ايتالىق تەرىس نە وڭ جۇرسە دە ۇنەمى جولى بولعىش ادام ءوزىن باقىتتىمىن دەپ سەزىنەدى. ەندى بىرەۋ استا-توك بايلىقتى باقىت سانايدى. نەمەسە تاماعى توق, كويلەگى كوك قوڭىرقاي ءومىر سۇرسە دە بارىنا ريزاشىلىقپەن قاراپ, ءوزىن باقىتتى سەزىنەدى.
وسىناۋ ويعا زەر سالساق, مىنا تۇسىنىكتەردىڭ ءبارىنىڭ دە ەكىنشى ارعى جاعى بار. ماسەلەن, «اسا بايلىق نە كەرەك, دەن ساۋ بولسا بولماي ما» دەپ ساناعان اتام قازاق اسا بايلىقتى ءبىر جۋعاندا كەتىپ قالار قولدىڭ كىرى دەپ ەسەپتەسە, جولى بولعىش ادام ادال نيەتپەن جۇرمەسە, ءبىر كۇن بولماسا, ءبىر كۇنى تۇسالاتىنى ءسوزسىز. ال بارعا قاناعات تۇتىپ, جايىمەن ەڭبەگىنىڭ جەمىسىن جەپ, ەشكىمنىڭ الا ءجىبىن اتتاماي تىنىش ءومىر سۇرگەن ادام, سول قاناعاتىنىڭ راحىمىن كورە الادى دەپ ويلايمىن.
وسى ويىمىزعا ءومىر جولى مەن تىندىرعان ىستەرى تولىق دالەل بولا الاتىنداي جاندار ارامىزدا از ەمەس. سولاردىڭ ءبىرى رەتىندە ەسىمى اتىراۋ مەن ماڭعىستاۋ وبلىسىنا عانا ەمەس, ءوزى ءجۇرىپ وتكەن, ەڭبەك ەتكەن قالالار مەن وڭىرلەرگە كەڭىنەن تانىمال مۇناي ءوندىرۋ ءىسىنىڭ مايتالمانى ناسىپقالي ماراباەۆتىڭ ومىرلىك جارى ءلايلا وقانقىزى ماراباەۆا دەر ەدىم.
سوعىستان كەيىنگى قايتا قالپىنا كەلتىرۋ كەزەڭىندە (50-جىلداردا) ەل-جۇرت ەندى-ەندى ەس جيا باستاعان شاقتا سەمەي قالاسىندا تەحنيكۋمدى ءۇزدىك ءبىتىرىپ, ماسكەۋدەگى تەحنولوگيالىق ينستيتۋتقا جولداما العان تالدىرماش دەنەلى جاس قىز ءلايلا وقانقىزىنىڭ الدىندا توقسان تولعاۋ, تولعان ارمان تۇردى.
جاس تا بولسا سانالى قىز ەڭ الدىمەن ەلىمە دە, وزىمە دە پايدالى ماماندىقتىڭ يەسى بولىپ, ەسەلى ەڭبەك ەتىپ كوزگە تۇسسەم, ءوز قاتارىمنىڭ الدى بولسام, ءسويتىپ انامدى كەشىپ ءجۇرگەن قيىندىقتاردان قۇتقارسام, سوڭىمنان ەرگەن باۋىر-سىڭلىلەرىمە قامقورلىق جاساپ, ولاردى دا وقىتسام دەپ تە تولعانادى. بىراق قول قىسقا. اسقار تاۋداي اكەسى دۇنيە سالعان. اناسىنىڭ تابىسى وتباسىنىڭ قاجەتىنە جەتەر-جەتپەس. ءلايلا وسى جولى ماسكەۋگە وقۋعا بارا المايمىن دەپ مۇڭايىپ جۇرگەندە قايران قامقورشى انا ءشالىسىن, تاعى باسقا كيىم-كەشەگىن ساتىپ, قاراجات تاۋىپ, جول ازىعىن دا دايىنداپ, قىزىن ءماسكەۋگە اتتاندىرادى. ول كەزدە پويىز 5-6 قالادان ءوتىپ ءبىر اپتا ءجۇرىپ باراتىن ەدى. تالانتتى قىز جول ازابىن تارتسا دا وقيتىن جەرىن تاپتى-اۋ ايتەۋىر. كەڭەستىك ءداۋىردىڭ سول كەزدە جاستارعا ءبىلىم بەرۋدەگى جاساعان قامقورلىعىنىڭ ءبىرى – ستۋدەنتتەر اسحاناسىندا نان مەن ءشاي عانا تەگىن بەرىلەتىن, اشقۇرساق, ارتىنان كەلەر كومەگى جوق ستۋدەنتتەرگە بۇل ۇلكەن كومەك ەدى. بار زەيىنىن وقۋعا اۋدارعان ءلايلا ۇزدىك وقىپ, جوعارى وقۋ اقىسىنا (ستيپەنديا) قول جەتكىزدى, ءتىپتى 2-3 كۋرستا فاكۋلتەتتىڭ ماقتانىشىنا اينالدى.
