ەكى ويىندا ەسە جىبەردى

استانانىڭ «بارىسى» قۇرلىقتىق حوككەي ليگاسىنىڭ پلەي-وفف كەزەڭىندە ماگنيتوگورسكىدە جەرگىلىكتى «مەتاللۋرگ» كومانداسىمەن كۇش سىناسىپ, 4:5 ەسەبىمەن جەڭىلدى. ماگنيتوگورسكىدە وتكەن ەكىنشى ويىندا استانالىقتار قارقىنىن كۇشەيتۋگە ءتيىستى ەدى. سەبەبى, ەكى كۇن بۇرىن وتكەن العاشقى كەزدەسۋدە ەدۋارد زانكوۆەتس شاكىرتتەرى جەرگىلىكتى حوككەيشىلەردەن 0:4 ەسەبىمەن ويسىراي جەڭىلگەن بولاتىن. بۇل كۇنى «بارىس» بارىن سال­عانىمەن, «مەتاللۋرگ» ءبىرىنشى كە­زەڭدە ءوز مۇمكىندىگىن ءساتتى پاي­دا­لانا ءبىلدى. ەلور­­دالىقتار قارسىلاستار قاق­پا­سىن تورۋىلداپ جۇرگەندە, ولار دانيس زاريپوۆكە شاي­بانى ادەمى جەتكىزىپ بەردى. ول حەن­ريك كارل­س­سون­مەن بەتپە-بەت كەل­گەندە ءمۇلت كەت­كەن جوق. ەسەپتى اشتى: 1:0. ەكىنشى كەزەڭنىڭ باسىندا «بارىس» حوككەيشىلەرى ەسەپتى تەڭەس­تىردى. رومان ستارچەنكو ويىنشى­لاردىڭ باسىمدىعىن شەبەر پاي­دالانا ءبىلدى. كوپ ۇزاماي «مە­تاللۋرگ» حوككەيشىلەرى تاعى دا العا شىقتى. ءۇش مينۋتتان سوڭ نايد­جەل دوۋس ەسەپتى 2:2-گە جەتكىزدى. مارتەن سەن-پەر بولسا, «بارىستىڭ» العا شىعۋىنا مۇمكىندىك جاسادى: 2:3. ءۇشىنشى كەزەڭدە نايدجەل دوۋس ويىن ەرەجەسىن بۇزىپ, «با­رىس» ويىنشىلارى از كۇشپەن قور­عانۋعا ءماجبۇر بولدى. وسىنى ءتيىمدى پايدالانعان «مەتاللۋرگ» حوككەيشىلەرى ەلوردا كلۋبىنىڭ قاقپاسىنا تاعى ءبىر شايبانى توعىتتى. تاعى دا زاريپوۆ كوزگە ءتۇستى. ەسەپ تەڭەستى: 3:3. سالدەن كەيىن سول شتريح قاي­تا­لاندى. تاعى دا نايدجەل دوۋس, تاعى دا دانيس زاريپوۆ. ءبىرىن­شىسى ايىپ ۋاقىتىن وتەۋگە ءماج­بۇر بولسا, ەكىنشىسى حەت-تريك­تىڭ اۆتورى اتاندى. ەسەپ – 4:3. ءبىر ەمەس, ەكى مارتە قارسى­لاس­تاردىڭ شايبا سالۋىنا ايىپتى بولعان نايدجەل دوۋس ويىن اياقتالار تۇستا جانىن سالا وينادى. ماتچتىڭ بىتۋىنە ەكى مينۋت قالعاندا, ونىڭ سول قاپتالدان سوققان شايباسىنا قاقپاشى ۆاسيلي كوشەچكين شاراسىزدىق تانىتتى. وسىلايشا, نەگىزگى كەزەڭ 4:4 ەسەبىمەن اياقتالدى. وۆەرتايم دەگەنىڭىز باق پەن ساتتىلىكتىڭ سەرىك بولۋىنا بايلانىستى دۇنيە عوي. بۇل جولى ەكەۋى دە الاڭ يەلەرى جاعىندا بولدى. سونىمەن, قورىتىندى ەسەپ – 5:4 بولىپ, ماگنيتوگورسك كومانداسىنىڭ ەنشىسىنە جازىلدى. «مەتاللۋرگ» قوس ويىندا دا جەڭىسكە جەتىپ, جارتىلاي فينالعا ءبىر تابان جاقىندادى. ال «بارىس» جارتىلاي فينالعا ءوتۋ ءۇشىن قالعان ەكى ويىندا جەڭىسكە جەتۋ كەرەك. جالپى, جارتىلاي فينالدىڭ تاعدىرى 4 جەڭىس ارقىلى شەشىلەدى. «بارىس» پەن «مەتاللۋرگ» كوماندالارى 13 جانە 15 ناۋرىز كۇندەرى استانادا كەزدەسەتىن بولادى. ايان ءابدۋالي, «ەگەمەن قازاقستان»