«اۋىلدى مەكتەپ ساقتايدى, مەكتەپتى كىم ساقتايدى؟» («ەق», №36, 21 اقپان, 2017 ج.)
«باتىس قازاقستان وبلىسىنىڭ زەلەنوۆ اۋدانى رەسەي فەدەراتسياسىنىڭ ساراتوۆ, سامارا جانە ورىنبور گۋبەرنيالارىمەن شەكارالاس. اۋدان اۋماعىندا جالپى ءبىلىم بەرەتىن 9 مەكتەپ كورشى مەملەكەتپەن اراداعى شەكارالىق ايماقتا جاتىر. ولار: ەگىندىبۇلاق ورتا مەكتەبى, پەرۆوسوۆەت ورتا مەكتەبى, ق.احميروۆ اتىنداعى ورتا مەكتەپ-بالاباقشاسى, چۋۆاش ورتا مەكتەبى, رازدولنىي ورتا مەكتەبى, چيروۆ نەگىزگى مەكتەبى, كيرسانوۆ نەگىزگى مەكتەبى, سۇلۋكول نەگىزى مەكتەبى جانە چينارەۆ باستاۋىش مەكتەبى. 10 جىل ىشىندە اۋدانداعى شەكارالىق اۋىل مەكتەپتەرىندەگى بالا سانى ەداۋىر تومەندەپ, 960-تان 623-كە ازايعان. 1997 جىلدان بەرى 15 مەكتەپ: بەلوگلينسك, تالوۆ, كراسنوپارتيزان, روجكوۆ, پەتروۆ, حامينسك, كراسنوۋرال, كوجەۆنيكوۆ, سپارتاك, ششۋچكينسك, چەسنوكوۆ (ەگىندىبۇلاق ا/و), كراسنوسۆەت, بالابانوۆ جانە گرەمياچينسك مەكتەپتەرى جابىلعان. وسىنداي سەبەپپەن 2008 جىلى كيرسانوۆ ورتا مەكتەبى نەگىزگى مەكتەپكە اينالدى, 2009 جىلى چينارەۆ نەگىزگى مەكتەبى باستاۋىش بولىپ قايتا قۇرىلدى, 2012 جىلى چەسنوكوۆ ورتا مەكتەبى وزگەرىپ, سۇلۋكول باستاۋىش مەكتەبىنە اينالدى, 2013 جىلى چيروۆ ورتا مەكتەبى نەگىزگى مەكتەپ بولىپ قايتا قۇرىلدى. ەگىندىبۇلاق, چۋۆاشينسك ورتا مەكتەپتەرىنە, چيروۆ, سۇلۋكول, كيرسانوۆ نەگىزگى مەكتەپتەرىنە «قايتا قۇرۋ» قاۋپى جىل سايىن تونەدى. 2017 جىلى چيروۆ, سۇلۋكول, كيرسانوۆ نەگىزگى مەكتەپتەرىندە وقۋشى سانى ەڭ تومەنگى شەككە تاياپ تۇر. اۋىل مەكتەبىن ساقتاۋ ءۇشىن چيروۆ اۋىلىندا – 10, سۇلۋكولدە 3 وقۋشىنى تۇرعىندار بالالار ۇيىنەن پاتروناتتىق تاربيەگە الىپ, مەكتەپتە بالا سانىن «كوبەيتتى». بىراق, سونىڭ وزىندە وسى وقۋ جىلىندا بىرنەشە وقۋشى اتا-اناسىنىڭ قونىس اۋدارۋىنا بايلانىستى مەكتەپتەن كەتكەلى وتىر. مەكتەپتە وقۋشى سانى ازايۋىنا سوڭعى 20 جىل بويى بۇل اۋىلداردا بالا تۋ كورسەتكىشىنىڭ تومەندەۋى, جۇمىس ورنى, الەۋمەتتىك-مادەني نىسانداردىڭ بولماۋى, جولدىڭ ناشارلىعى, اۋىلدىڭ نەگىزگى كۇرە جولداردان الىس جاتۋى, ينتەرنەت بايلانىستىڭ جوقتىعى, قۇرىلىس سالۋعا, بيزنەس قۇرىلىمدارىن دامىتۋعا قولايسىز بولۋى, مال جانە ەگىن شارۋاشىلىعىن دامىتۋ ءۇشىن بوس جەر تەلىمدەرىنىڭ بولماۋى اسەر ەتتى. بۇدان بولەك, چيروۆ اۋىلدىق وكرۋگىندەگى بالابانوۆ اۋىلىندا ءبىلىم وشاعى بولماعاندىقتان 6 وقۋشى چيروۆقا, كراسنىي سۆەت اۋىلىنان 14 وقۋشى رازدولنىي ورتا مەكتەبىنە, كراسنىي ۋرال اۋىلىنان 11 وقۋشى چۋۆاش ورتا مەكتەبىنە كۇن سايىن تاسىمالدانادى. شالعاي اۋىلدىق وكرۋگىندەگى تالوۆايا مەن كارپوۆ اۋىلدارىندا مەكتەپ جانە باسقا الەۋمەتتىك نىساندار جوق. بۇل اۋىلداردىڭ بالالارى 2016 جىلعا دەيىن اپتا سايىن پەرۆوسوۆەت مەكتەبى جانىنداعى ينتەرناتقا تاسىمالدانىپ كەلگەن ەدى, كەيىن كوشى قونعا, ءتيىستى كونتينگەنتتىڭ ازايۋىنا بايلانىستى 2016 جىلدىڭ قىركۇيەگىندە ينتەرنات جابىلدى. اتالعان اۋىلداردان حالىقتىڭ كوشۋىن توقتاتۋ, ونداعى ءبىلىم مەكەمەلەرىن ساقتاۋ ءۇشىن شەكارالىق ايماقتارداعى مەكتەپتەردە بالا سانى ءليميتىن ازايتۋ كەرەك. مۇنداي اۋىلداردا مەكتەپتىڭ جابىلۋى – سول اۋىلدىڭ تەز ارادا تۇگەلدەي قۇرىپ, جوعالىپ كەتۋىنە اكەلەدى.
سەرىك سافيۋللين, زەلەنوۆ اۋداندىق ءبىلىم بەرۋ ءبولىمىنىڭ باسشىسى
باتىس قازاقستان وبلىسى
