ناۋرىز شىقتى. كوكتەممەنەن
بۇرشىك جاردى تال-داراق,
بوي ۇمسىنىپ كوككە ورلەگەن
تۇرمىن تاۋعا مەن قاراپ.
تۇلەپ جاتىر تىلسىم الەم
جايناپ, گۇلدەپ, جاڭارىپ,
تابيعاتتىڭ ءبىر سىڭارى ەم,
تىنىستايىن كەڭ الىپ.
سەرگىتپەسىن مەنى نەگە
ساف اۋانىڭ سامالى,
ءتاتتى شاقتان تەبىرەنە
كەۋدەم جىرعا تولادى.
ك ۇلىمدەگەن كۇن نۇرىمەن
قۇلپىرۋدا اينالام.
ەل قاۋىشىپ ءبىر-بىرىمەن
ناۋرىز تويىن تويلاعان.
جىلدى قارسى اپ جۇرتىم جاتىر,
سالتىمىز سول باياعى.
كۇن تەڭەلىپ ءتۇن ءتۇردى اقىر,
ايعا اڭسار اۋادى.
داستارقانىن ءبارى اياماس,
ۇلت ءداستۇرى بار تاعى –
جەتى ءتۇرلى ءدام ارالاس
جىل كوجەسىن تارتادى.
كەل, ناۋرىزىم! جاڭا شىراي,
جەر-دۇنيەنى جاساندىر,
كوپتەن بەرى ءدال وسىلاي
تامسانىپ ەك قاشان ءبىر.
سامعاپ عالام كوگىنە ەركىن
شىعا بەرسىن تەك تورگە,
ۋا, جاساعان, مومىن ەلدىڭ
قۋانىشىن كوپ كورمە!
ادامداردىڭ الىپ-ۇشقان
اپپاق كوڭىل كۇيىن ءبىل.
ساقتاپ ءساتىن ساعىنىسقان,
ۇزاعىنان ءسۇيىندىر!
ءۇمىت بيتەنوۆا
جامبىل وبلىسى,
قاراتاۋ قالاسى