تۋعان جەردەن الىستا اتا-اناسىن, تۋىس-باۋىرلارىن ساعىنعان قازاق جاستارى الدەقالاي قاراكوز قانداستارىن كەزدەستىرە قالسا, تانىسىپ, ءبىلىسىپ, ارالاسىپ جۇرەتىن. بۇل ادەت كۇنى-بۇگىنگە دەيىن جالعاسىپ كەلەدى. قازىرگى كەزدە دە انگليا, شوتلانديا, شۆەيتساريا, امەريكادا وقيتىن قازاق جاستارى ناۋرىز, ورازا ايت, قۇربان ايت جانە باسقا ەلىمىزدىڭ ايتۋلى مەرەكەلەرىندە باس قوسىپ تويلايتىنىن ەستىپ ءجۇرمىز, اۋەلى, ناۋرىز كوجە, شەلپەك جاساپ, اتا-بابا ءداستۇرىن جالعاستىرا الاتىنى, ولاردىڭ جۇرەگىندە ۇلتتىق سەزىم مەن سانانىڭ بارىنا قۋانۋعا بولادى. وسى ءداستۇر سول 50-ءشى, ودان ارعى جىلدارداعى ءماسكەۋدە وقيتىن جاستاردان باستاۋ الماسىنا كىم كەپىل؟
1957 جىلى ماسكەۋدەگى گۋبكين اتىنداعى ينستيتۋتتا گۋرەۆتەن (اتىراۋدان) بارىپ وقىپ جۇرگەن جەتى جىگىت قازاق جاستارىن جيناپ كەش ۇيىمداستىرادى. سول كەشكە تەحنولوگيالىق ينستيتۋتتان ءلايلا وقانقىزى قۇربىلارى روزا شامسۋدينوۆا جانە حابيبا اقشولاقوۆامەن بىرگە قاتىسادى. جاستار كەشتىڭ بارلىق دايىندىعىن ءوزدەرى ۇيىمداستىرادى, اتاپ ايتقاندا, اس ءمازىرىنەن باستاپ, ءان مەن كۇي, بي, ءتۇرلى ويىن-ساۋىق دەيسىڭ بە, ايانارى جوق, بار ونەرلەرىن سالادى. جىگىتتەردىڭ اراسىنان وسى كەشتىڭ اساباسى, كۇيشىسى ناسىپقالي ماراباەۆ كوزگە تۇسەدى. ءلايلا بولسا تاماق ازىرلەۋ جاعىنان ماقتاۋعا يە بولادى. مىنە, وسى كەش ءناسىپقالي مەن ءلايلانىڭ تانىستىعىنا دا, كەيىننەن تابىسۋىنا دا سەبەپشى بولادى. بۇلار 1958 جىلى سول ماسكەۋدە ستۋدەنتتىك توي جاساپ, وتباسىن قۇرادى. ەكەۋىنىڭ جالداعان قۋىقتاي بولمەسىنەن دوستارى ءۇزىلمەيتىن ەدى. ءلايلا ەكىقابات كەزىندە دە, ەمتيحان كەزىندە دە قاباق شىتپاي دوستارىن قابىلداۋدان جالىقپايدى. تۇڭعىش ۇلى ەرمەك ماراباەۆ 1959 جىلى جەلتوقسان ايىندا ماسكەۋدە ءدۇنيەگە كەلەدى. ءلايلانىڭ اقپەيىل نيەتى مەن اشىق قاباعىنا ريزا بولعان دوستارى ناسىپقالي ءبىر جىل بۇرىن وقۋ ءبىتىرىپ, بۇرعىلاۋ ينجەنەرى ماماندىعىن الىپ, ەلگە ورالعاندا جاس بالامەن وقۋىن جالعاستىرىپ جۇرگەن لايلاعا دەگەن كومەگى زور بولعانىن اسقان ريزاشىلىقپەن ەسكە الادى.
