«كوك بازار» قايتا اشىلدى

الماتى قالاسى كاسىپكەرلىك جانە يندۋس­تريالىق-يننوۆا­تسيالىق دامۋ باسقار­ماسىنىڭ ايتۋىنشا, اشىلعان ساۋدا ورىن­دارىنىڭ الاڭى شامامەن 20 مىڭ شارشى مەتردى قۇرايدى. ونىڭ 10 مىڭ شارشى مەترى ساۋدا الاڭىنا تيەسىلى بولسا, 10 مىڭ شارشى مەترى 400 كولىك قويۋعا ارنالعان ەكى بەلدەۋلى اۆتوتۇراققا قاراماق. قۇنى شامامەن 2,5 ملرد تەڭگەنى قۇراعان جوبا 500-دەن استام ادامدى جۇمىسپەن قامتىعالى وتىر. بۇل ساۋدا ورتالىعىن سالۋ تۋرالى شەشىم 2015 جىلى قابىلدانعان ەدى. جاڭا ورتالىق ورنىندا بۇرىن اشىق اسپان استىنداعى كوكونىس-جەمىس ساتاتىن ساۋدا ورىندارى ورنالاسقان بولاتىن. «كوك بازار» ديرەكتورى ەرلان قاليەۆ جاڭا سالىنعان ساۋدا كەشەنى سوڭعى ۇلگىدەگى ورتكە قارسى تەحنيكالارمەن جانە جەلدەتۋ جۇيەلەرىمەن جاب­دىقتالعانىن جەتكىزدى. «ءبىز ساۋ­دا ورىندارىن جالعا الۋشىلارعا, وسى جەردەن قاجەت تاۋارلاردى ساتىپ الۋعا كەلەتىن تۇتىنۋشىلار مەن تۋريستەرگە جاقسى جاعداي جاساي الدىق دەپ ويلايمىن. جاڭعىرتۋ جۇمىستارى ءالى دە جالعاسىن تاباتىن بو­لادى. مى­سالى, ەسكى عيماراتقا, بازار­عا جىبەك جولى كوشەسى جاعىنان كىرەتىن تۇسقا جوندەۋ جۇمىستارى ءجۇر­گىزىلمەك. دەگەن­مەن, ونىڭ ءبارى ءبىر­تىندەپ جۇزەگە اسىرى­لاتىن شارۋالار», – دەدى ول. ايتا كەتسەك, الماتى قالا­سىنداعى بارلىق ساۋدا بازارلارىنا جاڭعىرتۋ جۇمىستارىنىڭ جۇرگىزىلۋى ەلباسىنىڭ ساۋدانى زامانعا ساي ۇلگىگە اۋىستىرۋ جونىندەگى تاپسىرماسىن ورىنداۋ ماقساتىندا جۇزەگە اسىرىلۋدا. ميرا بايبەك, «ەگەمەن قازاقستان» الماتى