– كيىز ادامداردىڭ تۇرمىستا قولدانۋىنا ەكولوگيالىق ەڭ تازا ماتەريال بولسا, ونەر ادامدارى ءۇشىن دە وتە قولايلى, قالاي يسەڭ سولاي كەلە بەرەتىن ماتەريال. ونى قازىرگى جاڭا تەحنولوگيالارمەن ارلەي تۇسكەندە قايتالانباس سۇلۋلىق بەرەدى, – دەيدى سۋرەتشى, ءمۇسىنشى بايان باتالوۆا. ماماندار كيىزدىڭ قازاقستان برەندىنىڭ ءبىرى, ەلىمىزدە جاقسى دامىپ كەلە جاتقان ەتنوتۋريزمنىڭ دە ماڭىزدى بولىگى ەكەنىن ايتىپ وتىر. كيىزدەن جاسالعان بۇيىمدار كورەرمەنىن تارتپاي قويمايدى. شەبەردىڭ اتى – شەبەر, قوستانايلىق ىسمەر ناتاليا شاروۆا كيىزدەن مونشاققا دەيىن جاسايدى.
– كيىزدەن جاسالعان مونشاقتى ماسكەۋ قالاسىنداعى ءبىر كورمەدەن كورىپ, ونىڭ ەرەكشەلىگى, ادەمىلىگى مەنى قاتتى قىزىقتىردى. ونى ءوزىم جاساي باستادىم. سوڭعى جىلدارى كيىز باسۋمەن, ودان بۇيىم جاساۋمەن اينالىسىپ كەلەمىن. وزىمە كيىزدەن كويلەك تىگىپ الدىم. قازىر 9 جاسار قىزىم ەكەۋمىز كيىز باسۋدىڭ قىر-سىرىن مەڭگەرىپ العانبىز. كيىزدەن بۇيىم جاساپ شىعارۋ سونشالىقتى وڭاي جۇمىس ەمەس. مىسالى, كويلەكتىڭ ءسانىن, جاراسىمىن ويلاپ تابۋعا كوپ ۋاقىت كەتۋى مۇمكىن. ال كيىزدەن ءوزىڭ ويلاعان كويلەكتى ءبىر اپتانىڭ ىشىندە بىتىرۋگە بولادى, – دەيدى ناتاليا شاروۆا.
«كيىز الەمى» كورمەسىن ۇيىمداستىرۋعا وبلىسقا بەلگىلى سۋرەتشى سۆەتلانا شالۋنوۆا باستاما كوتەرگەن ەدى.
– مەن سوڭعى كەزدە كەسكىندەمە جانرىنان ءسال بۇرىلىپ, كيىزگە بوي ۇرىپ ءجۇرمىن. نەگىزى مەنى قازاق حالقىنىڭ ۇلتتىق ءداستۇرى مەن تۇرمىس سالتى ەرەكشە قىزىقتىرادى. كيىز قانداي عاجاپ دۇنيە دەسەڭىزشى! كەز كەلگەن سۋرەتشى كيىزبەن جۇمىس ىستەگەن شىعارماسى ارقىلى ايتار ويىن جەتكىزە الادى دەپ ويلايمىن. قازىر قوستانايدا دا كيىزبەن جۇمىس ىستەيتىن سۋرەتشىلەر, قولونەرشىلەر قاتارى ءوسىپ كەلەدى. مەن ولاردىڭ باسىن قوسۋعا شاقىردىم, – دەيدى سۆەتلانا يۆانوۆنا.
كورمەگە سۋرەتشىلەر سۆەتلانا شالۋنوۆا, سۆەتلانا بۋرتسەۆا, قولونەرشىلەر يرينا مەن ناتاليا يلچيباەۆالار, ەلەنا كورياكينا, ارلان اڭقاۋوۆ جانە دينارا قىپشاقباەۆانىڭ شىعارمالارى قويىلدى. ولاردىڭ ايتۋىنشا, كيىزدەن كىلەمنەن باستاپ, كيىمگە, اياق كيىمگە, قۋىرشاق پەن گۇلگە دەيىن جاساۋعا بولادى.
ءنازيرا جارىمبەتوۆا, «ەگەمەن قازاقستان»
قوستاناي
