اقوردادا شاعىن قۇراممەن وتكەن كەزدەسۋ بارىسىندا ەكى ەلدىڭ قاتىناستارىنداعى باستى سالالار بويىنشا ىنتىماقتاستىقتى ودان ءارى نىعايتۋ ماسەلەسى ءسوز بولدى.
قازاقستان پرەزيدەنتى وزبەكستاندىق ارىپتەسىن شەتەلدىك مارتەبەلى مەيمانعا لايىقتى ءسان-سالتاناتپەن قارسى الدى. ن.نازارباەۆ شاۆكات ميرزيەەۆتىڭ پرەزيدەنت رەتىندە قازاق جەرىنە العاش كەلىپ وتىرعانىن اتاپ ءوتىپ, باسقان قادامىنا ساتتىلىك تىلەدى.
– مەن ءسىزدى قازاقستان جەرىندە شىن جۇرەكتەن, باۋىر رەتىندە قارسى الامىن. بۇل – پرەزيدەنت رەتىندەگى العاشقى ساپارىڭىز. ءسىزدى وزبەك حالقى پرەزيدەنت سايلاۋىنا بايلانىستى قۇتتىقتايمىز. وزبەكستان بىزگە ستراتەگيالىق ارىپتەس, كورشى ءارى باۋىرلاس ەل. ءبىزدىڭ حالقىمىز سىزدەرگە دامۋ جانە بەرەكە تىلەيدى. بولاشاقتا دا ەكونوميكالىق جانە مادەني-گۋمانيتارلىق بايلانىستاردى دامىتۋ ىسىندە ءبىز وزبەكستانعا جانە جەكە وزىڭىزگە سەنىم ارتامىز. ساپارىڭىز تابىستى بولۋى ءۇشىن بارلىعىن جاسايمىز. قازاقستان ءوزىنىڭ ستراتەگيالىق سەرىكتەسى, كورشىسى ءارى باۋىرلاسى – وزبەكستاننىڭ حالقىنا باق-بەرەكە تىلەپ, ءوسىپ-وركەندەۋىنە نيەتتەستىك بىلدىرەدى. ءبىز كەلەشەكتە ەكىجاقتى بايلانىستار اياسىندا جەمىستى قارىم-قاتىناس ورنايدى دەپ سەنەمىز. قازىردىڭ وزىندە مەملەكەتارالىق ارىپتەستىكتى نىعايتۋ باعىتىندا ناقتى جۇمىستار جۇرگىزىلدى. اتاپ ايتقاندا, ەلدەرىمىزدىڭ اراسىنداعى ساۋدا اينالىمىنىڭ كولەمى وسكەنى ايقىن بايقالادى, شەكارالارىمىز ارقىلى وتكىزۋ مۇمكىندىگى ارتىپ, ونىمدەردىڭ جاڭا تۇرلەرى جەتكىزىلۋدە, – دەدى قازاقستان پرەزيدەنتى.
ءوز كەزەگىندە, وزبەكستان پرەزيدەنتى قازاقستانعا جاساعان مەملەكەتتىك ساپارىن تاريحي ساپار دەپ سانايتىنىن ايتتى. ول قازاقستان تاراپىنىڭ سىي-قۇرمەتپەن كۇتىپ العانىنا ريزالىعىن ءبىلدىردى.
– ءسىز, نۇرسۇلتان ءابىش ۇلى, وتكەن جىلعى قىركۇيەكتە سامارقاندقا كەلگەنىڭىزدە قازاقستان مەن وزبەكستان قاشاندا بىرگە بولاتىنىن ايتقان ەدىڭىز. جاقسىلىقتى دا, قايعىنى دا بولىسەمىز دەگەن بولاتىنسىز. بۇل سوزدەر ءبىزدى جاقىنداتتى, بۇكىل وزبەك حالقى ناعىز دوس ءارى باۋىر حالىقتىڭ قولداۋىن سەزىندى. ءسىز ءوز دوسىڭىز, وزبەكستان رەسپۋبليكاسىنىڭ تۇڭعىش پرەزيدەنتى يسلام كارىموۆتىڭ قابىرىنە ارنايى كەلىپ, قۇرمەت ءبىلدىردىڭىز. سول ساپاردان بەرى بىزدە مۇلدەم جاڭاشا قارىم-قاتىناس باستالدى. سوڭعى بەس ايدا ءبارى قايتا باستالعانداي بولدى,– دەدى شاۆكات ميرزيەەۆ.
