قر پرەمەر-ءمينيسترى باقىتجان ساعىنتاەۆ باتىس قازاقستان وبلىسىنا جۇمىس ساپارى اياسىندا «اتامەكەن» كاسىپكەرلەر پالاتاسىنىڭ وڭىرلىك كەڭەسىنىڭ وكىلدەرىمەن كەزدەسۋ وتكىزدى, وندا بيزنەس سەكتورىن دامىتۋدىڭ وزەكتى ماسەلەلەرى تالقىلاندى, دەپ حابارلايدى pm.kz.
كەزدەسۋ بارىسىندا قاتىسۋشىلار ونەركاسىپتىك كاسىپورىنداردى نەسيەلەندىرۋ, مەملەكەتتىك-جەكەشەلىك ارىپتەستىك جوبالارىن دامىتۋ, مەملەكەتتىك ساتىپ الۋلار جۇيەسىن جەتىلدىرۋ, اكىمشىلىك كەدەرگىلەردى تومەندەتۋ جانە بيزنەسكە نەسيە قاراجاتتارىنىڭ قولجەتىمدىلىگىن ارتتىرۋ ماسەلەلەرىن كوتەردى, سونىمەن قاتار بيزنەستىڭ جول كارتاسىنىڭ ىسكە اسىرىلۋ بارىسىن قارادى.
بۇدان وزگە, قاتىسۋشىلار كاسىپكەرلەر, مەملەكەتتىك ورگاندار جانە كۆازيمەملەكەتتىك سەكتور اراسىنداعى ءوزارا ءىس-قيمىل ماسەلەلەرىن تالقىلادى.
كەڭەس بارىسىندا بقو كاسىپكەرلەر پالاتاسىنىڭ وڭىرلىك كەڭەسىنىڭ توراعاسى, «كوندەنسات» كت كونسورتسيۋم كەڭەسىنىڭ توراعاسى ۆ. دجۋنۋسوۆ, بقو كاسىپكەرلەر پالاتاسىنىڭ ديرەكتورى ن. قايىرشين, «شاعىن بيزنەس ورتالىعى» قاۋىمداستىعى» زتب ديرەكتورى ش. ماحمۇدوۆا, «كۆانت» جشس ديرەكتورى د. پشەنيچنىي, «اlageum Electric» اق قاداعالاۋ كەڭەسىنىڭ توراعاسى س. قوجاباەۆ, «قازارماونەركاسىپ» جشس ديرەكتورى س. كاچالو ءسوز سويلەدى.
كەزدەسۋ قورىتىندىسى بويىنشا ب. ساعىنتاەۆ قر پرەزيدەنتى ن. نازارباەۆتىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنا سايكەس, ۇكىمەت جۇمىسى ەلىمىزدىڭ ەكونوميكالىق ءوسىمىنىڭ قوزعاۋشى كۇشىنە اينالۋعا ءتيىستى بيزنەس ۇستانىمدارىن نىعايتۋعا نەگىزدەلگەنىن اتاپ ءوتتى. وسى ورايدا قازاقستاندا شىعىنداردى قىسقارتۋ, قايتا رەتتەۋ, سونىمەن قاتار كاسىپكەرلەرگە قارجىلىق ءارى زاڭنامالىق قولداۋ كورسەتۋ بويىنشا شارالار كەشەنى ىسكە اسىرىلۋدا.
سونىمەن قوسا, مەملەكەتتىك ساتىپ الۋلار جۇيەسىن جەتىلدىرۋ مەن ونداعى قازاقستاندىق قامتۋ ۇلەسىن ۇلعايتۋعا بايلانىستى جۇيەلى جۇمىستار جۇرگىزىلۋدە. پرەمەر-مينيستر قازىرگى تاڭدا وتاندىق جيھاز جانە جەڭىل ونەركاسىپ وندىرۋشىلەرىنەن ءونىمدى ساتىپ الۋ جۇمىستارى رەتكە كەلتىرىلگەنىن ايتىپ ءوتتى.
قورىتىندىلاي كەلە, ب. ساعىنتاەۆ قاتىسۋشىلاردىڭ نازارىن مەملەكەتتىك-جەكەشەلىك ارىپتەستىكتى, اسىرەسە, الەۋمەتتىك سالادا دامىتۋدىڭ ماڭىزدىلىعىنا اۋداردى, سونىمەن قاتار, ماڭىزدىسى, اگروونەركاسىپ كەشەنى سالاسىندا وتاندىق تاۋارلارعا جاڭا نارىقتاردى يگەرۋ مەن ەكسپورتتىق ءوندىرىستى دامىتۋدىڭ قاجەتتىگى تۋرالى ايتتى.
سونىمەن قاتار, باقىتجان ساعىنتاەۆ بقو-دا مەملەكەتتىك-جەكەشەلىك ارىپتەستىكتىڭ دامۋىن باعالاپ, ايماقتاعى بىرنەشە ءىرى كاسىپورىننىڭ جۇمىسىمەن تانىستى.
ساپار بارىسىندا ۇكىمەت باسشىسى "نۇرلى جول" باعدارلاماسى بويىنشا سالىنىپ جاتقان نىسانداردى دا باعالادى.
