بۇل قالادا بيىلعى ناۋرىز مەرەكەسى كەڭ اۋقىمدا, ايرىقشا اتالىپ وتكەنى بەلگىلى. وعان سەبەپ, تۇركىستاننىڭ بيىل تۇركى الەمىنىڭ مادەني استاناسى بولىپ جاريالانۋى جانە وعان بايلانىستى سالتاناتتى جيىننىڭ ناۋرىز مەيرامىمەن تۇسپا-تۇس كەلۋى.
قاسيەتتى تۇركىستانداعى بۇل ناۋرىز جۇرتشىلىقتىڭ ەرەكشە نازارىن اۋداردى. 21 ناۋرىز كۇنى وبلىس اكىمى جانسەيىت تۇيمەباەۆ «تۇركىستان - تۇركى الەمىنىڭ مادەني استاناسى» شاراسىن سالتاناتتى تۇردە اشىپ, ناۋرىز مەرەكەسىنە ارنالعان تۇركى الەمىنىڭ «ناۋرىزناماسىنا» قاتىسقان بولاتىن. اتالعان شاراعا 23 مەملەكەتتەن كەلگەن 300-گە تارتا شەتەلدىك قوناقتار, حالىقارالىق ۇيىم وكىلدەرى, قازاقستاندىق زيالى قاۋىم جانە ونەر تۇلعالارى, بۇقارالىق اقپارات قۇرالدارى مەن وڭتۇستىكقازاقستاندىق تۇرعىندار, ياعني, جالپى سانى 10 مىڭعا جۋىق ادام قاتىستى. ولاردىڭ ىشىندە, قر مادەنيەت جانە سپورت ءمينيسترى ارىستانبەك مۇحامەدي ۇلى مەن «تۇركسوي» حالىقارالىق ۇيىمىنىڭ باس حاتشىسى دۇيسەن قاسەيىنوۆ جانە ءار ەلدىڭ جوعارى لاۋازىمدى رەسمي وكىلدەرى بار.
مەرەكەلىك شارالاردان تۇسىرىلگەن ۆيدەوروليكتى وڭتۇستىك قازاقستان وبلىسىنىڭ اكىمدىگى جۇكتەگەن. وندا تۇركىستانداعى ناۋرىزدا مادەنيەت جانە اقپارات ءمينيسترى ارىستانبەك مۇحامەدي ۇلى مەن وبلىس اكىمى جانسەيىت تۇيمەباەۆتىڭ مەرەكەدە بيلەپ, ءان سالعان حالىق ىشىندە جۇرگەنى كورىنەدى.