كەشە ەلورداداعى تاۋەلسىزدىك سارايىندا ەكى ەلدىڭ 500-دەن استام كاسىپكەرىنىڭ قاتىسۋىمەن حالىقارالىق بيزنەس-فورۋم ءوتىپ, القالى جيىندا جالپى سوماسى 1 ميلليارد دوللاردى قۇرايتىن 75 كەلىسىمشارتقا قول قويىلعان بولاتىن. مەملەكەت باسشىلارىنىڭ كەزدەسۋىندە بۇل تۋرالى دا ايتىلدى.
شاۆكات ميرزيەەۆتىڭ ايتۋىنشا, وزبەكستان تاراپى قازاقستاندى قاشاندا ەڭ جاقىن, ەڭ سەنىمدى دوس دەپ سانايدى. ەل پرەزيدەنتىنىڭ العاشقى ساپارلارىنىڭ ءبىرىن استاناعا جاساۋىن دا وسىنىڭ ءبىر نىشانى دەپ تۇسىنگەن ابزال.
– ءبىزدىڭ تاريحي تامىرىمىز بۇگىنگى كۇندەرىمىزدەن حابار بەرەدى. ءبىز كەشە كەلىسسوزدەردى باستادىق. بۇگىن بولاشاق قارىم-قاتىناسىمىز تۋرالى ءسوز بولادى. ءبىرىنشى رەت دەلەگاتسيامىزبەن پارلامەنت جەتەكشىلەرى, قورعانىس مينيسترلىگىنىڭ جەتەكشىلەرى كەلىپ وتىر. بۇل ۆەدومستۆولار اراسىندا بۇرىن مۇنداي تىعىز قارىم-قاتىناس بولعان ەمەس. وتكەن جىلى الەم ءۇشىن تاريحي قۇبىلىس بولدى. قازاقستان بۇۇ قاۋىپسىزدىك كەڭەسىنە سايلاندى. بۇل بۇكىل ورتالىق ازيا مۇددەسى ءسىزدىڭ جەتەكشىلىگىڭىزبەن قورعالاتىنىن بىلدىرەدى. بۇۇ-داعى ەكى جىلدىق تۇراقتى ەمەس مۇشەلىك كەزىندە اۋعانستان بويىنشا شارالار قابىلدانادى دەپ سەنەمىن. بۇل ءسىزدىڭ باستامالارىڭىز. وزبەكستان قاشاندا مۇنىڭ ءبارىن قولدايدى. ءبىزدىڭ ءبارىمىز دە ءسىزدىڭ باستامالارىڭىزدى قولدايمىز,– دەدى شاۆكات ميرزيەەۆ.
سالتاناتتى كەزدەسۋدەن سوڭ ەكى مەملەكەتتىڭ دەلەگاتسيالارىنىڭ قاتىسۋىمەن كەڭەيتىلگەن كەلىسسوزدەر ءوتتى. وسى جيىننىڭ قورىتىندىسى بويىنشا قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن وزبەكستان پرەزيدەنتى شاۆكات ميرزيەەۆ قازاقستان مەن وزبەكستان اراسىنداعى ستراتەگيالىق ارىپتەستىكتى ودان ءارى تەرەڭدەتۋ جانە تاتۋ كورشىلىكتى نىعايتۋ تۋرالى ءبىرلەسكەن دەكلاراتسياعا قول قويدى.
سونداي-اق, كەلىسسوزدەر ناتيجەسىندە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اسقار مامين مەن وزبەكستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى اچيلباي راماتوۆ وڭىرارالىق ىنتىماقتاستىق تۋرالى كەلىسىمگە, 2017-2019 جىلدارعا ارنالعان ەكونوميكالىق ىنتىماقتاستىق ستراتەگياسىنا, تابىسپەن بىرگە قوسارلانعان سالىق سالۋدى بولدىرماۋ تۋرالى كەلىسىمگە وزگەرتۋلەر مەن تولىقتىرۋلار ەنگىزۋ تۋرالى حاتتاماعا قول قويدى.
