پەدياتريا فاكۋلتەتىنىڭ قاجەتتىلىگى نەدە؟
2007 جىلى ەلىمىزدەگى 6 مەديتسينالىق جوو-دا پەدياتريا فاكۋلتەتى تۇگەل جابىلدى. جاڭا جۇيە بويىنشا ول ەمدەۋ فاكۋلتەتىمەن بىرىكتىرىلىپ, بولاشاق پەدياترلاردىڭ وقۋ مەرزىمى 9 جىلعا دەيىن ۇزارتىلدى. ال پەدياتر-عالىمدار بولسا «پەدياتر ءوز الدىنا جەكە ماماندىق. ەرەسەك ادام مەن نارەستەنىڭ اعزاسىندا ايتارلىقتاي ايىرماشىلىقتار, وزىندىك ەرەكشەلىكتەر بار. سوندىقتان ولاردىڭ بارلىعىن بىردەي جالپىلاما وقىتۋ دۇرىس ەمەس», دەگەندى العا تارتادى.
ءبىر ايتا كەتەر جايت, قازاقستاننان باسقالار بۇل قادامعا بارمادى. ۋكراينا, قىرعىزستان پەدياتريا فاكۋلتەتىن جاپقانمەن, ەكى جىلدان كەيىن قايتا اشىپ الدى. مەملەكەت ءۇشىن بالالار دارىگەرىنىڭ ماڭىزدىلىعى بولار, سانكت-پەتەربۋرگ پەن تاشكەنتتە جەكە پەدياتريا مەديتسينا ينستيتۋتى بار. ال ەۋروپا ەلدەرىندە وتباسىلىق, ياعني جالپى تاجىريبەلى دارىگەردىڭ كوپ بولۋىنىڭ باستى سەبەبى – ولاردا بالالار حالىق سانىنىڭ 10 پايىزىن قۇرايدى. ال قازاقستاندا بۇل كورسەتكىش – 30 پايىز. ونىڭ ۇستىنە ەگەمەندىككە قول جەتكىزگەنىنە نەبارى 25 جىل عانا بولعان قازاقستاندى جۇزدەگەن جىلدار بويى دامىپ, وركەندەگەن شەت ەلدەرمەن سالىستىرۋ ەرتەرەك. ولاردا الەۋمەتتىك سالاعا, ونىڭ ىشىندە مەديتسيناعا مەملەكەتتەن وراسان كوپ اقشا جۇمسالادى. ماسەلەن, مەديتسينانىڭ دامۋىنا ىشكى جالپى ءونىمنىڭ اقش-تا – 15, گەرمانيا مەن فرانتسيادا – 8, بىزدە 3,8 پايىزى بولىنەدى. ال ددۇ-نىڭ ۇيعارىمى بويىنشا دەنساۋلىق ساقتاۋ سالاسىنا بولىنەتىن قارجى 6 پايىزدان كەم بولماۋى كەرەك.
تاياۋدا پارلامەنتتە قازاقستان رەسپۋبليكاسىنداعى بالا قۇقىقتارى جونىندەگى ۋاكىل رەتىندە ءماجىلىس دەپۋتاتى زاعيپا باليەۆا مەن دەپۋتات ءدانيا ەسپاەۆا پەدياتريا سالاسىندا قالىپتاسقان ماسەلەلەردى قوزعاپ, دەپۋتاتتىق ساۋال جولدادى. سونداي-اق, سوزىلمالى ناۋقاسى بار ەرەسەكتەر مەن ەمىزۋلى نارەستەنىڭ ءبىر ەمحانادا كەزەك كۇتىپ, ءبىر دارىگەرگە قارالۋىنا دا ءۇزىلدى-كەسىلدى قارسى بولدى. بۇل ماسەلەلەردى قحا رەسپۋبليكالىق انالار كەڭەسىنىڭ وتىرىسىندا دا كوتەرىپ, ول قولداۋعا يە بولدى.
