ەكى ميلليونىنشى تۇرعىننىڭ اتا-اناسى جارقىناي ەمەناقىنوۆا مەن دياس شورمانوۆتىڭ وتباسىن وبلىس اكىمى اماندىق باتالوۆ ارنايى بارىپ قۇتتىقتادى.
- ناۋرىز مەيرامى ەجەلدەن جاڭا ءومىردىڭ, تىڭ تىرشىلىكتىڭ, ءۇمىت پەن سەنىمنىڭ باستاۋى سانالادى. سوندىقتان ناۋرىزدىڭ شىعىس حالىقتارىندا جاڭا جىل رەتىندە اتالىپ ءوتىلۋى ورىندى. جاڭا جىلىمىز الماتى وبلىسىندا ەكى ميلليونىنشى تۇرعىننىڭ ومىرگە كەلۋىمەن باستالىپ وتىر. ءسابيدىڭ جارىق دۇنيەگە كەلۋى – وتباسى ءۇشىن ارقاشان ەرەكشە وقيعا, ال وبلىستىڭ ەكى ميلليونىنشى تۇرعىنىنىڭ ومىرگە كەلۋى – ءوڭىرىمىز ءۇشىن تاريحي ءسات. ءسابيدىڭ اتا-اناسىن شىن جۇرەكتەن قۇتتىقتايمىن. ءبىزدىڭ كىشكەنتاي نارەستەلەرىمىزدىڭ ەلىمىزدە بولاشاعى زور, ەرتەڭى ايقىن بولادى دەپ سەنەمىن! – دەگەن اماندىق باتالوۆ جاس وتباسىنا ەكى بولمەلى پاتەردىڭ كىلتى مەن نارەستەگە قاجەتتى زاتتاردى سىيعا تارتتى.
«ءاربىر انا ءۇشىن ءسابيدى ومىرگە اكەلۋ – ۇلكەن مەرەكە. مەن ءۇشىن دە بۇگىنگى كۇن ەرەكشە ماڭىزدى. ەكى بولمەلى پاتەر سىيلاپ قۋانىشىمدى ەكى ەسەلەپ تاستادىڭىزدار. وتباسىمنىڭ اتىنان انا مەن بالاعا, دەنى ساۋ ۇرپاق دۇنيەگە اكەلۋگە بارلىق جاعدايدى جاساپ وتىرعان مەملەكەت باسشىسىنا زور العىسىمدى بىلدىرەمىن. ءسابيلى بولۋمەن قاتار ءۇيلى دەپ بولىپ جاتىرمىز. «ءار بالا ءوز نەسىبەسىمەن تۋادى» دەگەندى بابالارىمىز بەكەر ايتپاعان ەكەن. ەلىمىزدىڭ, جەتىسۋ ولكەسىنىڭ دامىپ, گۇلدەنۋىنە شىن جۇرەكتەن تىلەكتەسپىن», - دەگەن جاس انا وبلىس اكىمى ا. باتالوۆقا ۇلىنا ات قويۋدى ۇسىندى. بالاعا نۇرسۇلتان دەگەن ات قويىلدى.
جالپى, الماتى وبلىسىندا جىل سايىن ورتا ەسەپپەن ومىرگە 110-115 مىڭ بالا كەلەدى.