ال ەلىمىزدىڭ ينۆەستيتسيالار جانە دامۋ ءمينيسترى جەڭىس قاسىمبەك پەن ءوزبەكستان سىرتقى ەكونوميكالىق بايلانىستار, ينۆەستيتسيالار جانە ساۋدا ءمينيسترى ەليور گانيەۆ حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى, ەكى ەلدىڭ سىرتقى ساياسات ۆەدومستۆولارىنىڭ باسشىلارى قايرات ءابدىراحمانوۆ پەن ابدۋلازيز كاميلوۆ ۆەدومستۆوارالىق 2017-2018 جىلدارعا ارنالعان ىنتىماقتاستىق باعدارلاماسىن, قازاقستاننىڭ قورعانىس ءمينيسترى ساكەن جاسۇزاقوۆ پەن ءوزبەكستاننىڭ قورعانىس ءمينيسترى كابۋل بەرديەۆ قورعانىس مينيسترلىكتەرى اراسىنداعى اسكەري ىنتىماقتاستىق تۋرالى كەلىسىمدى راسىمدەدى.
قول قويۋ راسىمىنەن كەيىن قازاقستان مەن وزبەكستان پرەزيدەنتتەرى بىرلەسكەن مالىمدەمە جاسادى. قازاقستان پرەزيدەنتى ن.نازارباەۆ اتاپ وتكەندەي, الداعى ۋاقىتتا قازاقستان مەن وزبەكستاننىڭ ءوزارا ءتيىمدى ىنتىماقتاستىق قارقىنىن ارتتىرا ءتۇسۋ كەرەك.
– ەڭ الدىمەن شاۆكات ميرزيەەۆ مىرزاعا باۋىرلاس حالىقتار قاستەر تۇتاتىن ورتاق مەرەكەمىز – ناۋرىز مەيرامىندا كەلىپ, ءبىزدىڭ ەلىمىزگە تۇڭعىش مەملەكەتتىك ساپار جاساعانى ءۇشىن شىن كوڭىلىمنەن ريزاشىلىعىمدى ءبىلدىرەمىن. مەرەكەسى مەن بەرەكەسى ورتاق ەلدەرىمىزدىڭ بارلىق ازاماتتارىن ۇلىستىڭ ۇلى كۇنىمەن قۇتتىقتايمىن. وزبەكستان رەسپۋبليكاسىنىڭ جاڭادان سايلانعان پرەزيدەنتى قازاقستانعا ساپارمەن كەلىپ وتىر. بۇل قازاقستان مەن وزبەكستان اراسىنداعى ستراتەگيالىق سەرىكتەستىكتى دامىتىپ, دوستىق بايلانىستى نىعايتۋعا مۇمكىنشىلىك بەرەدى, – دەدى ن.نازارباەۆ.
ەلباسى كەلىسسوزدەر بارىسىندا قول جەتكىزىلگەن ۋاعدالاستىقتاردى جۇزەگە اسىرۋعا ەكى ەلدىڭ ۇكىمەتتەرى جەدەل كىرىسىپ كەتكەندىگىن دە اتاپ ءوتتى. ن.نازارباەۆ مىسالعا كەلتىرگەندەي, بۇگىندە ەكى ەل كاسىپكەرلەرىنىڭ اتسالىسۋىمەن ساۋدا ۇيلەرى اشىلدى, ەلدەرىمىز اراسىندا ءوزارا تاۋار جەتكىزۋ نومەنكۋلاتۋراسى ۇلعايدى. كولىك, ەنەرگەتيكا, عارىش, تۋريزم سالالارى بويىنشا ءوزارا ءىس-قيمىل جاندانىپ كەلەدى. اۆتوموبيل قۇراستىرۋ سالاسىندا بىرلەسكەن ينۆەستيتسيالىق جوبالاردى ىسكە اسىرۋ ءۇشىن ماڭىزدى جۇمىستار جۇرگىزىلدى. الداعى ۋاقىتتا ساۋدا-ەكونوميكالىق باعىتتاعى جۇمىستار ءالى دە ىلگەرىلەپ, ءوزارا ءتيىمدى ىنتىماقتاستىق قارقىنىن ارتتىرا ءتۇسۋ كوزدەلىپ وتىر.
