پاۆلودارلىق پوليتسەيلەر بالالار وتىرعان اۆتوبۋستى جول اپاتىنان امان الىپ قالدى, دەپ حابارلايدى tengrinews.kz
«باياناۋىل اۋداندىق ىشكى ىستەر ءبولىمى پوليتسياسىنىڭ قىزمەتكەرلەرى قىزمەتتىك Lada Granta كولىگىمەن بالالار وتىرعان اۆتوبۋستى شىعارىپ سالىپ بارا جاتقان. بالالار پاۆلودارداعى شاڭعى جارىسىنا باعىت العان. پاۆلودار-استانا اۆتوجولىندا قالقامان اۋىلىنىڭ ماڭىندا 50 جاستاعى كاماز جۇرگىزۋشىسى قارسى باعىتتاعى جولعا شىعىپ كەتكەن. جۇك كولىگى مەن بالالار وتىرعان اۆتوبۋس سوعىسپاۋى ءۇشىن پوليتسيا ستارشيناسى مۇرات نۇرسەيىتوۆ ويلانباستان قىزمەتتىك كولىكتى جولعا كولدەنەڭ بۇرىپ ۇلگەرگەن. ناتيجەسىندە كاماز پوليتسيانىڭ قىزمەتتىك كولىگىن سوققان», – دەلىنگەن وڭىرلىك پوليتسيا دەپارتامەنتى ءباسپاسوز قىزمەتىنىڭ حابارلاماسىندا.
قىزمەتتىك كولىكتە وتىرعان پوليتسەيلەردىڭ ءبىرى ءتۇرلى جاراقاتتارمەن پاۆلودارداعى اۋرۋحاناعا جەتكىزىلگەن.
قازىرگى ۋاقىتتا بالالاردى قۇتقارۋ ءۇشىن باستارىن قاتەرگە تىككەن پوليتسەيلەردىڭ اتى-جوندەرى انىقتالدى.
پاۆلودار وبلىسى ءىىد پوليتسيا اعا سەرجانتى بايانبەك ءجۇنىسوۆ دەنە جاراقاتتارىن العانىن راستادى. ول اۋرۋحاناعا بارۋدان باس تارتقان. ال ءۇش بالانىڭ اكەسى – پوليتسيا اعا سەرجانتى مۇرات نۇرسەيىتوۆ قازىرگى ۋاقىتتا جانساقتاۋ بولىمىندە جاتىر. ونىڭ جاعدايىن دارىگەرلەر اسا اۋىر دەپ باعالاپ وتىر.
ايتا كەتەيىك, ەرجۇرەك پوليتسەيلەردىڭ ارقاسىندا جول اپاتىنان امان قالعان اۆتوبۋس ىشىندە 18 بالا جانە ولاردى الىپ كەلە جاتقان ءتورت تاربيەشى بولعان.
«پوليتسەيلەر دەنساۋلىعى دۇرىستالعاننان كەيىن ناگراداعا ۇسىنىلادى», – دەدى پاۆلودار وبلىسىنىڭ ءىىد وكىلى.
