«ناۋرىزناما» تويى تۇركىستاندا وتەدى

بيىل ۇلىستىڭ ۇلى كۇنى – 22 ناۋ­رىز مەرەكەسى وڭتۇستىك قازاقستان وبلىسىندا جىلداعىمەن سالىس­تىرعاندا ەرەكشە وتپەك. دالىرەگى تۇركى ەل­دەرىنەن كەلەتىن مارتەبەلى مەيمان­دار تۇركىستاندا باس قوسادى. بىلتىر تۇركىستان تۇركى الەمىنىڭ 2017 جىلعى مادەني استاناسى بولىپ تاڭدالعانى بەلگىلى. مۇنداي مارتەبەگە بۇعان دەيىن استانا, تۇركيانىڭ ەسكىشاحار, تاتارستاننىڭ قازان, تۇرىكمەنستاننىڭ مارى جانە ازەربايجاننىڭ شەكي قالاسى يە بولعان. ەلدىڭ ابىرويىن اسىراتىن بۇل جاۋاپكەرشىلىكتى جاقسى سەزىنە بىلگەن تۇركسوي حالىقارالىق ۇيىمى, مادەنيەت جانە سپورت مينيسترلىگى, وڭتۇستىك قازاقستان وبلىسىنىڭ اكىمى جانسەيىت تۇيمەباەۆ تاراپىنان اتالعان جوبا اياسىندا اتقارىلاتىن ءىس-شارالاردىڭ جوسپارى بەكىتىلگەن. تۇركىستاندا بيىل 40 شاقتى اۋقىمى زور مادەني ءىس-شارا جوسپارلانۋى وسىنىڭ ايعاعى. – 21 ناۋرىزعا جوسپارلانعان «ناۋرىز­ناماعا» 22 تۇركىتىلدەس ەلدەن شاقىرىلعان مىڭعا جۋىق ادام قاتىسادى. 230-دان استام ونەر ۇجىمى شاقىرىلعان. سونداي-اق, ەلىمىزدىڭ 16 وبلىس, قالالارىنان جانە وبلىستىڭ بارلىق اۋدان, قالالارىنان ارنايى دەلەگاتسيالار قاتىسادى, – دەدى وبلىستاعى ءاز-ناۋرىزعا ازىرلىك شاراسىنا توقتالعان وڭتۇستىك قازاقستان وبلىسى اكىمىنىڭ ورىنباسارى ۇلاسبەك سادىبەكوۆ وڭىرلىك كوممۋنيكاتسيالار قىزمەتىندە وتكىزگەن بريفينگتە. وسى شارا بارىسىندا تۇركىستاندا ق.ا.ياساۋي اتىنداعى حقتۋ-دىڭ مادەنيەت ورتالىعىندا رەسمي قوناقتاردىڭ قاتىسۋىمەن «تۇركىستان جانە تۇركولوگيا» اتتى حالىقارالىق عىلىمي-تەوريالىق كونفەرەنتسيا وتەدى. جالپى, بيىل ناۋرىز مەرەكەسى وڭتۇستىكتە ءبىر اپتا تويلانادى. ءىس-شارالاردىڭ لەگى 15 ناۋرىزدا «ناۋرىز پاتيدان» باستاۋ الماق. بۇل شارانىڭ اياسىندا ءتۇرلى ۇلت وكىل­دەرى ناۋرىز كوجە دايىنداۋدان جارىسسا, ۇلتتىق ونەر كۇنىندە قولونەرشىلەردىڭ قولىنان شىققان كادەسىيلاردىڭ جارمەڭكەسى ۇيىمداستىرىلادى. ۇلتتىق انيماتسيا مەن كينوتۋىندىلاردىڭ كورسەتىلىمى دە وسى ەكىنشى كۇنگە بەلگىلەنىپ وتىر. 17 ناۋرىزدا «قوش كەلدىڭ, ءاز-ناۋرىز» مەرەكەلىك شاراسى اياسىندا جوعارى جانە ورتا ارناۋلى وقۋ ورىندارى مەن مەكتەپتەردە جاستاردىڭ بويىن­دا پاتريوتتىق سەزىمدى قالىپتاستىراتىن ءتۇرلى مەرەكەلەر وتەدى. تازالىق اكتسياسى مەن قايىرىمدىلىق شارالارىنا دا ءبىر-ءبىر كۇن ارنالادى. 19 ناۋرىزدا جۇرت ۇلتتىق ونىمدەردىڭ جارمەڭكەسىنە بارادى. ۇلىستىڭ ۇلى كۇنىن تويلاۋ 22 ناۋ­رىزدا شىمكەنتتەگى ناۋرىز الاڭىندا جالعاسادى. عالىمجان ەلشىباي, «ەگەمەن قازاقستان»