جالپى, وزبەكستاننىڭ جاڭا پرەزيدەنتى قازاق-وزبەك ساۋدا-ساتتىق قاتىناستارىنىڭ قانات جايۋى ءۇشىن بارلىق مۇمكىندىكتەردى جاسادى دەۋگە بولادى. ەلباسى ايتىپ وتكەندەي, بۇگىنگى كۇنى استانا مەن تاشكەنت ەكىجاقتى ساۋدا-ەكونوميكالىق ارىپتەستىك بويىنشا ورتالىق ازيا ايماعىندا جەتەكشى پوزيتسياعا يە بولىپ وتىر. وتكەن جىلدىڭ قورىتىندىسىندا تاۋار اينالىمىنىڭ كولەمى شامامەن 2 ملرد دوللاردى قۇراعانى وسىنىڭ ءبىر نىشانى. ال ساۋدانىڭ ناقتى كولەمدەگى ءوسىمى 2016 جىلى 16 پايىزعا ارتىپتى. ءبىر ايتا كەتەرلىگى, سوڭعى 5 ايدا قازاقستان مەن وزبەكستان اراسىنداعى تاۋار اينالىمىنىڭ اۋقىمى ەكى تاراپتا دا 30 پايىزعا ۇلعايعان. قازاقستاننىڭ استىعى كورشى ەلگە 30 پايىز ارتىق جەتكىزىلسە, ەلىمىزگە كەلىپ جاتقان وزبەك جەمىس-جيدەگى مەن كوكونىسىنىڭ كولەمى 25 پايىزعا ارتقان. قازاقستان ەكونوميكاسىنىڭ ءارتۇرلى سالالارىندا وزبەك كاپيتالى سالىنعان 800-دەن استام كاسىپورىن جۇمىس ىستەيدى.
كولىك-ترانزيت سالاسىنداعى ىنتىماقتاستىق جاندانىپ, الماتى-تاشكەنت باعىتىندا جۇردەك پويىزى جولعا شىقتى, جاڭا اۋە جولى مەن اۆتوبۋس باعىتتارى دا ىسكە قوسىلعان. ەلوردادا وتەتىن ەكسپو-2017 حالىقارالىق كورمەسىنە دە ىرگەلەس ەل كەڭ اۋقىمدا قاتىسۋعا نيەت ءبىلدىرىپ وتىر.
اقوردا تورىندەگى كەلىسسوزدەر بارىسىندا سۋ-ەنەرگەتيكا ماسەلەلەرىنە ايرىقشا ءمان بەرىلىپتى. بۇل تۋرالى مەملەكەت باسشىسى:
– ورتالىق ازيانىڭ ترانسشەكارالىق وزەندەرى ورتاق يگىلىك ەكەنىن تاعى دا راستادىق. ءبىز باۋىرلاس ەلدەردىڭ سۋدى پايدالانۋ جونىندەگى ويلارىنا تولىق تۇسىنىستىكپەن قارايمىز جانە بۇل ىسكە اتالعان وزەندەردىڭ تومەن جاعىنداعى ەلدەردىڭ مۇددەسىنە نۇقسان كەلتىرمەي قاتىسۋعا دايىنبىز. بۇل سۋعا ميلليونداعان ادامنىڭ تاعدىرى تاۋەلدى. ايماقتاعى تۇراقتىلىق, امان-ساۋلىق, تيىسىنشە ارامىزداعى دوستىق قارىم-قاتىناس پەن سەنىمنىڭ نىعايۋى وسى سۋعا بايلانىستى. سوندىقتان ونى اقىلمەن پايدالانۋ قاجەت, – دەدى.