ءلايلا وقانقىزى دا تەحنولوگ-ينجەنەر ماماندىعى بويىنشا ديپلوم قولىنا تيگەن سوڭ گۋرەۆ (اتىراۋ) ەت كومبيناتىنا جولدامامەن ورالادى. جاس ماماندى بۇعان دەيىن بىردە-ءبىر جوعارى ءبىلىمدى مامان بولماعان ەت كومبيناتى شۇجىق تسەحىنىڭ باستىعى ەتىپ قويادى. بىراق, الدىنان شىققان ءبىر قيىندىق – ىستاۋ تسەحىنىڭ اتى بار دا زاتى جوق, ياعني شۇجىق ازىرلەيتىن جابدىقتار جوقتىڭ قاسى. ەكىنشى قيىندىق – قا-
يىناتاسى ابۋعالي اقساقال بۇعان دەيىن ءۇش ادام سوتتالعان بۇل تسەحتا كەلىنىنىڭ جۇمىس ىستەۋىنە قارسى بولادى. بىراق, ول ءۇلكەن كىسىگە جاعدايدى ءتۇسىندىرىپ, العان بەتىنەن قايتپادى.
لايلاعا الدىمەن تسەحتى جابدىقتاۋ جانە وڭدەۋ ىسىمەن اينالىسۋعا تۋرا كەلدى. وعان قاجەتتى جابدىقتاردى قامتاماسىز ەتۋ وڭايعا تۇسكەن جوق. الايدا, جاس مامان بارىنشا تاباندىلىق تانىتىپ دەگەنىنە جەتتى. كوپ ۇزاماي ءبىلىمدى ماماننىڭ جولعا قويىلعان ءىسىنىڭ ءناتيجەسى ءساتتى شىعىپ, قالا حالقى تاڭدايعا تاتىعان شۇجىققا قارق بولدى. ءوزىنىڭ ءبىلىمدى مامان ەكەندىگىمەن ءارى ىسكەر ەڭبەكقورلىعىمەن تانىلعان ءلايلا ماراباەۆا كوپ ۇزاماي كومبيناتتىڭ باس تەحنولوگى قىزمەتىنە جوعارىلاتىلادى. بۇل جۇمىستا ول وسىعان دەيىن كومبيناتتا شەشىمى تابىلماعان ءبىراز شارۋالاردىڭ باسىن قايىردى. قاشان دا ايانباي ەتكەن ەڭبەكتىڭ ناتيجەسى كورىنبەي قالمايدى عوي, ىسكەرلىگىمەن كوزگە تۇسكەن ءلايلا قالالىق كەڭەستىڭ دەپۋتاتتىعىنا سايلاندى. بۇل مىندەت قوعامدىق نەگىزدە بولعانىمەن, جاس مامان ايەلدەر ەڭبەگىن قورعاۋ كوميسسياسىنىڭ ءتورايىمى رەتىندە كوپ جۇمىس اتقاردى. سونىڭ ءبىرى ايەلدەردى اۋىر جۇمىستان قۇتقارۋمەن قاتار, جۇمىسسىز ايەلدەردى ەڭبەككە ورنالاستىرۋ ىسىندە ءبىراز ناتيجەگە قول جەتكىزدى.
قىزمەتتە, قوعامدىق جۇمىستا وسىنشالىق تابىسقا جەتكەن لايلاعا كەلىن رەتىندەگى سىننان ءوتۋ دە وڭايعا تۇسپەدى. ول ءبىر وتباسىنداعى 16 ادامدى تاماقتاندىرۋ, تازالىققا باس-كوز بولۋ, ءبارىنىڭ كوڭىلىن تابۋ سىنىنان دا مۇدىرمەي وتكەندەي.
ءلايلادان ءبىر جىل بۇرىن گۋبكين اتىنداعى ينستيتۋتتى ۇزدىك ءبىتىرىپ, بۇرعىلاۋ ينجەنەرى ماماندىعىمەن ەلگە ورالعان جۇبايى ناسىپقالي ماراباەۆ العاش ەڭبەك جولىن قۇلسارىدا ۇڭعىلاردى كۇردەلى جوندەۋ تسەحىندا بۇرعىشىلىقتان باستاعان. جەر استى جابدىقتارى تەز-تەز ءىستەن شىعىپ جاتادى. ونى قول كۇشى, قايراتى بار ادامدار قۇبىردى ۇڭعىدان كوتەرىپ شىعارىپ ءجوندەۋى قاجەت. وسى ىستە ءوندىرىس شەبەرى ناسىپقالي ايانباي ەڭبەك ەتىپ, ءىسكەرلىگىمەن اۋىزعا ءىلىندى. سونىڭ ءناتيجەسىندە ءبىر جىلدىڭ ىشىندە پروربا كەنىشىنە اۋىسىپ, اعا ينجەنەرلىككە قول جەتكىزدى.
