ەلىمىزدە 800-دەن استام ادام راقىمشىلىققا ءىلىندى

قازاقستاندا راقىمشىلىق زاڭىن جۇزەگە اسىرۋدىڭ نەگىزگى ساتىسى باستالدى, دەپ حابارلايدى «قازاقپارات». «2017 جىلدىڭ 1 ناۋرىزى كۇنى قر راقىمشىلىق تۋرالى زاڭى قابىلدانعاننان باستاپ, بارلىعى توعىز مىڭنان استام ماتەريال سوتتا قارالدى. سونىڭ ىشىندە رەسپۋبليكادا 800-دەن استام سوتتالۋشى بوستاندىققا شىقتى. قوعامنان وقشاۋلانباي, پروباتسيالىق باقىلاۋدا جازاسىن وتەپ جۇرگەن تاعى ءۇش مىڭ ادام سوتتىڭ شەشىمىمەن بوساتىلدى», - دەپ حابارلادى رەسپۋبليكالىق پەنيتەنتسيارلىق جۇيە ۆەدومستۆوسىندا. اتالىپ وتكەندەي, 1,2 مىڭنان استام سوتتالۋشىنىڭ جازاسىن وتەۋ مەرزىمى قىسقارتىلدى. سونىمەن قاتار, ءتۇرلى سەبەپتەرمەن 60-تان استام سوتتالۋشىنىڭ ءوتىنىشى قابىلدانبادى. ولاردىڭ كوبىسى قىلمىس سالدارىنان كەلتىرىلگەن زالالدى وتەمەگەن. «الايدا, راقىمشىلىق زاڭىندا قاراستىرىلعان ۋاقىت ارالىعىندا زالال وتەلسە, سوتتالۋشىنىڭ سوتقا قايتا ءوتىنىش بەرۋگە مۇمكىندىگى بار», - دەپ اتاپ ءوتتى قاج كوميتەتى.