ۇلىستىڭ ۇلى كۇنى باۋىرلاس ءارى تۋىسقان ەكى حالىقتىڭ اراسىن مەرەكەلىك كوڭىل-كۇيمەن دانەكەرلەيتىن حالىقارالىق جولاۋشىلار جۇردەك پويىزى ەكى اراداعى قاشىقتىقتى نە بارى 16 ساعات 30 مينۋتتا ءجۇرىپ وتپەك.
بۇل شارا جوعارى دارەجەدەگى مەملەكەتارالىق كەلىسىم اياسىندا «قازاقستان تەمىر جولى» اق مەن «ۋزبەكيستون تەمير يۋللاري» اق دەلەگاتسيالارىنىڭ تاشكەنتتە وتكەن سوڭعى كەزدەسۋىنەن كەيىن جۇزەگە اسىپ وتىر.
بۇدان بىلاي №1-2 حالىقارالىق جولاۋشىلار جۇردەك پويىزى الماتىدان دۇيسەنبى, سەنبى كۇندەرى, ال تاشكەنتتەن جەكسەنبى, سەيسەنبى كۇندەرى تۇراقتى تۇردە جولعا شىعىپ تۇرادى. الماتىدان اتتاناتىن «تۇلپار-تالگو» وزبەكستان استاناسىنا دەيىنگى ارالىقتا قازاقستاننىڭ وتار, شۋ, تاراز, شىمكەنت, سارىاعاش تەمىرجول بەكەتتەرىندە ايالدايدى.
ءبىر ايتا كەتەرلىگى, قازاقستاندا جاسالعان ۆاگونداردىڭ سالوندارى يسپاندىق ەجەلگى «تالگوداعىدان» كەڭ ءارى الەمدىك جاڭا مودەرن تالاپتارعا ساي كەلەدى.
ۇلىق مەرەكە كۇندەرى جولعا شىققان جۇردەك پويىزدىڭ تاعى ءبىر ەرەكشەلىگى – ەكى ەلارالىق كەلىسىمگە سايكەس مۇمكىندىگى شەكتەۋلى جولاۋشىلار مەن ولاردىڭ جاردەمشىلەرى ءۇشىن جول ءجۇرۋ بيلەتىنىڭ قۇنى 70 پايىزعا دەيىن تومەندەتىلىپ ساتىلادى.
تالعات ءسۇيىنباي,
«ەگەمەن قازاقستان»
الماتى
