جۋىردا وڭىردە ەلەكتر قۋاتىنىڭ باعاسىن كوتەرۋ جونىندە قوعامدىق تىڭدالىم ءوتىپ, «سەۆكازەنەرگوسبىت» كاسىپورنى باس ديرەكتورىنىڭ ءمىندەتىن اتقارۋشى ماعاۋيا ساعىندىقوۆتىڭ ەسەبى تىڭدالدى. ونىڭ ءسوزىنە قاراعاندا, كاسىپورىننىڭ قىزمەتىن وبلىستا 150 مىڭ, پەتروپاۆل قالاسىندا 85 مىڭ ابونەنت تۇتىنادى. 2016 جىلدىڭ قورىتىندىسى بويىنشا سارالانعان ءتاريفتى قولدانۋ كەزىندە كومپانيانىڭ شىعىندارى كوبەيىپ كەتكەن كورىنەدى. تىعىرىقتان شىعۋ ءۇشىن باسقا قارجى كوزدەرىنەن تولىقتىرۋ قۇقىعىن العا تارتا وتىرىپ, تۇتىنۋشىلار ەسەبىنەن جۇزەگە اسىرۋدى قولايلى كورگەن ءتارىزدى. ءسويتىپ, ءوز وتىنىشتەرىن قۇزىرلى ورگاندارعا جولداپ, ءساۋىر ايىنان باستاپ ءتاريفتى كوتەرۋگە ءوتىنىم بەرگەن. ول «سويلەتكەن» تسيفرلار ادامنىڭ اياۋشىلىعىن تۋدىراتىنى سونشالىق, قولىڭداعى بارىڭمەن بولىسۋگە بەيىلسىڭ. سەرىكتەستىك بۇگىنگە دەيىن 6526 ميلليون تەڭگە شىعىنعا باتقان. ءوز پروبلەماسىن بوگدەنىڭ ەسەبىنەن شەشۋدى ادەت ەتكەن داعدىسىنا باسىپ, جۇرتشىلىقتىڭ ۇسىنىس-پىكىرلەرلەرىمەن ساناسۋدى ءجون دەپ تاپپاسا كەرەك.
الايدا, كاسىپورىن باسشىسىنىڭ ءۋاجى قوعامدىق تىڭدالىمعا جينالعانداردى قاناعاتتاندىرمادى. وبلىستىق تۇتىنۋشىلار مەن كاسىپكەرلەر قۇقىعىن قورعاۋ قاۋىمداستىعىنىڭ مۇشەسى نيكولاي زاۆيالوۆتىڭ قالانىڭ وزىندە ەلەكتر قۋاتىنىڭ تاريفى تۇرلىشە ەكەندىگى, الدىمەن ونى ءبىرىزدىلەندىرۋ قاجەتتىگى, سوندا جۇمسالاتىن شىعىنداردى ازايتۋعا ءمۇمكىندىكتەر تۋار ەدى دەگەن ۇسىنىس-ساۋالى جاۋاپسىز قالدى. تابيعي مونوپوليالاردى رەتتەۋ اگەنتتىگىنىڭ وبلىستىق دەپارتامەنتى جانىنداعى ساراپتاۋ كەڭەسىنىڭ مۇشەلەرى قيت ەتسە باعانى كوتەرۋ ءۇردىسكە اينالىپ بارا جاتقانىنا الاڭداۋشىلىق ءبىلدىرىپ, ونىڭ قيسىنسىزدىعىن جەتكىزدى. ماسەلەن, مارات ىسقاقوۆ ەلەكتر قۋاتى بىلتىر قاڭتار ايىندا كوتەرىلسە دە, كومپانيادا جاعدايدىڭ جاقسارماعانىن ايتىپ, قيىندىقتى ەڭسەرۋدىڭ وزگە جولدارىن ىزدەستىرۋگە كەڭەس بەردى. تاراتۋ بارىسىندا ەلەكتر قۋاتىنىڭ مولشەردەگىدەن كوپ جوعالاتىنىن اتاپ كورسەتتى. امانگەلدى كەنجەعوجينوۆ, الەكساندر كازانتسەۆ, سەرگەي مارتەميانوۆ جانە تاعى باسقا قاتىسۋشىلار دا قولعا الىنعان اۋقىمدى باعدارلامالار مەن جوبالاردىڭ ورىندالۋ ساپاسىنا كۇمان كەلتىردى.
قاي-قايسىسىنىڭ پىكىرى بولسىن باعانى كوتەرۋ تىعىرىقتان شىعۋ جولى ەمەس, ءتۇيىندى ماسەلەلەردىڭ شەشىلۋىنە الدىمەن كاسىپورىن ىقپال جاساۋى, مۇددەلى بولۋى ءتيىس دەگەن ارناعا توعىستى.
ءومىر ەسقالي, «ەگەمەن قازاقستان»
سولتۇستىك قازاقستان وبلىسى
