ويتكەنى, ەكەۋى دە ءبىر اتتاساڭ جاردان قۇلاتاتىن دۇنيەاۋي شارىقتاۋ مەن شامىرقانۋدىڭ قوس قيىرىندا تۇر. سوندىقتان, «التىن بەلورتا» ءبىر قيىردان كەلەسى قيىرعا شيىرلاپ, ورتابەلدەگى ورنىقتى باعدارىن انىقتاي الماي, «ارتىق قىلامىن دەپ تىرتىق قىلاتىندارعا» تاربيە بەرىپ, تاۋبەسىنە كەلتىرەتىن ۇعىم. بۇگىندە ەكى داۋىردە ءومىر ءسۇرىپ, ءبىر-بىرىنە قايشى كەلەتىن قوس قوعامنىڭ وزىنە عانا ءتان قۇندىلىقتارىن ساناسىندا ساپىرىلىستىرعان, اقىرىندا ادامي ىزگىلىكتىڭ التىن قازىعىن انىقتاي الماي جۇرگەن ءبىزدىڭ ءبازبىر زامانداستارعا ساباق بولاتىن پالساپالىق سالا.
ميحايل بۋلگاكوۆتىڭ ايگىلى «شەبەر مەن مارگاريتا» شىعارماسىنداعى ماسكەۋدىڭ ادەبيەتشىلەر قاۋىمداستىعىنىڭ توراعاسى, اتەيست بەرليوزدىڭ ىبىلىسپەن ىلىنىسكەن ءساتى ەسكە تۇسەدى. جاراتقاندى جوققا شىعارامىن دەپ باسىنان ايىرىلعان بەيباقتىڭ بەيشارا تاعدىرى سول زامانداعى بارشا قوعامعا ءتان قۇبىلىس ەدى. ايتتى نە, ايتپادى نە, اتەيزم ءبىزدى ون سەگىز مىڭ عالامدى جاراتۋشى اللا تاعالادان الشاقتاتتى. قۇدايعا ءتىل تيگىزدىرىپ, رۋحاني قۇلدىراۋدىڭ شەگىنە سۇيرەدى. ءسويتىپ, قوس جانارداعى يماننىڭ نۇرىن, جۇرەكتەگى مەيىرىمنىڭ شۇعىلاسىن ءوشىردى. قازادا ستاقان قاعىستىرىپ, كور باسىندا ۇلكەننىڭ جاعاسىنا جارماساتىن يمانسىز ۇرپاق ءوستى. بۇل ءبىر قيىردىڭ شەگى ەدى.
اراعا ۋاقىت سالىپ اللانىڭ راحىمى, قۇدايدىڭ قۇدىرەتىمەن بەيادەپ قوعامنىڭ ورنىنا ازاتتىقتىڭ ارايلى تاڭىمەن بىرگە جاڭا جارىلقاپ زامان كەلدى. ءبارىمىز جاراتقانمەن قاۋىشقان, يمانىڭمەن دوستاسقان مەيىرلى ءداۋىردى كورىپ, مارە-سارە بولدىق. جاستارىمىز جاپپاي ساجدەگە جىعىلدى. اق داستارقان باسىنان ارام سۋسىندار الىنىپ, ادال اسقا ورىن ءتيدى. قۇدايىن ۇمىتىپ قۇتىرعاندار تاۋبەسىنە كەلدى. وسىلايشا, قۋانىشتان بوركىمىزدى اسپانعا لاقتىرىپ الىپ, ونى قايتا قاعىپ الۋ قاجەتتىگىن قاپەرگە الماپپىز. كەلە-كەلە ءدىننىڭ قاعيداتى وسى ەكەن دەپ, ۇلتتىق تامىردى ۇمىتقان, اتا سالتىمنان اھيدام جاقىن, بابا جولىنان مازھابىم ارتىق دەيتىن تاعى ءبىر اداسقان ۇرپاق ءوستى. بۇل كەلەسى قيىردىڭ شەتى ەدى.