لايلاعا دا جاس بالاسىمەن پرورباداعى بۇرعىلاۋ مەكەمەسىنىڭ بارلاۋشى اۋىلىنا بارۋىنا تۋرا كەلدى. ەندى باسقا دا مۇنايشىلار سياقتى جارتىسى جەردەن قازىلعان, جارتىسىنا تاس, نە قامىس قالانعان, توبەسى يتارقالانىپ جابىلعان جەرتولەدە (باراكتا) تۇراتىن بولدى. ورتاعا قويىلعان پەشپەن ءۇي جىلىتايىن دەسە, وتىن جوق, جاڭبىر جاۋسا, توبەدەن تامشى سورعالايدى, كۇنىنە مولشەرمەن بەرىلەتىن ەكى شەلەك تاسىمالى سۋ دا كۇندەلىكتى تۇرمىس تىرلىگىنە جەتكىلىكسىز. بىراق, وتباسى جاۋاپكەرشىلىگىن ارقالاعان, ءسۇيگەنىنىڭ ومىرىمەن ءومىر ءسۇرۋدى باقىت ساناعان ءلايلا وسىناۋ جەرتولەنىڭ ءوزىن كەڭ سارايداي ساناپ, ناسىپقالي 70 شاقىرىم جەردەگى بۇرعىلاۋ بازاسىنان كەلگەندە ەشبىر قيىندىق سەزبەگەندەي قۋانا قارسى الىپ, جۇبايىنىڭ شارشاعانىن بىلدىرتپەي ءجىبەرەتىنىن قايتەرسىز.
بىرتە-بىرتە سارىقامىستاعى مۇنايشىلار اۋىلى دا ۇلعايا ءتۇستى. بۇلار جەرتولەدەن ەكى بولمەلى جايلى ۇيگە ورنالاستى. بۇل كەزدە دۇنيەگە ەكىنشى ۇلى جاقىپ كەلگەن ەدى. بالا ازداپ ەسەيىپ, اياعىن اپىل-تاپىل باسقان كەزدە لايلانىڭ ەڭبەككە ارالاسقىسى كەلدى. ءوزى سياقتى بالالارى قولبايلاۋ بولىپ جۇمىسسىز قاراپ وتىرعان ايەلدەر كوپ ەدى. ايەلدەرگە جۇمىس ىستەيمىن دەسە, اينالىساتىن شارۋالار جەتىپ-ارتىلادى. بۇل جاعدايدىڭ ءبارىن وي ەلەگىنەن وتكىزگەن ءلايلا وقانقىزى قۇلسارىداعى باسقارما باستىعىنا بارىپ, پوسەلكەدە بالالار باقشاسىن اشىپ, ايەلدەردى جۇمىسپەن قامتۋ ماسەلەسىن قويدى. باستىق بۇل ويدىڭ جاقسى ەكەنىن, بىراق باقشاعا لايىقتى ءۇي جوعىن العا تارتتى. الايدا, قولعا السا, شەشىمىن تاپپايتىن ءىس جوعىن جاقسى ءبىلەتىن ءلايلا وقانقىزى تەك ءۇي تۇرعىزۋعا قاجەتتى ماتەريال بولسا, قالعانىن ءوزى ۇيىمداستىراتىنىن ايتىپ, كەلىسىمىن الدى. ءبىر جىلدىڭ اينالاسىندا باقشا ءۇيىنىڭ جوسپارلاۋىنان باستاپ, سالىنىپ بىتكەنشە باسى-قاسىندا ۇيىمداستىرۋمەن ءجۇردى دە. جاڭا وقۋ جىلىنىڭ باستالۋ مەرزىمىنە وراي بالاباقشا اشىپ, دەگەنىنە جەتتى, ءوزى باقشانىڭ مەڭگەرۋشىلىگىنە تاعايىندالدى.