الەمدە اۋرۋدىڭ 14 مىڭ ءتۇرى بار. مۇنشا كوپ اۋرۋدى جالپى تاجىريبەلى دارىگەر بىلە بەرمەيدى. ءتىپتى كەيبىرەۋىنىڭ اتاۋىن دا بىلمەۋى مۇمكىن. ال تەك پەدياتريا سالاسىنىڭ 26 ءتۇرلى باعىتى بار. نەوناتولوگ, بالالار حيرۋرگى, بالالار ينفەكتسيونيسى, ت.ب. ەگەر ەلىمىزدەگى حالىق سانىنىڭ 30 پايىزىن بالالار قۇرايدى دەسەك, كاسىبي بالالار دارىگەرىن دايىنداۋ ماسەلەسىن توقتاتۋدى قالاي دەپ تۇسىنۋگە بولادى. قازىر بالالاردى قابىلداپ جاتقان وتباسىلىق دارىگەر كوزىن جاڭادان اشقان شاقالاقتى قاراۋعا جۇرەكسىنەدى. ويتكەنى, وندايلار بالالار اۋرۋىن بىلمەيدى. ال پەدياترلار بولسا كۇننەن كۇنگە ازايىپ بارادى. بۇرىندارى التى جىل بويى تەك قانا پەدياتريا سالاسىن وقىپ, زەرتتەپ, بەلگىلى تەوريالىق ءبىلىم العان تۇلەكتەردىڭ ءوزى بالالاردى بىردەن ەمدەپ كەتۋگە قورقاقتايتىن. ال وتباسىلىق مەديتسينانى قانشا وقىعانمەن پەدياتريا سالاسىنا ماماندانۋسىز كەلىپ, تۋا سالعان نارەستەدەن ءتۇرلى جاستاعى بالالار مەن ەرەسەكتەردىڭ بارلىق اناتوميالىق-فيزيولوگيالىق ەرەكشەلىكتەرىن ءبىلىپ شىعۋى مۇمكىن ەمەس, دەدى اكادەميك كامال ورمانتاەۆ.
اكادەميك اقساقالىمىز اۋزىنان تاستاماي قوڭىراۋلاتىپ ءجۇرىپ, الەۋمەتتىك سالانى جاقسى بىلەتىن, بىلگىر ۇيىمداستىرۋشى يمانعالي تاسماعامبەتوۆ ۆيتسە-پرەمەر بولىپ ۇكىمەتكە قايتا كەلگەندە, ول كىسىگە كىرىپ, وتباسىلىق دارىگەر پەدياتردىڭ مىندەتىن تولىق اتقارا المايتىنىن, بالالار ەمدەيتىن دارىگەردى دايىنداۋدى قايتا قولعا الماسا, جاعدايدىڭ قيىنداپ كەتكەنىن ايتىپ, ۇلكەن ءوتىنىش بىلدىرەدى. بۇل ماسەلەنىڭ ماڭىزىن تۇسىنگەن پرەمەر-مينيستر باقىتجان ساعىنتاەۆ ۇكىمەت وتىرىسىندا بالا دەنساۋلىعى ەكسپەريمەنت جۇرگىزەتىن الاڭ ەمەستىگىن, بالالار دارىگەرىنىڭ قاتەلىكتەرى تىم قىمباتقا ءتۇسەتىنىن, بۇل تۇستا مەديتسينالىق كادرلارعا, ءاسىرەسە, بالالار دارىگەرلەرىن دايارلاۋ ساپاسىنا كوڭىل ءبولۋ قاجەتتىگىن, ول ءۇشىن ەلىمىزدە پەدياتريا فاكۋلتەتىن 1 قىركۇيەكتەن قايتا اشىپ, ەمحانالاردا پەدياتر قىزمەتىن قايتا قالپىنا كەلتىرۋ ءجونىندە ناقتى تاپسىرما بەردى. مىنە, بالالاردىڭ باعىنا وسىنداي ايعاي-شۋمەن پەدياتريا فاكۋلتەتى قايتا اشىلاتىن بولدى. ال ەندىگى ماسەلە, بۇگىنگىدەي مەديتسينا كۇن ساناپ دامىپ وتىرعان ۋاقىتتا, ارادا وتكىزىپ العان اتتاي ون جىلدىق ولقىلىقتى قالاي قالپىنا كەلتىرەمىز دەگەن ساۋال.
بۇگىنگى احۋال
پەدياتريا – مەديتسينا عىلىمىنىڭ بالالار اۋرۋلارىن زەرتتەيتىن سالاسى. بالا ورگانيزمىنىڭ اناتوميالىق-فيزيولوگيالىق ەرەكشەلىكتەرىن, بالا اۋرۋلارىنىڭ سەبەپتەرىن انىقتاۋ, ەمدەۋ, ولاردان ساقتانۋ, سونداي-اق, ءنارەستەنى تۋعانعا دەيىن جانە تۋعاننان كەيىن دۇرىس كۇتۋ, تاماقتاندىرۋ ادىستەرىن قاراستىرادى. مامانداردىڭ ايتۋىنشا, پەدياتريا تەك قانا ءبىلىم ەمەس, بالالارعا, ولاردىڭ اتا-انالارىنا ساۋاتتى كەڭەس بەرۋمەن دە اينالىسادى.
