بەردى: «كونفەرەنتسيا مۇشەلەرى مەن تۇراقتى بيۋرو اراسىنداعى ءوزارا ءىس-قيمىلعا ءجاردەمدەسۋ ماقساتىندا ءاربىر مۇشە مەملەكەتتىڭ ۇكىمەتى – ۇلتتىق ورگاندارى جانە ءاربىر مۇشە ۇيىم بايلانىس جاسايتىن ورگاندى تاعايىندايدى. ءبىز بۇل مىندەتتى اتقارۋعا ادىلەت مينيسترلىگىن ۇسىنىپ وتىرمىز. ارينە, ونى ءالى دە ناقتىلاي تۇسەمىز», – دەدى م.بەكەتاەۆ.
ءماجىلىس كوميتەتتەرىنىڭ وڭ باعاسىنا يە بولعان اتالعان جارعى جالپى وتىرىسقا قاتىسقان 105 دەپۋتاتتىڭ تاراپىنان ءبىراۋىزدان ماقۇلداندى.
ەكىنشى وقىلىمدا كۇن تارتىبىنە شىعارىلعان نەگىزگى باياندامانىڭ ءبىرى – «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ارنالدى. بۇل ءجونىندە بايانداعان ءماجىلىستىڭ الەۋمەتتىك-مادەني دامۋ كوميتەتىنىڭ مۇشەسى ناتاليا جۇمادىلداەۆا زاڭ جوباسى دەنە شىنىقتىرۋ مەن سپورتتى قارجىلاندىرۋدىڭ قولدانىستاعى جۇيەسىن جەتىلدىرۋ ماقساتىندا ازىرلەنگەنىن ايتتى.
زاڭ جوباسىنىڭ تانىستىرىلىمىنا دەيىن جۇمىس توبىنىڭ 7 وتىرىسى ءوتىپ, وعان ءتيىستى سالا ماماندارى مەن قوعامدىق بىرلەستىكتەردىڭ جانە ۇكىمەتتىك ەمەس ۇيىمداردىڭ وكىلدەرى قاتىسقان. دەپۋتاتتار تاراپىنان 70-كە جۋىق ۇسىنىس ءتۇسىپ, ولار بويىنشا ءتيىستى شەشىمدەر قابىلدانعان دەنە شىنىقتىرۋ جانە سپورت ماسەلەلەرى بويىنشا تۇزەتۋلەرگە ارنالعان زاڭ جوباسى وسىلايشا ەكىنشى وقىلىمدا ماقۇلداندى.
سونىمەن قاتار, دەپۋتاتتار جەر قاتىناستارىن رەتتەۋگە بايلانىستى زاڭ جوباسىن جۇمىسقا قابىلداپ, قىلمىستىق-اتقارۋ زاڭناماسىن جەتىلدىرۋ ماسەلەلەرىنە ارنالعان زاڭ جوباسى بويىنشا سەنات ەنگىزگەن وزگەرىستەرگە كەلىسىم بەردى.
نۇرلىبەك دوسىباي,
«ەگەمەن قازاقستان»
