ءۇشىنشى كۋرستا وقىپ جۇرگەن كەزىم. قاجىعالي دەگەن دوسىم بولدى. «سەنى زەينوللا سەرىكقاليەۆ شاقىرىپ جاتىر» دەيدى ءبىر كۇنى. «ول كىسىنى مەن تانىمايمىن, نەگە شاقىردى ەكەن؟» دەپ قويامىن. وندا زەينوللا سەرىكقاليەۆ «جۇلدىز» جۋرنالىنىڭ جاۋاپتى حاتشىسى. ىزدەپ باردىم. ءۇشىنشى كۋرستىڭ ستۋدەنتىنە «ءسىز» دەپ سويلەدى. «ءسىزدىڭ اڭگىمەڭىزدى «لەنينشىل جاستان» الدىق» دەدى. تالدادى. ماقتاپ وتىر. قازاق جازۋشىلارىنىڭ جيناعىنا بەرگەلى وتىر ەكەن. وسى كىسى مەنى بىرەۋمەن شاتاستىرىپ وتىرعان جوق پا دەپ بەتىنە قاراپ قويامىن. جوق, مەن تۋرالى ايتىپ جاتىر ەكەن. «ءسىزدىڭ ەندى جازباۋعا مورالدىق حاقىڭىز جوق», دەدى ءسوزىنىڭ سوڭىندا. وسىلايشا, ءبىر كۇندە جازۋشى بولىپ شىعا كەلدىم. كىتاپ شىقتى, بەسىنشى كۋرستا. وقىتۋشىلار قۇرمەتپەن قارايتىن بولدى. ءبىز ويلادىق «شىن جازۋشى بولعان ەكەنبىز عوي» دەپ. بىراق, شىن مانىندە ولاي ەمەس…
* * *
العاشقى شىققان ءتاپ-ءتاۋىر شىعارما سەنىڭ بۇكىل جازۋشىلىق تاعدىرىڭدى انىقتاي المايدى. ءوز باسىڭداعى قۋانىش-قايعىڭدى جازعاننان كەيىن سەن وزگەلەردىكىن دە ءدال وزىڭدىكىندەي ەتىپ جازا ءبىلۋىڭ كەرەك. جۇرەگىڭنەن وتكىزىپ جازۋىڭ كەرەك. ال وعان ۋاقىت قاجەت. سول ەكى ورتادا ادامدا ءبىر داعدارىس پايدا بولادى. سوعان توزە بىلۋگە ءتيىستىسىڭ. جوق, جۇرتتىڭ ءبارى جىلدا ءبىر كىتاپ شىعارادى عوي دەپ, سوعان كىرىسىپ كەتسەڭ, باسقا جولعا ءتۇسىپ كەتەسىڭ. ال الگى داعدارىسقا توزسەڭ, سوڭىندا ءبارىبىر ءوزىڭدى تاباسىڭ. سوسىن ءبارى مۇلدە وزگەشە بولادى.
* * *
ەگەر شەندىلەردىڭ قازىرگى تالابىنا سالساڭ, گوگول مەن چەحوۆتى گازەت-جۋرنالدار باسا الماس ەدى. ولار ءومىردى, قوعامدى سىنادى عوي. ەندى ءبىر جازۋشىلار بار, ولار ادەبيەتتى كۇنكورىس قامىنا اينالدىرعىسى كەلەدى. لاۋازىمدى كىسىلەر تۋرالى رومان جازادى, پوەما جازادى. قىسقاسى, ادەبيەتتى اركىم ءار ءتۇرلى تۇسىنەدى. شىندىقتى جازۋ كەرەك دەيمىز. بىراق شىندىقتىڭ ءوزى ءار ءتۇرلى. قاراپايىم عانا شىندىق بار, اششى شىندىق بار. اششى شىندىقتى جازۋ وڭاي ەمەس. وعان دا ازاماتتىق ۇستانىم, باتىلدىق قاجەت.
* * *
جۇرت قازىر ورتاڭقول جازۋشى مەن مىقتى جازۋشىنى اجىراتا الماي قالدى. حالىقتىڭ تالعامى سونى اجىراتاتىنداي دەڭگەيگە ءوسۋى كەرەك دەپ ويلايمىن. بۇگىندە كەڭەس وكىمەتىنىڭ سويىلىن سوققانداردى دا جاقسى دەيمىز, كەڭەس وكىمەتىنە قارسى بولعانداردى دا جاقسى دەيمىز. سانامىزدا قويىرتپاق بار. كەز كەلگەن نارسەگە سىن كوزبەن قاراماساق, باتىل ايتا الماساق, ول قوعام ءالى دە تومەنگى دارەجەدە دەگەندى بىلدىرەدى.
* * *
مەنىڭ جازۋشىلىق كرەدوم – اقيقاتتان اسقاق ەشتەڭە دە جوق.
ازىرلەگەن
ايگۇل سەيىلوۆا,
«ەگەمەن قازاقستان»
