• 17 اقپان, 2017

وقو-دا بەس جىلدا 47 مىڭ وتباسى باسپانالى بولماق

200 رەت

كورسەتىلدى

2 مين

وقۋ ءۇشىن

Egemen Qazaqstan

تۇرعىنداردى باسپانامەن قامتۋ بۇگىنگى كۇننىڭ باستى ماسەلەسىنىڭ ءبىرى ەكەنىن ايتقان وڭتۇستىك قازاقستان وبلىسىنىڭ اكىمى ج.تۇيمەباەۆ الداعى 5 جىلدا 4,8 ملن.شارشى مەتر تۇرعىن ءۇي پايدالانۋعا بەرىلىپ, 47 619 وتباسى باسپانالى بولاتىنىن جەتكىزدى.

ەسەپتى جيىندا اكىم باسپانامەن قامتاماسىز ەتۋ بويىنشا قاجەتتىلىكتەردى كەزەڭ-كەزەڭىمەن شەشۋ ءۇشىن 2016 جىلى 530 مىڭ شارشى مەتر تۇرعىن ءۇي تاپسىرىلعانىن ايتسا, وسى جىلى جالپى 700 مىڭ شارشى مەتر بولاتىن تۇرعىن ءۇيدى تاپسىرۋ جوسپاردا تۇرعانىن ايتتى. بۇگىندە 2017 جىلى سالىناتىن 98 كوپ قاباتتى جانە 4 018 جەكە تۇرعىن ۇيلەرگە قاجەتتى ينجەنەرلىك-كوممۋنيكاتسيالىق جەلىلەرمەن قامتاماسىز ەتۋ ءۇشىن بيۋدجەتتەن 11 ملرد. 732 ملن.تەڭگە بولىنەدى. «الداعى 15 جىلدا ەلىمىزدىڭ تۇرعىندارىن تولىعىمەن باسپانامەن قامتۋ ماقساتىندا ەلىمىزدە جاڭادان «نۇرلى جەر» باعدارلاماسى قولعا الىندى. وسى باعدارلاما شەڭبەرىندە جەكە تۇرعىن ءۇي قۇرىلىسى بويىنشا شىمكەنت قالاسىندا پيلوتتىق جوبا رەتىندە ەكى كوتتەدجدى قالاشىقتار سالىناتىن بولادى. ونىڭ ءبىرى 76 گەكتار القاپتا 293 ءۇي ورنالاساتىن «بوزارىق» كەشەنى مەن 180 گەكتار القاپتا 1 050 ۇيمەن «تاسكەن» تۇرعىن ءۇي كەشەنى بوي كوتەرەدى. جالپى 5 جىلدا 529 كوپقاباتتى جانە 25 736 جەكە تۇرعىن ۇيگە ينجەنەرلىك ينفراقۇرىلىم جۇرگىزىلەدى. سونىمەن قاتار, جيىندا اكىم كوپ قاباتتى تۇرعىن ۇيلەردى جاڭعىرتۋ ءاربىر وتباسى ءۇشىن وزەكتى ماسەلە ەكەنىن اتاپ ءوتتى.وسى رەتتە,شىمكەنت قالاسى مەن اۋدان, قالا ورتالىقتارىنىڭ ساۋلەتتىك كەلبەتىن زاماناۋي تالاپتارعا سايكەستەندىرۋ, كوپقاباتتى ۇيلەردىڭ قاسبەتىن جوندەۋ, اۋماعىن اباتتاندىرۋ ماسەلەسى دە وزەكتى كۇيدە تۇر. وبلىستا جالپى 3 152 كوپقاباتتى تۇرعىن ءۇي بار. ونىڭ ىشىندە 1 581 كۇردەلى جوندەۋدى قاجەت ەتسە, 183-ىندە قايتا جاڭعىرتۋ قۇرىلىس جۇمىستارى اياقتالدى. ناتيجەسىندە جوندەۋدى قاجەت ەتەتىن ۇيلەردىڭ ۇلەسى 50,1%-دان 44,4%-عا دەيىن تومەندەتىلدى. الداعى 4 جىلدا جالپى 488 كوپ قاباتتى تۇرعىن ۇيگە كۇردەلى جوندەۋ جۇرگىزىلىپ, جوندەۋدى قاجەت ەتەتىن ۇيلەر ۇلەسىن 28,8 پايىزعا دەيىن تومەندەتۋ كوزدەلۋدە.