ءدال وسى ترانسشەكارالىق وزەندەر ماسەلەسىنە قاتىستى شاۆكات ميرزيەەۆ وزەندەردە جاڭا گيدروتەحنيكالىق قۇرىلىستار سالۋ ماسەلەسى تالقىلانعانىن جەتكىزدى. وزبەكستان باسشىسىنىڭ پايىمداۋىنشا, بۇل جۇمىس وزگە دە مۇددەلى مەملەكەتتەردىڭ مۇددەلەرىنە نۇقسان كەلتىرمەيتىن سىندارلى كوزقاراس پەن كەلىسىم نەگىزىندە, سونىمەن قاتار حالىقارالىق سۋ قۇقىنىڭ نورمالارىنا سايكەس جاسالۋى ءتيىس. بۇل تۇرعىدا وزبەكستاندىق تاراپ بۇۇ-نىڭ ءامۋداريا مەن سىرداريانىڭ سۋ رەسۋرستارىن ۇتىمدى ءارى ءادىل پايدالانۋ جونىندە حالىقارالىق كەلىسىم جاساۋ جونىندەگى باستاماسىن قولدايدى.
ەلباسى نۇرسۇلتان نازارباەۆتىڭ مالىمدەمەسىندە ايتىلعانداي, شاۆكات ميرزيەەۆتىڭ ەلىمىزگە جاساعان العاشقى مەملەكەتتىك ساپارى ىنتىماقتاستىق پەن ارىپتەستىكتىڭ جاڭا بەلەسىنە جول اشتى دەپ ساناعان ءلازىم.
– ءبىزدىڭ تىعىز مادەني-تاريحي بايلانىستارىمىز دوستىق قارىم-قاتىناسىمىزدىڭ ماڭىزدى فاكتورى سانالادى. بۇگىندە ميلليوننان استام ەتنيكالىق قازاق وزبەكستاندا تۇرىپ جاتىر. شامامەن 500 مىڭ وزبەك ەكى مەملەكەتتى دە ءوز وتاندارى سانايدى, – دەپ اتاپ ءوتتى ەلباسى.
سونداي-اق, مەملەكەت باسشىسى كەلىسسوزدەر بارىسىندا وزبەك ارىپتەسىمەن مادەني كۇندەر وتكىزۋ جايىندا ۋاعدالاستىق جاساعاندىعىن اتاپ ءوتتى. قازاقستاندا وزبەك ەتنوسى وكىلدەرىنىڭ ءوز ءمادەني ورتالىقتارى, تەاترلارى بار ەكەندىگىن, قازاقستان حالقى اسسامبلەياسىندا, قازاقستان پارلامەنتىنىڭ قۇرامىندا دا مۇشەلەرى سايلانعانىن, قاجەتتىلىك بار جەرلەردە وزبەك تىلىندەگى مەكتەپتەردىڭ جۇمىس ىستەپ تۇرعانىن ايتتى.
– بۇگىنگى كەلىسسوزدەر ناتيجەسىنە مەن وتە جوعارى باعا بەرەمىن. شاۆكات ميرزيەەۆتىڭ ەلىمىزگە العاشقى مەملەكەتتىك ساپارى ىنتىماقتاستىق پەن ارىپتەستىكتىڭ جاڭا بەلەسىنە جول اشتى دەپ سانايمىن. وزبەكستان ءوسىپ, وركەندەي بەرسىن! باۋىرلاس وزبەك حالقىنا باق, بەرەكە تىلەيمىن! – دەدى ەلباسى.
وزبەكستان پرەزيدەنتى شاۆكات ميرزيەەۆ ءوز سوزىندە قازاقستاننىڭ حالىقارالىق قاۋىپسىزدىكتى ساقتاۋداعى ءرولىن جوعارى باعالاپ, بۇۇ قاۋىپسىزدىك كەڭەسىنىڭ تۇراقتى ەمەس مۇشەسى بولىپ سايلانۋىن تاريحي وقيعا دەپ سانايتىنىن جەتكىزدى. ش.ميرزيەەۆتىڭ پىكىرىنشە, ەلىمىزدىڭ قاۋىپسىزدىك كەڭەسىنە مۇشەلىگى ورتالىق ازيا ءوڭىرى ءۇشىن زور ماڭىزعا يە.
– قازاقستاننىڭ بۇۇ-داعى 2 جىلدىق تۇراقتى ەمەس مۇشەلىگى بارىسىندا اۋعانستانعا قاتىستى شارالار قابىلداناتىنىنا سەنىمىم مول. اۋعانستانداعى تۇراقتىلىق پەن بەيبىتشىلىك قازاقستان ءۇشىن دە, وزبەكستان ءۇشىن دە بارىنشا ماڭىزدى, – دەدى وزبەكستان پرەزيدەنتى.