ەندى ەلىمىزدە پەدياتريا قىزمەتى قالاي دامۋدا دەگەنگە كەلەيىك. سالىستىرۋ ءۇشىن ارعى جىلدارعا بارماي-اق, 2005 جىلدى الايىق. سول جىلى قازاقستاندا پەدياتر دارىگەرلەر سانى 6 مىڭ ەكەن. دەسەك تە, سول كەزدىڭ وزىندە بالالار دارىگەرى جەتىسپەيتىن. بۇل كورسەتكىش 2014 جىلى 6265 بولىپ, ونىڭ 4942-ءسى قالالىق جەردە جۇمىس ىستەسە, 2015 جىلى نەانتولوگتارمەن بىرگە پەدياترلار سانى 5554-ءتى قۇراپ, ونىڭ 4357-ءسى قالالىق پەدياتر بولعان. ال اۋىلدىق جەرلەردە بالالار دارىگەرى 2014 جىلى نەبارى 1626-نى, 2015 جىلى 1197-ءنى قۇراعان. بۇل كوپتەگەن اۋىلدا بالالار دارىگەرى اتىمەن جوق دەگەن ءسوز. سونىڭ سالدارىنان بالاسىن قۇشاقتاعان اناعا قالاعا, اۋدان, وبلىس ورتالىقتارىنا سابىلۋعا تۋرا كەلۋدە. ەگەر 2016 جىلى ەلىمىزدە 18 جاسقا دەيىنگى بالا سانى 5 ملن 460 مىڭ 449 بولسا, ونىڭ 2 ملن 288 مىڭ 113-ءى 5 جاسقا دەيىنگى بوبەكتەر ەكەنىن, ولاردىڭ 75 پايىزى اۋىلدىق جەردە, 25 پايىزى عانا قالادا تۇراتىنىن ەسكەرسەك, ماسەلەنىڭ سونشالىقتى تىعىرىققا تىرەلگەنىن ءتۇسىنۋ قيىن ەمەس.
وسى رەتتە دايارلانعان ماماندار بويىنشا رەسمي دەرەكتەر ەلىمىزدە پەدياتردىڭ تاپشى ەكەندىگىن ايقىن كورسەتەدى. ماسەلەن, 2012 جىلى 10 مىڭ ادامعا ءتورت پەدياتردان, 2015 جىلى اتىراۋ, باتىس قازاقستان, پاۆلودار وبلىستارىندا 10 مىڭ ادامعا ءبىر پەدياتردان كەلگەن. ال بالالارعا مەديتسينالىق جاردەم كورسەتۋدىڭ ۇيىمداستىرۋشىلىق ۇستانىمى بويىنشا ۋچاسكەلىك پەدياتر-دارىگەر 800-1000-عا دەيىن تىركەلگەن اۋماقتاعى بالالارعا قىزمەت كورسەتۋى كەرەك ەكەن.
تاعى ءبىر ايتا كەتەرلىك جايت, سوڭعى جىلدارى ەلىمىزدە پەدياتر ماماندىعىنا قىزىعۋشىلىق تانىتاتىن ستۋدەنتتەر كۇرت كەمىگەن. ۇلتتىق ەكونوميكا مينيسترلىگىنىڭ مالىمەتى بويىنشا, قازاقستاندا 2012 جىلى – 742, 2013 جىلى – 453, 2014 جىلى بار-جوعى 7 پەدياتر عانا وقۋ ورنىن تامامداعان.
