اقوردادا كونستيتۋتسيالىق رەفورما بويىنشا وتىرىس باستالدى

اقوردادا بيلىك تارماقتارى اراسىنداعى وكىلەتتىكتەردى قايتا ءبولۋ جونىندەگى جۇمىس توبىنىڭ قورىتىندى وتىرىسى باستالدى. ونى قازاقستان پرەزيدەنتى نۇرسۇلتان نازارباەۆ اشتى. "مەن حالىققا كونستيتۋتسيا تۋرالى ۇندەۋ جاريالاعاننان بەرى ءبىر اي ۋاقىت ءوتتى. وسى ارالىقتا جۇمىس توبى كوپ ءىس اتقاردى. كونستيتۋتسياعا ەنگىزىلەتىن جوبالاردى تىڭداۋ, تالقىلاۋ بولدى, كوپ ۇسىنىس ەنگىزىلدى. وسىنىڭ ءبارىن قاراپ, اراسىندا جۇمىس توبىنىڭ مۇشەلەرىمەن دە كەزدەسىپ, كوپ ماسەلەلەردى كەلىسىپ وتىردىق. كەلىپ تۇسكەن ۇسىنىستار بارلىق جەردە مۇقيات قاراستىرىلدى", - دەدى پرەزيدەنت. سونىمەن قاتار نۇرسۇلتان نازارباەۆ ءوزىنىڭ تاپسىرماسىمەن كونستيتۋتسياعا وزگەرتۋلەر ەنگىزۋ تۋرالى جوبا بۇكىلحالىقتىق تالقىلاۋعا سالىنعانىن اتاپ ءوتتى. "مەن قوعامدىق پىكىردى مۇقيات باقىلادىم. وسىعان بايلانىستى مەن حالىقتىڭ باسىم بولىگىنىڭ ءبىز ەنگىزگەن وزگەرتۋلەردى قولداعانىن كوردىم. بۇگىن ءبىز ازاماتتاردان كەلىپ تۇسكەن ۇسىنىستاردى, ولاردىڭ پىكىرلەرىن قاراستىرامىز. قورىتىندى شىعارىپ, ءارى قاراي قالاي جۇمىس ىستەيتىنىمىز تۋرالى شەشىم شىعارامىز", - دەدى ول. وسى رەتتە مەملەكەت باسشىسى بۇعان دەيىن پارلامەنت ارقىلى كونستيتۋتسياعا وزگەرىستەر ەنگىزىلگەندىگىن دە ايتتى. «سەبەبى ءبىزدىڭ كونستيتۋتسيامىزدا كونستيتۋتسياعا وزگەرىستەر رەفەرەندۋم ارقىلى دا, پارلامەنت ارقىلى دا ەنگىزۋگە بولادى دەپ ايتىلعان. ونى پرەزيدەنت شەشەدى. سوندىقتان كونستيتۋتسيالىق قۇقىقتى پايدالاندىم. نەگىزگى ساياسي جۇيەگە ايتارلىقتاي وزگەرىستەر ەنگىزەيىك دەپ وتىرعانىمىز جوق. ىستەلىپ جاتقان جۇمىستىڭ بارلىعى ەلىمىزگە, جۇرتىمىزعا كەرەك ەكىنشى دارەجەدەگى ماسەلەلەر بولعاننان كەيىن جۇرتتىڭ بارلىعىن دابىراتپاي كونستيتۋتسيانىڭ تالابى بويىنشا پارلامەنت ارقىلى وتكىزۋدى دۇرىس دەپ سانادىم», - دەدى نۇرسۇلتان نازارباەۆ. سونىمەن قاتار پرەزيدەنت بۇعان دەيىن كونستيتۋتسياعا ەنگىزىلگەن وزگەرىستەر ەلدىڭ دامۋىنا ايرىقشا اسەر ەتكەنىن ايتتى.