ءال-فارابي اتىنداعى قازاق ۇلتتىق ۋنيۆەرسيتەتى تۇركسوي كافەدراسىمەن بىرلەسە وتىرىپ وتكىزگەن ءىس-شارا قازاقستان رەسپۋبليكاسى تاۋەلسىزدىگىنىڭ 25 جىلدىعىنا, تۇركيا مەن قازاقستان اراسىنداعى حالىقارالىق قاتىناستارعا, ۇلتتىق كىتاپحاناداعى تۇركيا كىتاپ بۇرىشىنىڭ 10 جىلدىعىنا ارنالدى.
جيىنعا الماتى قالاسىنداعى تۇركيانىڭ باس كونسۋلى رىزا كىلعان يىلماز, تۇركى حالىقتارى مادەنيەتى قورىنىڭ پرەزيدەنتى احمەت داعدۇران, س.دەميرەل اتىنداعى ۋنيۆەرسيتەت رەكتورىنىڭ كەڭەسشىسى, عالىم دانداي ىسقاق ۇلى, ءال-فارابي اتىنداعى قازۇۋ-دىڭ شىعىستانۋ فاكۋلتەتىنىڭ دەكانى, پروفەسسور بايان جۇباتوۆا, وسى فاكۋلتەتتىڭ تۇركسوي كافەدراسىنىڭ مەڭگەرۋشىسى, فيلولوگيا عىلىمدارىنىڭ كانديداتى ءتورالى قىدىر, ا.بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى, شىعىستانۋشى ەردەن قاجىبەك, جازۋشىلار قۋاندىق تۇمەنباي, ءاشيري احمەتجان, ەۋرازيا عىلىمي-زەرتتەۋ ينستيتۋتىنىڭ ديرەكتورى, دوكتور نەۆزات شيمشەك, ىستانبۇلداعى ەديتەپە ۋنيۆەرسيتەتىنىڭ پروفەسسورى اريف ادجولوعلى جانە بىرقاتار عالىمدار مەن جازۋشىلار ارنايى كەلىپ, ءسوز سويلەدى.
تۇركسوي كافەدراسىنىڭ مەڭگەرۋشىسى ءتورالى قىدىر تۇرىك باۋىرلاردىڭ ادەبيەتى مەن مادەنيەتىن, تاريحى مەن ونەرىن كەڭىرەك ناسيحاتتاپ, ءدارىپتەۋ ماقساتىندا وسى اپتانى «تۇرىك ءتىلى اپتالىعى» دەپ جاريالاعاندارىن ايتا كەلە, «تۇركيا مادەنيەتى مەن ادەبيەتى» كىتاپ كورمەسىنە ۇلتتىق كىتاپحانانىڭ قورىنان قازاقستاندىق جانە تۇركيالىق تانىمال جازۋشىلاردىڭ شىعارمالارى جانە الەم ادەبيەتى زالىنداعى ءتۇركيا كىتاپ بۇرىشىنان قازاق, ورىس جانە اعىلشىن تىلدەرىندەگى ادەبيەتتەر ۇسىنىلعانىن جەتكىزدى.
«تۇركيا, تۇرىك الەمى دەگەندە ەڭ الدىمەن اۋزىمىزعا تۇسەتىنى پوەزيا عوي. شىعىستى ولەڭ-جىرسىز كوزگە ەلەستەتە المايتىنىمىز راس. اپتالىق اياسىندا ءالى دە بىرقاتار ءىس-شارالار اتقارىلاتىن بولادى. قازاق جانە تۇرىك مادەنيەتىنىڭ اراسىنداعى بايلانىستىڭ تامىرى تاريحتىڭ تەرەڭ قويناۋىنان باستاۋ الادى. سول بايلانىستى ەڭ باستىسى, ەل مەن ەلدىڭ, جەر مەن جەردىڭ اراسىن بايلانىستىراتىن بولاشاق ۇرپاق ۇمىتپاۋى ءتيىس. ءبىز جاستارعا بار بىلگەنىمىزدى ۇيرەتىپ, قانداس ەلدەرگە ورتاق مول مادەنيەتتى, ادەبي مۇرانى, باۋىرمالدىق قارىم-قاتىناستى ۇلگى ەتىپ قالدىرۋعا ءتيىسپىز», دەدى العاشقىلاردىڭ ءبىرى بولىپ ءسوز العان بايان جۇباتوۆا.
الماتى قالاسىنىڭ مادەني ورتالىقتارىنىڭ وكىلدەرى, تاۋەلسىزدىكتىڭ 25 جىلدىعىنا وراي شىعارمالارى تۇرىك تىلىندە جارىق كورگەن جازۋشىلار مەن اقىندار, الماتى قالاسىنىڭ جوعارى وقۋ ورىندارىنىڭ ستۋدەنتتەرى, رەسپۋبليكالىق گۆارديا كۋرسانتتارى, وقىرماندار مەن كىتاپحاناشىلار قاتىسقان شىرايلى كەشتە ستۋدەنتتەر ورتا عاسىرداعى تۇرىك پوەزياسى مەن بۇگىنگى تۇرىك جانە قازاق اقىندارىنىڭ ولەڭدەرىن ەكى تىلدە قاتار وقىدى, ادەبي-مۋزىكالىق كومپوزيتسيا, كىتاپ كورمەسى, بەينەماتەريالدار ۇسىنىلدى.
ميرا بايبەك, «ەگەمەن قازاقستان»
الماتى