بۇگىندە وڭىردەگى اۋىلداردىڭ 25 پايىزى عانا پەدياترمەن قامتىلعان. جالپى, بالالارعا مەديتسينالىق جاردەم كورسەتۋدىڭ ۇيىمداستىرۋشىلىق ۇستانىمى بويىنشا ءبىر پەدياتر-دارىگەرگە 15-20 بالادان كەلسە, قازىر 30-40-قا جەتىپ جىعىلادى. ال مۇندايدا ساپالى ەمدەۋ جايىندا ايتۋدىڭ ءوزى قيىن. بالا ءولىمى ءۇش ەسە كەمىگەنمەن, ولاردىڭ اۋرۋعا شالدىعۋى, سوزىلمالى دەرتپەن اۋىرۋ كورسەتكىشى كەرىسىنشە 22 پايىزعا ارتقان. مۇنىڭ ءبارى ەرەسەكتەردى ەمدەپ ۇيرەنگەن ءدارىگەرلەردىڭ بالاعا ناقتى دياگنوز قويۋىنىڭ قيىنداۋىنان دەيدى. ەكىنشىدەن, ءبىلىمدى, بىلىكتى پەدياترلار جالاقىسى جوعارى جەكە مەنشىك كلينيكالارعا كەتكەن. ۇشىنشىدەن, بۇرىنعى تاجىريبەلى پەدياترلاردىڭ جاسى كەلىپ, ۇرپاق ساباقتاستىعى ۇزىلگەن.
ەندى نە ىستەمەك كەرەك؟..
ءيا, بالا – بولاشاعىمىز. ونىڭ دەنساۋلىعىنا الاڭداماعان ەلدىڭ كەلەشەگى دە ب ۇلىڭعىر. سوندىقتان دا ۇكىمەت بۇل ماسەلەنى تەزىرەك شەشۋدى تاپسىرىپ وتىر. راس, كەمشىلىك كەتتى. ەندى سول ولقىلىقتىڭ ورنىن قالاي تولتىرامىز؟ بۇگىنگىدەي مەديتسينانىڭ قارىشتاپ دامىعان جاعدايىندا بالالارعا مەديتسينالىق كومەك كورسەتۋ تۇرعىسىندا بولسىن, پەدياتريا عىلىمىندا بولسىن بىرنەشە جىل جىبەرىپ العان ارالىقتى قالاي قۋىپ جەتەمىز؟ مينيسترلىكتەر بۇل تاپسىرمانى قالاي ىسكە اسىرادى؟ گاپ سوندا.
ارينە, فاكۋلتەتتى اشۋ, پەدياترلىق قىزمەتتى ۇيىمداستىرۋ ايتۋعا وڭاي بولار. كادر دايىنداۋ ءۇشىن دە جاقسى كادر قاجەت. جاڭا ءبىلىم باعدارلاماسى جاسالۋى كەرەك. بۇنىڭ ءبارى ۋاقىتتى تالاپ ەتەدى. مىنە, وسى ماسەلەلەرگە قاتىستى دەنساۋلىق ساقتاۋ مينيسترلىگىندە جۇمىس توبى قۇرىلىپ, تەكسەرۋ جۇرگىزىلىپ, ساراپتاما جاسالدى. جۇمىس توبى توراعاسىنىڭ ورىنباسارى قازاقستاننىڭ باس بالالار ونكوگەموتولوگى, پەدياتريا جانە حيرۋرگيا ورتالىعىنىڭ ديرەكتورى, مەديتسينا عىلىمدارىنىڭ دوكتورى ريزا بورانباەۆانىڭ ايتۋىنشا, قاجەتتى نورماتيۆتىك قۇجاتتار دايىندالعان.
– جۇمىس توبى وزىنە جۇكتەلگەن تاپسىرما بويىنشا وڭىرلەردەگى جاعدايلارمەن تانىسىپ شىقتى, – دەدى بىزگە ريزا زۇلقاينارقىزى. – ءماسەلەن, ەلىمىزدە قانشا پەدياتر بار, قانشاسى جەتىسپەيدى, ۋچاسكەلىك پەدياترلىق قىزمەت قاي وڭىرلەردە ساقتالعان, ساقتالسا, ولار قالاي جۇمىس ىستەپ جاتىر, قانداي مۇمكىندىكتەر بار, سونداي-اق, بالالار ەمحانالارى قالاي ۇيىمداستىرىلعانىن ءجىتى كورىپ, قورىتىندى جاسادىق. ءيا, راسىمەن دە كادر جەتىسپەيدى. 4 وبلىستا ەمحانالاردىڭ 90 پايىزى جالپى تاجىريبەلى دارىگەرلىك (جتد) جۇيەگە كوشكەن. ال قالعان وڭىرلەردە جتد-دا, بالالار ەمحاناسى دا بار. ياعني, ەلىمىز بويىنشا 1860 ۋچاسكەلىك پەدياتر, 5280 جتد جۇمىس ءىستەيدى. ەندى وڭىرلەردە ەمحانالار جانىنداعى العاشقى مەديكو-سانيتارلىق كومەك نەگىزىندە امبۋلاتورلىق-ەمحانالىق دەڭگەيدە پەدياترلىق ۋچاسكەلەر اشىلاتىن بولادى. بىراق مامانداردىڭ جەتىسپەۋىنە بايلانىستى, ولار كەزەڭ-كەزەڭمەن اشىلماق. ال بىرقاتار وبلىستا ساقتالعان پەدياترلىق ەمحانالار جۇمىستارىن ودان ءارى جالعاستىرا بەرەدى.