ءلايلا بالاباقشانىڭ ءۇيى بىتكەنشە قايتا-قايتا قۇلسارىعا بارىپ, باقشانىڭ ءتاربيە جۇمىستارىمەن تانىسىپ, قاجەتتى ءادىسكەرلىك ادەبيەتتەردى قامتاماسىز ەتىپ, ءتاربيەشىلەر ازىرلەپ تىنىم تاپپادى.
ءلايلا سودان جۇبايى وزەن بۇرعىلاۋ جۇمىستارى بۇرعىلاۋ باسقارماسىنىڭ باستىعى بولىپ اۋىسقانعا دەيىن مەكتەپكە دەيىنگى تاربيە سالاسىن دامىتۋعا ەڭبەك ەتتى, قالالىق جاڭا جوباداعى ەكى بالاباقشانىڭ تۇساۋىن كەستى.
ناسىپقالي ماراباەۆتىڭ سوناۋ 1958 جىلدان العاشقى بۇرعىلاۋ ۇنعىسىنىڭ قۇبىرىن جوندەۋدەن باستالعان مۇناي ءوندىرۋ سالاسىنداعى تەر توگە ءجۇرىپ اعا ينجەنەرلىكتەن باس ينجەنەرلىككە, ودان مۇناي-گاز باسقارماسىنىڭ باستىعى بولعانعا دەيىنگى كەزەڭدە اۋىرتپالىقتار مەن قيىندىقتاردى بىرگە كوتەرىسكەن سەنىمدى قامقورشىسى بولعان ءلايلا وقانقىزىنىڭ ەڭبەگى زور.
ناسىپقالي ماراباەۆتىڭ وزەن بۇرعىلاۋ جۇمىستارى باسقارماسىن باسقارعان كەزدەگى وتە كۇردەلى كەن ورنىن يگەرۋدى ۇيىمداستىرۋدان باستاپ, بۇرعىشىلاردىڭ الەۋمەتتىك جاعدايىن جاقسارتۋعا دەيىنگى الاپات ىستەرى ءوز الدىنا بولەك ءاڭگىمە. ءويتكەنى, كۇنى بۇگىنگە دەيىنگى ناسىپقالي ماراباەۆتىڭ ءبىلىكتىلىگى مەن ىسكەرلىگى ۇيىمداستىرۋ شەبەرلىگى جايىندا ەل اۋزىندا «مۇنايشى بولساڭ ماراباەۆتاي بول, باستىق بولساڭ ناسىپقاليداي حالىققا جاقىن بول», دەگەن ماقتاۋلى باعا جاتتالىپ قالعان.
ءبىر جاعىنان ەڭبەك كورىگىندە شىڭدالىپ قالىپتاسقان ناسىپقالي ماراباەۆتىڭ تۇرمىس-تىرشىلىگىنە ەش الاڭداماي, بالا ءتاربيەسىندە قينالماي الاڭسىز جۇمىس ىستەۋىنە كوبىنە ءلايلا وقانقىزىنىڭ ءرولى زور ەكەنى بايقالادى. ءومىر بويى قىزۋ ەڭبەكپەن اتاق-داڭققا بولەنگەن, ءتىپتى قۇرمەتتى دەمالىس كەزىندە دە وبلىس اكىمى قىرىمبەك كوشەرباەۆ مۇناي ءوندىرىسىنىڭ مايتالمان مامانى, ەلدىڭ, جەردىڭ جاعدايىن جاقسى بىلەتىن ارداگەر ازاماتتى وزىنە اقىلمان ەتىپ الىپ ەدى. ناسىپقالي ماراباەۆ مۇناي ولكەسىنىڭ تاريحىن ەل ەسىندە ساقتاۋ ماقساتىمەن ەنتسيكلوپەديا شىعارۋ ءىسىن ۇيىمداستىردى, سونداي-اق مۇناي قورىن قۇرىپ, ونىڭ توراعاسى بولدى.
ءلايلا وقانقىزىنىڭ بايسالدى ءمىنەزى مەن اقىل-پاراساتى وتباسىنىڭ بەرەكە-بىرلىگى مەن بالا تاربيەسىندە انىق بايقالدى. ەرمەك پەن جاقىپ, ودان كەيىنگى سۆەتا مەن ساۋلە دە مەكتەپتى ءۇزدىك ءبىتىرىپ, اكە جولىن قۋىپ, ماسكەۋدەگى گۋبكين اتىنداعى ينستيتۋتتان مۇناي سالاسىنىڭ ماماندىعىن الدى. ءوز ءبىلىمدەرىن ودان ءارى انگليا, شوتلانديا ەلدەرىنە بارىپ تولىقتىرا ءتۇستى.