وزبەكستان پرەزيدەنتى قازاقستان باسشىسى ن.نازارباەۆتى وزىنە ىڭعايلى كەز كەلگەن ۋاقىتتا وزبەكستانعا ساپارلاپ بارۋعا شاقىرىپ, قۇشاق جايا كۇتىپ الۋعا ءازىر ەكەندىگىن ايتتى.
– سىزبەن ءجيى كەزدەسىپ, ساعاتتارىمىزدى تۇزەتىپ, العا قاراي ىلگەرىلەيمىز دەپ ۋاعدالاستىق. نۇرسۇلتان ءابىش ۇلى, مەن ءسىزگە وزىڭىزگە ىڭعايلى كەز كەلگەن ۋاقىتتا وزبەكستانعا شاقىرامىن. سىزبەن وزبەكستاندا كەزدەسۋگە وتە قۋانىشتى بولامىن, – دەدى ول.
جالپى, سان عاسىرلىق تاريحي تاعدىرى ساباقتاس ءورىلىپ كەلە جاتقان قازاق-وزبەك قاتىناستارى سوڭعى ۋاقىتتا جاڭا بەلەسكە كوتەرىلدى دەۋگە نەگىز بار. بۇل, اسىرەسە, ساۋدا-ەكونوميكالىق قاتىناستارىنىڭ قارقىن الىپ, قانات جايىپ كەلە جاتقانىنان ايقىن اڭعارىلادى. ءبىر-ءبىرىن سەنىمدى سەرىك, تاتۋ كورشى جانە باۋىرلاس ەل دەپ سانايتىن ەكى مەملەكەتتىڭ باسشىلارى الداعى ۋاقىتتا ءوزارا قاتىناستاردى ودان ءارى جەتىلدىرىپ, ىنتىماقتاستىقتى نىعايتا بەرۋگە نيەتتى ەكەندىكتەرىن جەتكىزدى.
* * *
سونداي-اق, ەكى ەل پرەزيدەنتتەرى كەشە ەكىجاقتى كەلىسسوزدەردەن كەيىن استانا قالاسىنىڭ كورنەكتى ورىندارىن ارالادى. ن.نازارباەۆ پەن ش.ميرزيەەۆ «استانا وپەرا» مەملەكەتتىك وپەرا جانە بالەت
تەاترىندا بولىپ, «قىز جىبەك» وپەراسىنىڭ دايىندىعىن كوردى.
ال نازارباەۆ ۋنيۆەرسيتەتتە ءبىلىم ورداسىنىڭ دامۋ جوسپارىمەن, ونەركاسىپتى اۆتوماتتاندىرۋ زەرتحاناسىمەن, وقۋ ورنىنىڭ زەرتتەۋشىلىك جوبالارىمەن جانە فيزيكا-ماتەماتيكا زەرتحاناسىمەن تانىستى. ش.ميرزيەەۆ ۋنيۆەرسيتەتتىڭ قۇرمەتتى قوناقتار كىتابىنا قولتاڭبا قالدىردى.
سودان كەيىن نۇرسۇلتان نازارباەۆ پەن شاۆكات ميرزيەەۆ رەسمي اشىلعان «MEGA Silk Way» ساۋدا جانە ويىن-ساۋىق ورتالىعىنىڭ ساۋدا-كورمە پاۆيلوندارىن ارالاپ كوردى. پرەزيدەنتتەر «Cirque du Solei» ارتىستەرىنىڭ مونتە-كارلوداعى حالىقارالىق فەستيۆالىنىڭ جەڭىمپازدارى قويعان شاعىن تەاترلىق كورىنىس پەن اكروباتيكالىق شوۋدى تاماشالادى.
مەملەكەتتەر باسشىلارى قالانىڭ كورنەكتى ورىندارىن ارالاپ كورگەن سوڭ استانا ەكسپو-2017 كورمە كەشەنى قۇرىلىسىنىڭ بارىسىمەن جانە ونىڭ ماكەتىمەن تانىستى.
ارنۇر اسقار,
«ەگەمەن قازاقستان»
سۋرەتتەر پرەزيدەنتتىڭ ءباسپاسوز قىزمەتىنەن الىندى