سونداي-اق, ريزا زۇلقاينارقىزى كادر دايىنداۋدا ينتەرناتۋرانى كۇشەيتىپ, پەدياتريا ماماندىعى بويىنشا بىتىرگەن تۇلەكتەرگە العاشقى مەديكو-سانيتارلىق كومەك بويىنشا جۇمىس ىستەۋگە رۇقسات ەتۋ ماسەلەسى قويىلعانىن, ال رەزيدەنتۋرا بويىنشا ماماندار دايارلانا بەرەتىنىن جەتكىزدى. ارينە, كادر ماسەلەسىن شەشۋ ءۇشىن ۋاقىت كەرەك. پەدياترلار دايىندالماي جاتىر دەگەن ءسوز جالعان, دايىندالىپ جاتىر. بىراق از. ويتكەنى, سوڭعى كەزدەرى جاستاردىڭ بالالارمەن جۇمىس ىستەگىلەرى كەلمەگەندىكتەن پەدياتر ماماندىعىن تاڭدامايدى. ونىڭ سەبەبى ارىز-شاعىم كوپ, پەدياتر بولۋ ءۇشىن ۇزاق وقۋ كەرەك. ال جتد نەگە ءالسىز دەگەنگە كەلسەك, مەدۋنيۆەرسيتەتتى بىتىرگەن سوڭ ولاردىڭ ءوزىن ءتورت-اق اي قايتا دايىندايدى. ەندى جتد-نى رەزيدەنتۋرادا وقىتۋ ماسەلەسى قويىلىپ وتىر, دەدى باس ونكوگەماتولوگ.
ريزا زۇلقاينارقىزىنىڭ ويىن كامال اعامىز دا تولىقتىرا كەتتى.
– بۇگىندە وبلىستارداعى بالالار دارىگەرىنىڭ سانى دا, ساپاسى دا تومەندەپ كەتكەن. جاڭا تۋعان نارەستەلەردى ەمدەيتىن دارىگەر-نەانوتولوگتار جوقتىڭ قاسى. ماسەلەن, بالقاش اۋدانىندا ءبىر عانا نەوناتولوگ قالعان. الماتىدا ەكى ەسە تومەندەگەن. ەمحانالارعا بارساڭ وتباسىلىق دارىگەرگە كورىنۋگە ۇلكەن دە, كىشى دە كەلەدى. 80-دەگى شالدار جوتەلىپ, قاقىرىنىپ وتىرسا, سولارمەن بىرگە جاڭا تۋعان نارەستە دە, ءبىر-ەكى جاستاعى بالا دا دالىزدە بىرگە كەزەك كۇتەدى. ەلدە تۇراتىن كىشكەنە تۇرعىنداردىڭ 40 پايىزىنىڭ دەنساۋلىعى تومەن. ولاردى وتباسىلىق دارىگەر قابىلداپ, دەنە قىزۋى بولسا, ءتۇسىرىپ قويا بەرەدى. بىراق ول بالانىڭ قىزۋى نەگە كوتەرىلدى, وندا شارۋاسى جوق. ءسويتىپ, بالا سوزىلمالى اۋرۋعا شالدىعادى. ال بالا دارىگەرى ونىڭ قىزۋى نەگە كوتەرىلدى دەپ, اياعىنا دەيىن ەمدەپ شىعۋى ءتيىس. وسىنداي كۇردەلەنگەن پروبلەمالاردىڭ بايىبىنا بارعانى دەپ ەسەپتەيمىن, ۇلكەن ىسكە ۇيىتقى بولعان دەنساۋلىق ساقتاۋ مينيسترلىگىنە, ۇكىمەتكە بارشا اتا-انالاردىڭ, دارىگەرلەردىڭ اتىنان راحمەت ايتامىن, – دەدى كامال ءسارۋار ۇلى.
