سەمەيدە ونىڭ وسى قىلمىستى ارەكەتىنە قاتىستى ۇكىم شىعارعان №2 سوتتىڭ سۋدياسى گۇلنار بينازاروۆانىڭ ايتۋىنشا, ۇزاق جىلداردان بەرى ەڭبەك ەتىپ كەلە جاتسا دا, ءوز تاجىريبەسىندە مۇنداي جاعدايدى بۇرىن-سوڭدى كەزىكتىرمەپتى. سۋديا سوت زالىندا انىقتاپ ايتقانداي, 58 جاستاعى الاياق اسكەري تەحنيكالاردى ساتىپ الامىن دەپ قىزىعۋشىلىق تانىتقاندارعا, قاعازداعى ءوزى جاساپ العان پرايس ۇلگىدەن اۋىر جانە جەڭىل كولىك تۇرلەرىن سۋرەتىمەن كورسەتىپ, اۋكتسيون ءجۇرىپ جاتىر دەپ الداعان. اسكەري تەحنيكانىڭ باعاسىنا ساي, «گاز-53» كولىگىن 170 مىڭ تەڭگەگە, «ۋرال» كولىگى پرايس-قاعاز بويىنشا 280 مىڭ تەڭگەگە, «كاماز» (2004 جىلى شىعارىلعان) 810 مىڭ تەڭگەگە, ال متز تراكتورىن 410 مىڭ تەڭگەگە ساتىپ الۋعا بولادى دەپتى. قورعانىس مينيسترلىگى سىزدەرگە وتە ارزانعا بەرىپ وتىر دەپ ءتۇسىندىرىپتى» ول قارماعىنا ىلىككەندەرگە. ءسويتىپ, ول ساتىپ الۋشىلارعا اقشانى ەسەپشوتقا اۋدارىڭىز دەگەندى ايتادى. ساتىپ الۋشىلار بولسا, ارزان تەحنيكانىڭ سۋرەتىن كورىسىمەن 170 مىڭ تەڭگەدەن 1 ملن-عا دەيىن اقشالارىن الاياقتىڭ ەسەپ-شوتىنا ويلانباستان اۋدارىپ جىبەرگەن. ءسويتىپ, ول ءۇش جىل ىشىندە 5 ملن تەڭگە اقشا تاۋىپ ۇلگەرگەن.
بىراق اقشا جىبەرگەندەر ەشقانداي تەحنيكا قولدارىنا تيمەي, سان سوعىپ قالادى. ويتكەنى, الاياقتىڭ قولىندا ەشقانداي دا اسكەري تەحنيكا بولماپتى. وسىلايشا ول ءوز كاسىبىن جالعاستىرا بەرمەك ەدى, تەك وتكەن جىلدىڭ قاراشا ايىندا ۇستالىپ قالدى. تەرگەۋ مەن سوت ىستەرى بىرنەشە ايعا سوزىلدى. وسى ارالىقتا الاياق باسىنا ءىس ءتۇسكەنىن بايقاپ, جاپا شەگىپ, الدانىپ قالعانداردىڭ بارلىعىنا تۇگەلدەي اقشالارىن قايتارىپ بەرۋدى كوزدەيدى. ءسويتىپ, ول سوت شەشىمى شىققان كۇنگە دەيىن بارلىق اقشانى قايتارىپ ۇلگەرەدى.
– جاپا شەككەندەر اقشالارىن تولىق قايتارىپ الدى, – دەيدى №2 سوتتىڭ سۋدياسى گۇلنار بينازاروۆا. – تەك وسىنداي ادامعا سەنىپ, وزگەدەن قارىز السا دا اسكەري تەحنيكالاردى ويلانباي ساتىپ الماق بولعانداردىڭ ارەكەتى تۇسىنىكسىز. اقشالارىن بەرگەن سوڭ عانا ەشقانداي دا تەحنيكانىڭ جوق ەكەندىگىنە, قاپىدا سان سوعىپ قالعاندىقتارىنا كوزدەرى جەتكەن.
ال سوت الگى ازاماتتىڭ بۇرىن سوتتى بولماعانىن, كىناسىن تولىق مويىنداعانىن, وكىنىش بىلدىرگەنىن, جاعىمدى مىنەزدەلەتىنىن, سوتتالۋشىنىڭ تاربيەسىندە 1 كامەلەتكە تولماعان بالاسى بارىن ەسكەرىپتى. وسىلايشا الاياق امنيستيا ارقاسىندا بوستاندىققا شىقتى. ول تەك 2 جىل 11 ايعا عانا شارتتى تۇردە باس بوستاندىعىنان ايىرىلدى.
راۋشان نۇعمانبەكوۆا,
جۋرناليست
سەمەي
