قازاق ەسترادا ءانشىسى ديماش قۇدايبەرگەننىڭ اتاعى الەمدىك دەڭگەيدە شىعا باستاعانىن دالەلدەيتىن اقپارات جاريا بولدى. «بۇل فوتوشوپ ەمەس! بۇل الەمنىڭ ەڭ جارقىن قالالارىنىڭ ءبىرى نيۋ-يورك قالاسى, تايم سكۆەردەگى ەڭ ۇلكەن باستى لەد-ديسپلەي! 101 FM راديو مەديا ورتالىعى تانىمال جۇلدىزدار اراسىندا وسىنداي قۇرمەتكە يە بولۋ ءۇشىن بايگە جاريالاعان بولاتىن. قازاق بالاسىنىڭ الەمدىك جانكۇيەرلەرى, Dears-تىڭ ىقپالىمەن داۋىس بەرۋ ارقىلى امەريكانىڭ تورىندە ديماش قۇدايبەرگەننىڭ سۋرەتى ميلليوندارعا جاريا بولدى! ءتۇرلى ۇلت-وكىلدەر, تايم سكۆەردىڭ كوپشىلىگى ەندى وسىناۋ باستى ەكراننان قازاق ءانشىسىن تاني الادى!» دەپ جازدى (ورفوگرافياسى ساقتالدى) ديماشتىڭ پروديۋسەرى الپامىس ءشارىموۆ ءوزىنىڭ الەۋمەتتىك جەلىدەگى پاراقشاسىندا.
تايمس-سكۆەر – نيۋ-يورك قالاسىنىڭ تاريحي ورتالىعى مانحەتتەندەگى برودۆەي مەن جەتىنشى اۆەنيۋ قيىلىسىنداعى الاڭ. قالاداعى تەاترلار كۆارتالىنىڭ ورتالىعى. الاڭ 1904 جىلى «نيۋ-يورك تايمس» گازەتى Times Building عيماراتىنا كوشىپ كەلگەننەن كەيىن وسىنداي اتاۋعا يە بولدى. تايمس-سكۆەر بۇگىندە الەمدەگى ادامدار ەڭ كوپ تاماشالايتىن ورىنداردىڭ ءبىرى. ول جەرگە جىلىنا 50 ملن-داي ادام كەلەدى. الاڭنان كۇنىنە 300 مىڭنان اسا جۇرگىنشى, 115 مىڭ جۇرگىزۋشى مەن جولاۋشى وتەدى. بۇل جەردە 170 مىڭداي ادام جۇمىس ىستەيدى.
تايمس-سكۆەر نيۋ-يوركتىڭ عانا ەمەس, اقش –تىڭ سيمۆولى بولىپ سانالادى.