ومىردەن مىسال كەلتىرسەك. ءبىر تانىسىمىز كەزىندە جاستىقتىڭ بۋىمەن اششى سۋدى اياماي ءسىمىرۋشى ەدى. ءتۇبى كورىنبەيتىن كوك شولمەكتى جاستانىپ جاتىپ, ىشكىلىكتىڭ شەگىنە جەتۋگە تاياعان-تىن. ۇيىنەن بەرەكە كەتىپ, شاڭىراعى شايقالۋعا شاق قالعان جولداسىمىزدى اكە-كوكەلەپ ءجۇرىپ, يماندىلىقتىڭ جولىنا باعىتتاۋعا تىرىستىق. ەرىك-جىگەرىن بويىنا جيناعان ول اۋەلى ورازا ۇستادى, سوڭىنان نامازعا جىعىلدى. ءبارىمىز قۋاندىق. الايدا, اراعا ۋاقىت سالىپ الگى تانىسىمىز تاعى دا كەلەسى قيىردان ءبىر-اق شىقتى. شاريعاتتىڭ بارشا شارتىنان جاڭىلىسپاس ءۇشىن بالا-شاعاسىنىڭ نان-پ ۇلىن ايىرىپ وتىرعان جۇمىسىن ءبىرجولاتا قويدى. ءدىني ءفاناتيزمنىڭ قۇربانىنا اينالىپ, ءداستۇردىڭ ءبارىن جىن-شايتان كورىپ, جالپى, قوعامعا جيھاد جاريالاپ, قارۋ اسىنىپ جاھاندىق سوعىسقا اتتانعىسى كەلدى...
بۇل تۇستا مىنا ءبىر ءتامسىل ەسكە تۇسەدى. اللاعا دەگەن قۇلشىلىعىنان راحماننىڭ ىزگىلىك لەبى ەسىپ تۇراتىن شاپاعاتى ەرەك سۇيىكتى پايعامبارىمىز مۇحاممەدتىڭ (ع.س.) ءاربىر ءىس-ارەكەتى مەن ءجۇرىس-تۇرىسىن قايتالاعىسى كەلەتىن مۇمىندەردىڭ سول زاماندا كوپ بولعانى بەلگىلى. اللانىڭ راسۋلى ءبىر كۇنى ادەتتەگىدەي مەشىتكە كىرگەندە ىشىندە ەكى اعاشقا كەرىپ تارتىلعان ارقاندى كورەدى. مۇنىڭ ءمانىسىن ساحابالارىنان سۇراعاندا, ولار زەينەپ انامىزدىڭ كۇندىز-ءتۇنى ۇزدىكسىز قۇلشىلىق جاساپ, قاتتى قالجىراعان ساتتە قۇلاپ قالماۋى ءۇشىن ادەيى تارتقىزعانىن ايتادى. سوندا پايعامبار جانىنداعىلاردان ارقاندى شەشۋدى ءوتىنىپ, ءاربىر ادام شەكتەن شىقپاي, شاماسىنا قاراي قۇلشىلىق جاساۋ قاجەت ەكەنىن وسيەت ەتىپتى. تاعى بىردە پايعامبارىمىز ءدىن جولىندا اسىرا كىنامشىلدىك پەن شەكتەن تىس قاتالدىق تانىتقانداردىڭ اقىرى بولمايتىنىن ايتىپ, سەندەرگە دەيىنگىلەر دە شەكتەن تىس سەنىمنىڭ قۇربانى بولدى دەپ ەسكەرتىپتى. اللا ەلشىسىنىڭ ىزگىلىكتى جولىن جالعاستىرعان يمام قازىرەتى ءالى: «بەلورتا جولدى ۇستانىڭدار, ارتتا قالىپ قويعاندار دا جانە العا وزىپ كەتكەندەر دە بۇل جولعا ءتۇسۋدى مۇرات ەتەدى» دەگەن ەكەن.
بۇگىنگى بەرەكەلى دە بەيبىت زاماندى كورىپ, بەرليوزدار اڭساعان اتەيستىك, قۇدايسىز, قۇنسىز قوعامنان ەندى ءبىزدى اللا تاعالا ساقتاسىن دەيسىڭ. بىراق جاراتقان يەمىز بىزگە انا قۇرساعىندا جاتقاندا جان ءبىتىرىپ, جارىق دۇنيەنى كورسەتىپ, تىرشىلىك ەتۋدى ءناسىپ ەتكەندە, ەڭ اۋەلى, دۇنيەگە ۇرپاق اكەل, ولاردى ءوسىرىپ, جەتكىز, ءبىلىم بەر, يماندىلىققا تاربيەلە, وتباسىڭدى ادال ەڭبەگىمەن اسىرا, وتانىڭا قالتقىسىز قىزمەت ەت دەگەن ماڭىزدى ميسسياسىن بەلگىلەگەن شىعار دەپ ويلايمىز. زامانداستارىمىز ءبىز ايتىپ وتىرعان «التىن بەلورتانى» وسى توڭىرەكتەن ىزدەسە ەكەن دەگەن نيەت باسىم.
قۋات بوراش,
جۋرناليست-پۋبليتسيست
