جولداۋدا ءسوز بولعان وتاندىق اگروونەركاسىپ سالاسىنىڭ كەلەشەگى زور. جالپى, قازىرگى كەزەڭدە بىرقاتار قارقىندى دامۋشى مەملەكەتتەر ءۇشىن اگروونەركاسىپ كەشەنى ەكونوميكانىڭ درايۆەرىنە اينالعاندىعى شىندىق. سونداي مەملەكەتتەردىڭ قاتارىنا ءوزىم ءبىلىم الىپ جاتقان, بۇگىندە ەۋروپالىق وداق ايماعىنىڭ قارقىندى دامۋشى ەكونوميكالارىنىڭ بىرىنە اينالعان پولشا مەملەكەتىن جاتقىزۋعا بولادى. پولشانىڭ جىلدام دامۋىنا سەرپىن بەرۋشى باعىتتاردىڭ ءبىرى – ەلدىڭ ءداستۇرلى اۋىل شارۋاشىلىعى.
پولياكتار عاسىرلار بويى جەردەن نەسىبەسىن تەرگەن, مال شارۋاشىلىعىنان پايدا كورە بىلگەن حالىق ەكەندىگى بەلگىلى. بىراق سوڭعى ونجىلدىقتا پولشا اگروونەركاسىپتە «ءداستۇرلى ساپا» مەن «تەحنولوگيالىق جاڭاشىلدىق» ۇعىمدارىن ءوزارا ۇيلەستىرە ءبىلدى. اگرارلىق سالا تەحنولوگيانىڭ سوڭعى جەتىستىكتەرىمەن جاراقتاندىرىلىپ, سالا ونىمدەرىن ەكسپورتقا شىعارۋ باعىتىندا قىرۋار جۇمىس اتقارىلدى. ناتيجەسىندە, پولشا اۋىل شارۋاشىلىعى ونىمدەرىن ەكسپورتتاۋ سالاسىنداعى كوشباسشى مەملەكەتتەردىڭ بىرىنە اينالدى.
مۇنداي جەتىستىككە پولياك كاسىپكەرلەرى سالانى تەحنولوگيالىق تۇرعىدان جاڭعىرتۋ, سىرتقى نارىقتاردى, ولاردىڭ تالاپتارى مەن سۇرانىستارىن ءجىتى زەرتتەۋ, زەردەلەۋ, تۇتىنۋشىلاردىڭ تالاپ-تىلەكتەرىن ەسكەرۋ ارقىلى قول جەتكىزدى. پولشانىڭ اگرارلىق سالا ماماندارى ەلدىڭ عىلىمي ورتالىقتارىمەن ءونىمنىڭ ساپاسىن ارتتىرۋ, شىعىنىن ازايتۋ جانە ت.ب. باعىتتار بويىنشا تىعىز ىنتىماقتاستىقتا جۇمىس ىستەدى. ءناتيجەسى دە جامان ەمەس, بۇگىندە پولياك المالارى, ەت جانە ءسۇت ونىمدەرى تەك ەۋروپا عانا ەمەس, ودان تىسقارى اۋماقتاردا دا كەڭىنەن تانىمال.
قازىرگى تاڭدا حالىقارالىق قوعامداستىق ساپالى, ەكولوگيالىق تۇرعىدان تازا اۋىل شارۋاشىلىعى ونىمدەرىن تۇتىنۋعا نيەتتى. وتاندىق كاسىپكەرلەر بۇل ترەندتى پايدالانا بىلۋلەرى ءتيىس. جولداۋدا ايتىلعان سۋبسيديالار بەرۋ, ءونىمدى ساقتاندىرۋ, تاۋارلاردى ساقتاۋ مەن وتكىزۋ, سالاداعى ءارتاراپتاندىرۋ قولعا الىنىپ, عىلىمي ورتالار مەن سالا كاسىپكەرلەرىنىڭ بىرلەسكەن جۇمىستارى ءوزارا پايدالى باعىتتا جۇرگىزىلسە, وتاندىق اگروونەركاسىپ كەشەنى داميتىن بولادى.
ال مەملەكەتىمىز بۇگىنگى كۇنى قۇرىلىسىنا قىرۋار قاراجات ءبولىپ, قالىپتاستىرىپ جاتقان كولىك-لوگيستيكالىق كەشەن سالا ءونىمىن سىرتقى نارىقتارعا شىعارۋعا قىزمەت كورسەتەتىن بولادى. اتالعان لوگيستيكالىق ينفراقۇرىلىمدى دامىتۋ – بيىلعى جولداۋدا كوتەرىلگەن باستى تاقىرىپتاردىڭ ءبىرى.
حالىقارالىق ساۋدا اعىنىندا شىعىس ازيا, تاياۋ شىعىس جانە ەۋروپا ايماقتارىنىڭ ءرولى اسا جوعارى. ەۋرازيا قۇرلىعىنداعى تاسىمال باعىتتارى نەگىزىنەن اتالعان ايماقتار اراسىندا جۇرەتىن بولادى. قازاقستان سىندى تەڭىزگە تىكەلەي شىعاتىن جولى جوق, نەگىزىنەن قۇرلىقتىق سيپاتتاعى مەملەكەت ءۇشىن قۋاتتى كولىك-لوگيستيكالىق كەشەندى قالىپتاستىرۋ ستراتەگيالىق ماڭىزدى قادام سانالادى. بۇل رەتتە دۇنيەجۇزىلىك ساۋدا ۇيىمىنا ءمۇشەلىگىمىز وڭ ىقپالىن تيگىزەتىن بولادى.
حالىقارالىق دەڭگەيدەگى جولداردىڭ سالىنۋى ەل قازىناسىنا تۇسەتىن تابىسپەن قاتار, جولدىڭ ءون بويىنداعى كولىك ينفراقۇرىلىمىنىڭ, قىزمەت كورسەتۋ سالاسىنىڭ دامۋىنا سەپ بولماق. ول دەگەنىڭىز, قىزمەت كورسەتۋ سالاسىنداعى كاسىپكەرلىكتى دامىتۋعا ءمۇمكىندىك بەرەدى. ال ىشكى جولداردىڭ سالىنۋى وڭىرلەر اراسىنداعى بارىس-كەلىستىڭ كولەمىن ۇلعايتىپ, ىشكى دامۋعا مۋلتيپليكاتيۆتىك اسەرىن تيگىزبەك.
حالقىمىزدا «ىنتىماق جۇرگەن جەردە, ىرىس بىرگە جۇرەدى» دەگەن ماقال بار. وسى مۇمكىندىكتى پايدالانا وتىرىپ, بارشا وتانداستارىمىزدى ەلباسىنىڭ بيىلعى باستامالارىن جاپپاي قولداۋعا, جولداۋدا كورسەتىلگەن ماقساتتاردى ءجۇزەگە اسىرۋدا جۇمىلا ەڭبەكتەنۋگە شاقىرامىن.
جاندوس قارىنباەۆ,
ۆارشاۆا ۋنيۆەرسيتەتى ساياسي عىلىمدار جانە حالىقارالىق قاتىناستار فاكۋلتەتىنىڭ دوكتورانتى