اكادەميك اعامىز العىسپەن بىرگە تىعىرىقتان شىعۋدىڭ جولدارىن دا ايتا كەتتى. 1 قىركۇيەككە دەيىن 5-6 ايدا شەتەلدىكتەرگە يەك ارتپاي, وزىمىزگە جاقىن كورشىلەر – رەسەي, ۋكراينا, بەلارۋستىڭ تاجىريبەلەرىن قابىلداساق. مىسالى, سانكت-پەتەربۋرگتەگى پەدياتريالىق مەديتسينا ينستيتۋتىنا بىرنەشە دارىگەردى جىبەرىپ, تاجىريبە الماسۋعا بولادى. ماسەلەن, رەسەي پەدياترلار سەزىن وتكىزگەندە, الەمنىڭ تانىمال عالىمدارى كەلىپ, تاجىريبەلەر الماسادى. ەگەر ءبىز دە سول سياقتى شەبەرلىك-سىنىپتار وتكىزسەك, الدەقايدا پايدالى بولماق.
ءتۇيىن:
زادى, ەلىمىزدەگى انا مەن بالا دەنساۋلىعىن قورعاۋ ماسەلەسى دەنساۋلىق ساقتاۋ سالاسىنىڭ باسىم باعىتتارىنىڭ ءبىرى بولىپ سانالادى. ءويتكەنى, الەمدىك تاجىريبە بويىنشا كەز كەلگەن ەلدەگى بالا ءولىمىنىڭ كورسەتكىشى سول مەملەكەتتەگى بالالاردىڭ دەنساۋلىعىنان حابار بەرىپ قانا قويمايدى, سونىمەن قاتار مەملەكەتتىڭ الەۋمەتتىك-ەكونوميكالىق ءال-اۋقاتىنىڭ دەڭگەيىن دە كورسەتەدى.
ءبىر وكىنىشتىسى, بىلىكتى دارىگەرلەر مەن تالانتتى تۇلەكتەردىڭ دەنى بيزنەسكە كەتىپ, بۇگىندە جاسى كەلگەن عالىمداردىڭ ءىسىن جالعاستىراتىن, وتاندىق عىلىمدى دامىتاتىن جاستار جوقتىڭ قاسى. دارىگەر جالاقىسىنىڭ, الەۋمەتتىك تۇرمىس-جاعدايىنىڭ تومەندىگىنەن جاس مامانداردىڭ تۇراقتاماي وتىرعانى اششى دا بولسا شىندىق. سوندىقتان كوپ اعزالارى جەتىلمەگەن, دامىماعان, اۋىرعان جەرىن ايتاتىن ءتىلى جوق بالاعا ناقتى دياگنوز قويۋدا, سونداي-اق, قازىرگى زامانعى اپپاراتۋرالارمەن جانە تەحنولوگيالارمەن جۇمىس جاسايتىن ماماندار, بالا ورگانيزمىنىڭ وزگەرىسىن بىلەتىن كاسىبي ءبىلىمدى پەدياترلار اسا قاجەت. ال بالالار لور-ى, حيرۋرگى, وكۋليسى, نەوناتولوگى سياقتى ماماندار مىندەتتى تۇردە پەدياتر دارىگەرلەردەن دايىندالعانى ابزال.
بۇگىنگى كۇنگە بىزگە بەلگىلىسى, پرەمەر-مينيستر ب.ساعىنتاەۆ ۇكىمەت وتىرىسىندا اۋىزشا بۇيرىق بەرگەنمەن, پەدياتريا فاكۋلتەتىن اشۋ جونىندەگى قاجەتتى قۇجات – ۇكىمەتتىڭ قاۋلىسى ءالى شىققان جوق. ونىڭ ۇستىنە پەدياتريا فاكۋلتەتى بارلىق مەديتسينالىق جوو-دا ەمەس, تەك س.اسفەندياروۆ اتىنداعى قازۇمۋ-دە عانا اشىلادى دەگەن حابار الاڭداتۋدا. ايتۋلارى, 150 ستۋدەنت قابىلدانباق. ونىمەن ەلىمىزدەگى بالالار دارىگەرىنىڭ تاپشىلىعى جويىلا ما؟! ەندەشە دەنساۋلىق ساقتاۋ مينيسترلىگى باستالعان ءىستى ناقتى قولعا الىپ, جوعارىدا ايتىلعان ۇسىنىستاردى ەسكەرىپ, ماسەلەنىڭ وڭتايلى شەشىلۋىنە ۇيتقى بولسا دەگەن تىلەك بار.
گۇلزەينەپ سادىرقىزى,
«ەگەمەن قازاقستان»
