ۇلگىلى ۇيدەن ۇيرەنەيىك!

ورال قالاسى دىنمۇحامەد قوناەۆ اتىنداعى شاعىن اۋداندا ورنالاسقان وسىناۋ كوپ قاباتتى №67 ءۇيدىڭ وزگە عيماراتتاردان ەش ايىرماشىلىعى جوق. بىراق بۇل سىرتتاي قاراعاندا عانا. ال ەسىكتەن ىشكە ەنسەڭىز, تاپ-تازا جيناقىلىققا, ءار قا­باتتا قازاق تىلىندە جازىلعان عيبراتتى سوزدەرگە تاپ بولاسىز. ءار قاباتقا كوتەرىلگەن سايىن ءسىزدى «تا­زالىق تابالدىرىقتان باستالادى», «تازالىقتى ساقتاۋ – بارشانىڭ ءىسى!», «ادەپتى بالا – ارلى بالا», «تازا­لىق – ساۋلىق نەگىزى, ساۋلىق – بايلىق نەگىزى», « ۇلى جول ءۇيىڭنىڭ تابال­دىرىعىنان باستالادى» دە­گەن­دەي ناقىل سوزدەر جازىلعان تاقتايشا قارسى الادى. بۇل جازبالاردى ءوز قارجىسىنا جاساپ, ورنا­لاستىرعان – جاھانشا دوس­مۇحامەد ۇلى اتىنداعى ورال پەداگوگيكالىق كوللەدجىنىڭ وقىتۋ­شى­سى نۇرلان حامزين بولىپ شىقتى. ول تەح­نولوگيا بەينەلەۋ ونەرى ءپانىنىڭ مۇعالىمى. – ءبىزدىڭ ءۇيىمىز 2009 جىلى قاڭتار ايىندا پاي­دالانۋعا بەرىلدى. مەملەكەتتىك باعدارلاما ارقىلى يپوتەكاعا الدىق. بۇعان دەيىن وتباسىمىزبەن ءار جەردە پاتەر جالداپ كەلگەنبىز. ءوز ءۇيىمىزدىڭ, ءوز باسپانامىزدىڭ تازالىعى, ءتارتىبى ءۇشىن قولىم­نان كەلىپ تۇرعان ونەرىمدى نەگە ايايىن؟! بۇل جازبالار كورشى­لەرىمىزگە دە اسەر ەتەتىن سياقتى. كىرە­بەرىسىمىز, باس­پالداعىمىز ارقا­شان تاپ-تازا, – دەيدى نۇرلان امانگەلدى ۇلى. – وسىنداي ادەمى, تازا ۇيدە تۇر­عا­نىما قۇدايعا شۇكىر ايتامىن. بالالارىم وسكەنشە, 25 جىل بويى جاتاقحانادا تۇردىق. ەندى, مىنە, ۇل-قىزىم قاتارعا قوسىلىپ, جۇمىس جاساپ, وسى ۇيدەن پاتەر الدىق. كوپ قاباتتى ءۇيىمىزدى ءوز تىلىمىزدە بەزەندىرىپ, اتادان قالعان اسىل ءسوزدى ناسيحاتتاپ جۇرگەن نۇر­لان كورشىمە العىس ايتامىن, – دەي­دى وسى ءۇيدىڭ تۇرعىنى ايگۇل وراز­بەكوۆا. قازبەك قۇتتىمۇرات ۇلى, «ەگەمەن قازاقستان» ورال