ەكەۋارا كەلىسسوزدەر كەزىندە وزبەكستان باسشىسى شاۆكات ميرزيەەۆ قازاقستانعا ساپارىن تاريحي دەپ سانايتىنىن ايتتى.
«ءسىز, نۇرسۇلتان ءابىش ۇلى, وتكەن جىلعى قىركۇيەكتە سامارقاندقا كەلگەنىڭىزدە قازاقستان مەن وزبەكستان قاشاندا بىرگە بولاتىنىن ايتقان ەدىڭىز. جاقسىلىقتى دا, قايعىنى دا بولىسەمىز دەدىڭىز. بۇل سوزدەر ءبىزدى جاقىنداتتى, بۇكىل وزبەك حالقى ناعىز دوس ءارى باۋىردىڭ قولداۋىن سەزىندى. ءسىز ءوز دوسىڭىز, وزبەكستان رەسپۋبليكاسىنىڭ ءبىرىنشى پرەزيدەنتى يسلام كاريموۆتىڭ قابىرىنە ارنايى كەلىپ, قۇرمەت ءبىلدىردىڭىز.
سول ساپاردان بەرى بىزدە مۇلدەم جاڭاشا قارىم-قاتىناس باستالدى. سوڭعى بەس ايدا ءبارى قايتا باستالعانداي بولدى» دەدى وزبەكستان پرەزيدەنتى.
شاۆكات ميرزيەەۆ وزبەكستاننان كەلگەن 250 كاسىپكەردىڭ استاناداعى بىرلەسكەن فورۋمعا قاتىساتىنىن ايتتى.
«بۇل ءسىزدىڭ يسلام ابدىعاني ۇلىمەن بىرگە قالاعان ىرگەتاستى بەكىتە تۇسەتىن بولادى. بۇل كوپىر بەكي تۇسەتىن بولادى. ءبىز قاشاندا قازاقستاندى ەڭ جاقىن, ەڭ سەنىمدى دوس دەپ سانايمىز. العاشقى ساپارىمىزدىڭ بىرىندە استانادا وتىرعانىمىز دا كوپ نارسەنى بىلدىرەدى. تاريحي تامىرىمىز, بۇگىنگى كۇندەرىمىزدەن حابار بەرەدى. ءبىز كەشە كەلىسسوزدەردى باستادىق. بۇگىن بولاشاق قارىم-قاتىناسىمىز تۋرالى ءسوز بولادى. ءبىرىنشى رەت دەلەگاتسيامىزبەن پارلامەنت جەتەكشىلەرى, قورعانىس مينيسترلىگىنىڭ جەتەكشىلەرى كەلىپ وتىر. بۇل ۆەدومستۆولار اراسىندا بۇرىن مۇنداي تىعىز قارىم-قاتىناس بولعان ەمەس» دەدى ميرزيەەۆ.
وزبەكستان پرەزيدەنتى بۇل ساپاردى تاريحي ساپار دەپ سانايتىنىن ايتتى. «وتكەن جىلى الەم ءۇشىن تاريحي قۇبىلىس بولدى. قازاقستان بۇۇ قاۋىپسىزدىك كەڭەسىنە سايلاندى. بۇل بۇكىل ورتالىق ازيا مۇددەسى ءسىزدىڭ جەتەكشىلىگىڭىزبەن قورعالاتىنىن بىلدىرەدى. بۇۇ-داعى ەكى جىلدىق تۇراقتى ەمەس مۇشەلىك كەزىندە اۋعانستان بويىنشا شارالار قابىلدانادى دەپ سەنەم. بۇل ءسىزدىڭ باستامالارىڭىز. وزبەكستان قاشاندا مۇنىڭ ءبارىن قولدايدى. ءبىز ءبارىمىز ءسىزدىڭ باستامالاردى قولدايمىز دەپ ويلايمىن» دەدى شاۆكات ميرزيەەۆ.
ميرزيەەۆ نۇرسۇلتان نازارباەۆتى وزىنە ىڭعايلى كەز كەلگەن ۋاقىتتا وزبەكستانعا كەلۋگە شاقىردى. «ءبىز ءجيى كەزدەسىپ تۇرۋعا كەلىستىك. ءسىزدى وزبەكستان قۋانا كۇتەم» دەدى ول.
