فيرۋزا ءشارىپوۆا استاناداعى بوكس كەشىندە جۇدىرىقتاسۋى مۇمكىن

EXPO-2017 اياسىندا وتەتىن بوكس كەشىندە قازاقستاندىق بىلعارى قولعاپ شەبەرى فيرۋزا ءشارىپوۆا جۇدىرىقتاسۋ مۇمكىن. بۇل تۋرالى ونىڭ مەنەدجەرى سەرگەي زاۆيلەيسكي مالىمدەدى, دەپ حابارلادى allfight.ru. «EXPO-نى ۇيىمداستىرۋشىلاردىڭ تاراپىنان بوكس كەشىنە قاتىسۋ جايىندا ۇسىنىستار بولمادى. بۇل جايىندا سەرىك ساپيەۆپەن اقىلداسقان بولاتىنبىز. ويىمىز ءبىر جەردەن شىقتى. فيرۋزانىڭ استانادا جەكپە-جەككە شىققانى جاقسى بولار ەدى. ءبىز ءوز تاراپىمىزدان بوكس كەشىنە قاتىسۋعا دايىن ەكەنىمىزدى ايتتىق. ماعان دا, فيرۋزانىڭ وزىنە دە EXPO اياسىندا جەكپە-جەك وتكىزگەن قىزىق بولعالى تۇر», – دەدى زاۆيلەيسكي. «ەگەر جەكپە-جەك وتەر بولسا, فيرۋزا الەم چەمپيونى اتاعى ءۇشىن جۇدىرىقتاسۋى مۇمكىن. 1 ءساۋىر كۇنى سەگىز راۋندقا جالعاساتىن ارالىق جەكپە-جەك وتكىزەدى. مۇمكىن ءبىر اتاق ءۇشىن قولعاپ تۇيىستىرەدى. وسىعان بايلانىستى, كەشە عانا WBC وكىلدەرىمەن سويلەستىم. فيرزۋا 1 ءساۋىر كۇنى قانداي اتاق ءۇشىن جۇدىرىقتاساتىنىن ايتاتىن بولادى, - دەدى بوكسشىنىڭ مەنەدجەرى. ايتا كەتەيىك, كەشە مادەنيەت جانە سپورت ءمينيسترى ارىستانبەك مۇحامەدي ۇلى EXPO-2017 كورمەسىنە ارنالعان بوكس كەشى وتەتىنىن راستاعان بولاتىن. «ارينە, سپورت شارالارى – EXPO اياسىنداعى جەتەكشى ورىندا. بەس الەم چەمپيوناتىن, ەكى ازيا چەمپيوناتىن, پرەزيدەنت كۋبوگتس – تەننيستەن حالىقارالىق ءتۋرنيرىن, "جىبەك جولى - 2017" حالىقارالىق ءرالليىن وتكىزەمىز, ول ماسكەۋدە باستالىپ, كەيىن استان, بەيجىڭگە بارادى. دۇنيەجۇزىلىك بوكس كەڭەسىنىڭ حالىقارالىق مەرەيتويلىق 55-كونۆەنتسياسى مەن بوكس كەشىن وتكىزەمىز», – دەدى مۇحامەدي ۇلى.