كونستيتۋتسيانىڭ 26-بابى وزگەرتىلمەۋى مۇمكىن

كونستيتۋتسيانىڭ 26-بابى ەسكى رەداكتسيادا قالۋى مۇمكىن. بۇل تۋرالى بۇگىن بيلىك تارماقتارى اراسىنداعى وكىلەتتىكتى قايتا ءبولۋ جونىندەگى جۇمىس توبىنىڭ وتىرىسىنان كەيىن باق وكىلدەرىنە سۇحبات بەرگەن د.قوناەۆ اتىنداعى ەۋرازيا زاڭ اكادەمياسىنىڭ رەكتورى ءومىرالى جالايىري ءمالىم ەتتى, دەپ حابارلايدى قازاقپارات. «كونستيتۋتسيانىڭ 26-بابىنا ەنگىزىلۋى كوزدەلگەن تۇزەتۋ شىن مانىندە قوعام تاراپىنان ۇلكەن رەزونانس تۋدىردى. كوپتەگەن ازاماتتار ونى جەرمەن بايلانىستىردى. سوندىقتان بۇگىنگى وتىرىس بارىسىندا جۇمىس توبىنىڭ مۇشەلەرى تاراپىنان بۇل تۇزەتۋدى الىپ تاستاۋ تۋرالى ۇسىنىس جاسالدى. مەنىڭشە, كونستيتۋتسيانىڭ 26-بابى ەسكى رەداكتسيادا قالاتىن بولادى»,- دەدى ول. ايتا كەتەيىك, بۇگىنگى وتىرىس بارىسىندا قر پرەزيدەنتى اكىمشىلىگىنىڭ باسشىسى, جۇمىس توبىنىڭ جەتەكشىسى ادىلبەك جاقسىبەكوۆ كونستيتۋتسيانىڭ 26-بابىنا قاتىستى ۇسىنىستار مول بولعانىن اتاپ وتكەن ەدى. «بۇل ماسەلەگە قاتىستى اشىق پىكىرتالاس بولدى. پىكىرلەر ءارتۇرلى. ازاماتتاردىڭ ءبىر بولىگى بۇل نورمانى وڭ باعالاپ وتىر نەمەسە وزدەرىنىڭ رەداكتسيالارىن ۇسىنادى. دەگەنمەن, كوپشىلىگى 26-باپقا وزگەرتۋ ەنگىزۋبەۋدى سۇراۋدا», - دەگەن ەدى ول. ال اتالعان جۇمىس توبىنىڭ تاعى ءبىر مۇشەسى, قازاق گۋمانيتارلىق زاڭ ۋنيۆەرسيتەتى ازاماتتىق-قۇقىقتىق زەرتتەۋلەر عىلىمي-زەرتتەۋ ينستيتۋتىنىڭ ديرەكتورى تولەش قاۋدىروۆتىڭ ايتۋىنشا, 26-باپقا قاتىستى قازاقستان پرەزيدەنتى تاياۋ كۇندەرى ناقتى شەشىم قابىلدايتىن بولادى. «ءبىر ايعا سوزىلعان كونستيتۋتسيالىق رەفورمالاردى تالقىلاۋ پروتسەسى بۇگىن اياقتالدى. جوبانى باستان-اياق قايتا قاراپ شىقتىق. كوميسسيا مۇشەلەرى ءبىراۋىزدان جوبانىڭ 99 پايىزىن قابىلدادى دەپ ايتۋعا بولادى. اتىشۋلى 26-باپقا بايلانىستى سوڭعى شەشىم قابىلدانعان جوق. وعان قاتىستى پرەزيدەنتىمىزدىڭ شەشىمى بولادى. وسىدان كەيىن قۇجات پارلامەنتكە ەنگىزىلەدى»,- دەدى ول. ونىڭ اتاپ وتۋىنشە, ەل ازاماتتارىنان كونستيتۋتسيالىق رەفورماعا بايلانىستى 6 مىڭنان استام ۇسىنىس كەلىپ تۇسكەن. ولار كونستيتۋتسيانىڭ 98 بابىنىڭ 63 بابىنا قاتىستى بولدى. «ۇسىنىستار جان-جاقتى. ۇكىمەتتىڭ قىزمەتىنەن باستاپ, قۇقىق قورعاۋ ورگاندارىنىڭ, سوتتاردىڭ جاستارىنا قاتىستى دا ماسەلەلەرگە حالىق قىزىعۋشىلىق تانىتقان. ەل بويىنشا ءارتۇرلى دەڭگەيدەگى 200-دەن استام وتىرىس ءوتتى. جالپى, 2 مىڭ ادام ءتۇسىندىرۋ جۇمىستارىنا اتسالىستى. كونستيۋتسيالىق رەفورما قوعام تاراپىنىڭ زور قىزىعۋشىلىق تۋىنداتتى دەپ ايتۋعا بولادى», - دەدى قاۋدىروۆ. سونىمەن قاتار ول باق وكىلدەرىنىڭ 26-باپقا قاتىستى ناقتى شەشىم قاشان قابىلدانادى دەگەن ساۋالىنا دا جاۋاپ بەردى. «پرەزيدەنت بۇگىن نە ەرتەڭ 26-باپقا قاتىستى ءوز شەشىمىن شىعارادى. ەلباسىنىڭ پايىمىنشا, ءبىرىنشى كەزەكتە حالىقتىڭ پىكىرىن, كوزقاراسىن ەسكەرۋ قاجەت. كونستيتۋتسيا 100 پايىزدىق كەلىسىمنىڭ ناتيجەسى بولۋى ءتيىس. مەنىڭشە, بۇكىل حالىقتىڭ ريزاشىلىعىن تۋدىراتىن شەشىم قابىلدانادى»,- دەدى ينستيتۋت ديرەكتورى.