گراۆيۋرانى ادەتتە قاتتى زاتتاردىڭ بەتىنە (ول مەتالل, اعاش نەمەسە تاس بولۋى مۇمكىن) سالادى. سودان كەيىن ونىڭ بەتىنە بوياۋ جاعىپ, باسۋ ارقىلى بىرنەشە ءتۇرىن الادى. ايگىلى گوللاندىق سۋرەتشى رەمبراندتتىڭ ءدال وسىنداي ءادىسپەن سالىنعان «كرەستەن ءتۇسىرىپ الۋ» كارتيناسى مۇراجايدىڭ گرافيكاعا ارنالعان زالىنىڭ تورىندە تۇر.
جالپى, حVII-XVIII عاسىرلاردا ەۋروپالىق سۋرەتشىلەر تاۋراتتىق تاقىرىپتارعا, ءىنجىلدەگى وقيعالارعا ارنالعان سۋرەتتەردى كوپتەپ سالعانى بەلگىلى. اسىرەسە, يسا پايعامباردى كرەستەن شەشىپ الۋ سياقتى ساتتەردى كوپتەپ بەينەلەگەن. سونداي-اق, گرەك اڭىزدارىنا بويلاپ, امۋر, زەۆس قۇدايلارىن كەيىپتەگەن. بۇل رەتتە رەمبراندت حارمەنس ۆان رەيننىڭ كارتيناسىن يتاليالىق جۇمىستارمەن سالىستىرۋعا بولادى. ماسەلەن, گوللاندىق قىلقالام شەبەرىنىڭ تۋىندىسىندا يسانىڭ ءالسىز حالدەگى كۇيى بەينەلەنسە, يتاليالىق سۋرەتشىلەر يسانى بارلىق كۇش-قۋاتىن كورسەتە وتىرىپ بەينەلەيدى. ياعني, رەمبراندت وقيعانى شىنايى بەينەلەۋىمەن, ادامداردىڭ جۇزىندەگى مۇڭ, قايعى-قاسىرەت تابىن جەتكىزە ءبىلۋىمەن, ءتىپتى, ويسىزدىقتى, نەمقۇرايدىلىقتى, سۇلەسوقتىقتى دا ايتا بىلۋىمەن العا وزادى. كارتينادا ءتىپتى, اسپاننان بوزعىلتىم ساۋلەنىڭ ءتۇسىپ تۇرعانىن كورۋگە بولادى. وسى ءبىر XVII عاسىرعا (1633 جىلى سالىنعان) تيەسىلى كارتيناعا قاراپ وتىرىپ, سول زامانداعى شىنايىلىقتى جازا العان رەمبراندتتىڭ شەبەرلىگىنە ءتانتى بولاسىز.
− يسانى كرەستەن ءتۇسىرىپ الۋ وتە كەڭ تاراعان تاقىرىپ. بۇل تۋىندىنى بىزگە ءبىراز جىلدار بۇرىن رەسەيدىڭ ايگىلى ا.پۋشكين اتىنداعى بەينەلەۋ ونەرى مۋزەيى سىيعا بەرگەن بولاتىن. جالپى, گراۆيۋرانىڭ كەسكىندەمە نەمەسە جاي تۋىندىدان ەرەكشەلىگى, ءبىر گراۆيۋرانىڭ بىرنەشە كوشىرمەسىن عانا جاساۋعا بولادى. ياعني, العاشقى ءۇش-ءتورت كوشىرمەسى انىعىراق شىعاتىندىقتان وتە قۇندى, ءتۇپنۇسقا سانالادى. ال قالعان نۇسقالارىنىڭ بوياۋى تەز وڭىپ كەتەدى. سوندىقتان رەمبراندتتىڭ بۇل تۋىندىسى العاشقى تۇپنۇسقاعا جاتاتىن وتە قىمبات ءجادىگەرلەردىڭ ءبىرى, − دەيدى مۋزەي قىزمەتكەرى گۇلجان جاكەەۆا.
دۋمان اناش,
«ەگەمەن قازاقستان»
سەمەي