ەرمەك پەن جاقىپ ماراباەۆتار اكەسىنىڭ باس ينجەنەر, باسقارما باستىعى بولعان جاسىندا مۇناي ءوندىرىسىنىڭ بەدەلدى مامانى, ۇلكەن باسشىلارى بولىپ, اكە داڭقىن اسىردى. ال ناسىپقالي ماراباەۆتىڭ نەمەرەلەرى بوتاكوز, نۇرجان, ءلايلا شەت ەلدەردە ءبىلىم الىپ, ۋاقىت تالابىنا ساي ەڭبەك ەتىپ, ءلايلا وقانقىزىن شوبەرەمەن قۋانتىپ ءجۇر. وسىدان بىرەر جىل بۇرىن ءلايلا وقانقىزى باس بولىپ, بالالارى قوستاپ, الاتاۋدىڭ باۋرايىنداعى جىلقى كلۋبى, ورنالاسقان جەردە ءۇش, بەس, جەتى جاسار ءۇش شوبەرەسىنىڭ سۇندەت تويىن وتكىزدى. بۇل قۋانىشتىڭ ءبىر ەرەكشەلىگى, سابيلەردىڭ بويىنا ۇلتتىق ءداستۇر مەن سانانى بەكەم ءسىڭىرۋ ماقساتى بولار, جۇرتشىلىق قازاقتىڭ قىز قۋ, تەڭگە الۋ, اتقا مىنگىزۋ, ات جارىس سياقتى ويىن-ساۋىقتاردى قىزىقتادى. وسىنىڭ ءوزى بۇل وتباسىنىڭ بالا ءتاربيەسىنە ەرەكشە ءمان بەرەتىنىنىڭ ايعاعىنداي.
ءيا, ءومىر-وزەن العا جىلجي بەرەدى. جايىقتا دۇنيەگە كەلىپ, بىلىكتى مامان رەتىندە ۇستىرتتە ەڭبەك ەتىپ, ماڭعىستاۋ وبلىستىق اتقارۋ كوميتەتىنىڭ توراعاسى بولىپ, وبلىستى مۇنايلى وڭىردە زور ەڭبەك سىڭىرگەن, قازىنالى تۇبەك وبلىسقا اينالعاندا باسقارۋعا قاتىسقان اتاقتى مۇنايشى ناسىپقالي ماراباەۆ 2007 جىلى تۋعان جەرىندە ماڭگىلىك ورىن تەپتى. بۇل قازا سۇيىكتى جارى ءلايلا وقانقىزىنا دا, اسقار تاۋداي ايگىلى اكەدەن ونەگە العان بالالارى مەن نەمەرەلەرىنە, ول ازاماتتى جاقسى ءبىلەتىن جاندارعا وڭاي سوققان جوق. ەسىل ازاماتتى ەستە ساقتاۋ شارالارى جۇزەگە اسىرىلىپ, باقيلىق كەزەڭدەگى ەكىنشى ءومىرى جالعاسىن تاپتى.
ءلايلا وقانقىزى جارتى عاسىردان استام ءوزىن جانىنداي جاقسى كورگەن جۇبايىمەن باقىتتى ءومىر ءسۇردى. ەلەۋلى ەڭبەگىمەن سىي-قۇرمەتكە يە بولدى. ماقتاۋلى ۇل-قىزعا انا بولۋ باقىتىنا بولەندى. الدى جوعارى ءبىلىمدى, ءتاربيەلى نەمەرەلەرىنىڭ دە, ءشۇپىرلەگەن شوبەرەلەردىڭ دە قىزىعىنا تويماي وتىرعان باقىتتى اجە. وسىنىڭ ءبارى جينالىپ كەلگەندە ءلايلا وقانقىزى ءۇشىن كول-كوسىر ايەلدىك باقىت ەمەس پە؟
بۇگىندە سەكسەننىڭ سەڭگىرىنە شىعىپ وتىرعان ءلايلا وقانقىزى ماراباەۆاعا وسى باقىتىڭىز جالعاستى بولسىن دەگەن ءتىلەك بىلدىرەمىن.
كۇلاش بەيسەنبيەۆا,
قازاقستان رەسپۋبليكاسىنىڭ ەڭبەك سىڭىرگەن قىزمەتكەرى
الماتى
