جەڭىل سالماقتا WBA (Super) جانە IBO تۇجىرىمدارى بويىنشا الەم چەمپيونى جانات جاقيانوۆقا (27-1, 18 كو) پەتروپاۆلدا ءۇش بولمەلى پاتەردى سىيعا تارتتى. بۇل تۋرالى sputniknews.kz حابارلادى.
جاڭا پاتەردىڭ كىلتىن سولتۇستىك قازاقستان وبلىسىنىڭ اكىمى ەرىك سۇلتانوۆ تابىس ەتتى. ءوڭىر اكىمدىگىنىڭ سايتى بوكسشىنىڭ قوسىمشا اقشالاي سىيلىق العانىن حابارلادى.
33 جاستاعى بىلعارى قولعاپ شەبەرى پەتروپاۆل قالاسىندا تۋىپ, وسىندا تۇرىپ كەلەدى. ونىڭ اناسى, جارى, توعىز ايلىق ۇلى ەردوس پەن ءبىر جارىم جاسار قىزى نۇراي بار. ۋاقىتىنىڭ كوبىن ۇلىبريتانيادا وتكىزەدى. مۇندا ول باپكەر ريككي حاتتونمەن جاتتىعۋ جۇمىستارىن وتكىزەدى.
«جاناتتىڭ جارقىن جەڭىسى, قوس بەلبەۋدىڭ يەگەرى اتانعانىنىڭ ارقاسىندا رەيتينگتە جەرلەسىمىز بەيبىت شۇمەنوۆتەن وزىپ, گولوۆكينمەن ءبىر قاتاردا تۇرۋىنا مۇمكىندىك بەردى. سونىمەن قاتار, كاسىپقوي بوكستا چەمپيوندارى سانى جاعىنان ەلىمىز ۇزدىك بەستىككە ەندى», – دەدى ءوڭىر اكىمى.
ايتا كەتەيىك, 11 اقپان كۇنى اقش-تا جانات جاقيانوۆ امەريكالىق روۋشي ۋوررەندى (14-2, 4 KO) جەڭىپ, WBA (Super), IBO نۇسقالارى بويىنشا جاڭا الەم چەمپيونى اتاندى.
