كاسىبي مەرەكەگە ارنالعان كەش تەاتر ونەرىنىڭ قىر-سىرىن اشاتىن ساحنالىق قويىلىممەن باستالدى. ساحنادا تراگەديا, كومەديا, دراما جانرلارىنىڭ سىر-سيپاتى ءتۇسىندىرىلىپ, ۋ. شەكسپيردىڭ «گاملەت», ن. گوگولدىڭ «رەۆيزور», ك. ءابدىراحماننىڭ «كەتبۇقا» سپەكتاكلدەرىنەن كورىنىستەر قويىلدى. ارتىنشا كەش جۇرگىزۋشىلەرى ساحناعا اتى رەسپۋبليكاعا ءماشھۇر ماڭدايالدى تەاتردىڭ ارداگەرلەرى قازاقستان رەسپۋبليكاسىنىڭ حالىق ءارتىسى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, «قۇرمەت بەلگىسى» وردەنىنىڭ يەگەرى دوسجان جانبوتاەۆ, «قۇرمەت» وردەنىنىڭ يەگەرى رايحان يبراەۆا باستاعان ساحنا مايتالماندارىن شاقىردى. ساحنا ساڭلاقتارىن قالا اكىمى باتىرلان احمەتوۆ كاسىبي مەرەكەمەن قۇتتىقتادى.
– 1972 جىلى قۇرىلىپ, اتاقتى مۇحتار اۋەزوۆتىڭ «ايمان-شولپان» دراماسىمەن شىمىلدىعىن اشقان سەركە تەاترى – ەلىمىزدە وزىندىك ورنى بار كيەلى قاراشاڭىراق, ءبىزدىڭ ماقتانىشىمىز. سىزدەر وسىنداي قاسيەتى جوعارى شاڭىراقتىڭ استىندا حالىققا قىزمەت ەتىپ كەلەسىزدەر. جارتى عاسىرعا جۋىق ۋاقىت بويى كورەرمەندەرىنە رۋحاني ءنار سىيلاۋمەن قاتار, زور جەتىستىكتەر مەن تولايىم تابىستارعا قول جەتكىزىپ كەلەدى. ونىڭ بارلىعىن ءتىزىپ ايتۋ مىندەت ەمەس, سەبەبى كوزى قاراقتى كورەرمەن سىزدەردىڭ بارلىق جەتىستىكتەرىڭىزبەن تانىس, ءارى سوعان تىلەكتەس, - دەگەن باتىرلان دۇيسەنباي ۇلى ولكەدەگى تەاتر ونەرى قاراشاڭىراعىنىڭ ۇجىمىنا شىعارماشىلىق تابىستار تىلەدى. قالا باسشىسى قر ەڭبەك سىڭىرگەن قايراتكەرى سەرىك بۇلعاقباەۆقا, مادەنيەت سالاسىنىڭ ۇزدىگى ءسابيرا بەكايداروۆاعا, قر مادەنيەت قايراتكەرى, قۋىرشاق ترۋپپاسىنىڭ رەجيسسەرى ءشارىپ ۇزاقوۆقا, تەاتر ءارتىسى جانىبەك ارىستانبەكوۆكە جەزقازعان قالاسىنىڭ قۇرمەت گراموتاسىن تابىستادى.
قالا باسشىسىنان سوڭ ءسوز العان قالالىق ءماسليحات دەپۋتاتى, كاسىپكەر, مەتسەنات بەكزات التىنبەكوۆ قازاقستاننىڭ ەڭبەك سىڭىرگەن قايراتكەرى, قر حالىق ءارتىسى, تەاتر تارلانى دوسجان جانبوتاەۆ اتىنداعى قۇنى 80 مىڭ تەڭگە بولاتىن سىياقىمەن ەركە بايدەشەۆتى, 60 مىڭ تەڭگە كولەمىندەگى قر ەڭبەك سىڭىرگەن قايراتكەرى, ساحنا تارلانى سەرىك بۇلعاقباەۆ اتىنداعى سىياقىمەن جاسۇلان تۇسىپبەكوۆتى, «قۇرمەت» وردەنىنىڭ يەگەرى رايحان يبراەۆا اتىنداعى سىياقىمەن ءباتيما الكەنوۆانى ماراپاتتادى. تەاتر ارتىستەرى جانىبەك ارىستانبەكوۆ, ارداق جارقىنبەكوۆ, ءمادي شادەنوۆ, نۇرجان بەيىسبەكوۆ قاراعاندى وبلىستىق مادەنيەت, ارحيۆتەر جانە قۇجاتتاما باسقارماسى باسشىسى ەركەبۇلان اعىمباەۆ قولىنان قۇرمەت گراموتالارىن الدى. قوجامقۇلوۆتىقتاردى قاراعاندىدان ارنايى كەلگەن, وبلىستىق س. سەيفۋللين اتىنداعى دراما تەاترى مەن كەنشىلەر تەاترىنىڭ ارداگەرلەرى جومارت ابىلتاەۆ, كەڭەس جۇمابەكوۆ قۇتتىقتاپ, ونەر مەن رۋحانياتقا قولداۋ كورسەتىپ وتىرعان قالا جۇرتشىلىعى مەن باسشىلىعىنا العىستارىن ايتتى.
سونداي-اق, كاسىبي مەرەكەمەن ونەر ۇجىمىن «نۇر وتان» پارتياسى جەزقازعان قالالىق فيليالى توراعاسىنىڭ ءبىرىنشى ورىنباسارى گۇلميرا قاجەنوۆا, مادەنيەت, سپورت جانە اقپارات قىزمەتكەرلەرى سالالىق كاسىپوداعى قاراعاندى وبلىستىق فيليالىنىڭ جەتەكشىسى ءسابيرا بەكايداروۆا, جەزقازعان تاريحي-ارحەولوگيالىق مۋزەيىنىڭ باسشىسى راۋشان قاپاروۆا, قالالىق «قازاق ءتىلى» قوعامىنىڭ توراعاسى مەيرامكۇل جولداسبەكقىزى, جەزقازعان مۋزىكالىق كوللەدجىنىڭ باسشىسى جۇمات امانبەكوۆ, باسقا دا مەكەمە, ۇجىم باسشىلارى, كاسىپكەرلەر قۇتتىقتاپ, سىي-سىياپات جاسادى.
مەرەكەلىك كەش ەلوردادان ارنايى كەلگەن ونەر جۇلدىزدارى قايىرگەلدى وماربەك, ماقپال وماروۆا, قارلىعاش ابباسوۆا, بەرىك ەرجانوۆتىڭ ءان شاشۋىنا ۇلاستى. مەرەكەلىك كەشكە جينالعان قاۋىم سالتاناتتى شارادا اسقان كاسىبيلىكتىڭ كۋاسى بولىپ, كوتەرىڭكى كوڭىل-كۇيمەن تارقاستى.
دارحان مۇقان
قاراعاندى وبلىسى
جەزقازعان
