ماڭعىستاۋ وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ك.ورالباەۆانىڭ ايتۋىنشا, وبلىستىق بالالار اۋرۋحاناسى ۇجىمى «ناۋرىزىم - ۇلتتىق ايشىعىم» بايقاۋىن جاريالاپ, قاتىسۋشىلار قازاقستاننىڭ ءار ءوڭىرىنىڭ سالت-ءداستۇرى, تاريحى مەن تابيعي بايلىقتارى, ۇلى وتان سوعىسىنىڭ ارداگەرلەر, تانىمال سپورتشىلارى, زيالى تۇلعالارى تۋرالى تانىمدىق سۇراقتارعا جاۋاپ بەرۋدەن سايىسقا ءتۇستى. باس جۇلدەنى باتىس قازاقستان تۋرالى سۇراقتارعا جاۋاپ بەرگەن تراۆموتولوگيا جانە لور بولىمشەسى ۇتىپ السا, 1-ورىندى اتىراۋ وبلىسى تۋرالى سۇراقتارعا جاۋاپ بەرۋمەن جۇلدەگەر اتانعان اكىمشىلىك توبى جەڭىپ الدى. ال, 2-ورىندى ماڭعىستاۋ وبلىسىنا قاتىستى سالت-ءداستۇر, مادەنيەتكە قاتىستى ساۋالدارعا جاۋاپ بەرۋمەن قىزىقتىرعان جان ساقتاۋ ءبولىمى يەلەنسە, جامبىل وبلىسىنىڭ تاريحى مەن مادەنيەتىن ايتقان جۇيكە جۇيەسى اۋرۋلارى ءبولىمى جۇلدەگەرلەر توبىن تياناقتادى.
ناۋرىزدىڭ ايشىقتى شاراسى ماڭعىستاۋ وبلىستىق جۇقپالى اۋرۋلار اۋرۋحاناسىندا جالعاسىن تاپتى. مۇندا قوناقتاردى ۇلتتىق كيىم كيگەن قىزدار بۇرالا قارسى السا, كەلىندەر سالەم ەتىپ, ورتا جاستاعى انالار شاشۋ شاشىپ قارسى الدى. ۇيىمداستىرۋشىلار قوناقتارعا ءوز قولدارىمەن دايىندالعان ۇلتتىق اتعام تۇرلەرىن ۇسىنىپ, كونتسەرتتىك باعدارلاماسىن ۇسىندى جانە اتالمىش اۋرۋحانانىڭ قىزمەتكەرلەرى ءوز ارالارىنداعى كوپ بالالى وتباسىلارعا قايىرىمدىلىق قولداۋ كورسەتكەن.
150-گە جۋىق ادام جۇمىس جاسايتىن ماڭعىستاۋ وبلىستىق ناركولوگيالىق ديسپانسەر ۇجىمى ناۋرىز تويدىڭ ءسانىن اسىرا ءتۇستى. ديسپانسەردەگى 5 ۇجىم ءوزارا ۇلتتىق كيىمدەر مەن ورىنداۋشىلىق شەبەرلىكتەرىن ورتاعا سالىپ, جارىس الاڭىنا شىقتى. ديسپانسەردىڭ ارداگەرلەرىن شاقىرىپ, قۇرمەت كورسەتتى. ال, مەرەكەنى تويلاۋدى امال كۇنىنەن, ياعني 14 ناۋرىزدان باستاپ كەتكەن جاڭاوزەن قالالىق №2 ەمحاناسى قىزمەتكەرلەرى جۇمىسقا ۇلتتىق كيىممەن كەلىپ, مەرەكە قارساڭىندا تەتارلاندىرىلعان قويىلىمدار قويدى.
قازىرگى تاڭدا 4 جاسقا دەيىنگى 19 بالا تاربيەلەنىپ جاتقان بالالار ءۇيى بولسا زالعا ارنايى كيىز ءۇي تىگىپ, بالالارعا ارناپ داستارحان جايىپ, سىيلىقتار ۇلەستىردى.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
