2017 جىلى قازاقستاندا 4 سايلاۋ وتەدى

ەلوردادا ورتالىق سايلاۋ كوميسسياسىنىڭ توراعاسى بەرىك يماشەۆتىڭ جەتەكشىلىگىمەن ۆەدوۆستۆونىڭ اشىق وتىرىسى ءوتتى. وبلىستىق, استانا جانە الماتى قالالىق سايلاۋ كوميسسيالارىنىڭ توراعالارى مەن حاتشىلارى, جوعارعى سوت, باس پروكۋراتۋرا, ادىلەت, اقپارات جانە كوممۋنيكاتسيالار, ءبىلىم جانە عىلىم, ىشكى ىستەر, سىرتقى ىستەر مينيسترلىكتەرىنىڭ وكىلدەرى قاتىسقان جيىندا ورتسايلاۋكومنىڭ وتكەن جىلعى جۇمىسى قورىتىندىلانىپ, 2017 جىلعا ارنالعان جۇمىس جوسپارى ناقتىلاندى. كىرىسپە ءسوز العان كوميسسيا توراعاسى مەملەكەت باسشىسى ن.نازارباەۆ ۇسىنعان كونستيتۋتسيالىق رەفورما سايلاۋ ورگاندارىنىڭ قىزمەتىنە ۇلكەن جاۋاپكەرشىلىك جۇكتەيتىنىن اتاپ ءوتىپ, مۇنداي قادام ەلدىڭ ساياسي جۇيەسىن دەموكراتيالاندىرۋ مەن كونستيتۋتسيالىق قۇرىلىستى نىعايتۋ جولىنداعى ماڭىزدى قادام ەكەندىگىن اتاپ ءوتتى. سونداي-اق, القا وتىرىسىندا اعىمداعى جىلدا ەلىمىزدە 4 سايلاۋ ناۋقانى وتەتىندىگى مالىمدەلدى. «بيىلدىڭ وزىندە-اق ءبىز 4 سايلاۋ ناۋقانىن ۇيىمداستىرىپ, وتكىزۋىمىز قاجەت. ونىڭ العاشقىسى وسى كۇندەرى باستالىپ تا كەتتى. ياعني, قازىرگى كەزدە شىعىپ قالعان ءماسليحات دەپۋتاتتارىنىڭ ورنىنا كانديداتتاردى ۇسىنۋ رەسپۋبليكا بويىنشا 58 سايلاۋ ۋچاسكەسىندە وتۋدە. ال سايلاۋ 26 مامىردا وتەدى دەپ جوسپارلانعان. سودان كوپ كەشىكتىرىلمەي 30 ماۋسىمدا 2011 جىلدىڭ 19 تامىزىندا سايلانعان سەنات دەپۋتاتتارىنىڭ ورنىنا كەزەكتى سايلاۋ وتكىزىلۋى ءتيىس. ءۇشىنشى ناۋقان رەتىندە اۋىل وكرۋگتەرىنىڭ قۇرامىنا كىرمەيتىن, قازاقستان رەسپۋبليكاسىنىڭ اۋداندىق ماڭىزداعى قالالارى, اۋىلدىق وكرۋگتەرى, ەلدى مەكەندەرى مەن اۋىلدارى اكىمدەرىنىڭ كەزەكتى سايلاۋىن وتكىزۋ ويىمىزدا بار. جانە سوڭعىسى شىعىپ قالعان ءماسليحات دەپۋتاتتارىنىڭ ورنىنا سايلاۋ وتكىزۋ 29 قازانعا جوسپارلانعان», – دەدى ب.يماشەۆ. وتىرىستا وتكەن جىلى اتقارىلعان شارۋالار مەن 2017 جىلعى سايلاۋلاردى زاڭدىق جانە قارجىلىق قامتاماسىز ەتۋ ماسەلەلەرىنە قاتىستى ارنايى بايانداما جاساعان وسك توراعاسىنىڭ ورىنباسارى ۆلاديمير فووس سەناتورلاردى سايلاۋ ءتارتىبى تۋراسىندا كەڭىرەك توقتالىپ ءوتتى. ونىڭ ايتۋىنشا, ءاربىر وبلىس پەن استانا جانە الماتى قالاسىنان سايلاناتىن سەنات دەپۋتاتىنىڭ جالپى سانى 16 بولادى جانە جوعارىدا اتاپ وتكەن 58 ۋچاسكەنىڭ 13 وبلىستىق, 9 قالالىق جانە 36 اۋداندىق ءماسليحات دەڭگەيىندەگى سايلاۋ ۋچاسكەلەرى بولىپ تابىلادى ەكەن. القالى جيىندا كوميسسيا حاتشىسى ب.مەلدەشوۆ پەن ورتسايلاۋكوم مۇشەسى س.مۇستافينا, ك.پەتروۆ, م.سارسەمباەۆ پەن ل. سۇلەيمەن بايانداما جاساپ, ۆەدومستۆونىڭ الداعى جۇمىسىنىڭ باسىمدىقتارى ايقىندالدى. سونىمەن قاتار, ناقتى باعىتتار بويىنشا قىزمەتتى ۇيىمداستىرۋدىڭ جاڭا نىساندارى مەن ادىستەر-تاسىلدەرى تالقىلاندى. ءسوز سويلەۋ بارىسىندا قوزعالعان تاقىرىپتار اراسىندا سايلاۋ پروتسەسىنە قاتىسۋشىلاردى وقىتۋ, سايلاۋشىلار تىزىمدەرىن قۇرۋ, اۋماقتىق سايلاۋ كوميسسيالارىمەن بەلسەندى ءوزارا ءىس-قيمىلدى قامتاماسىز ەتۋ سىندى وزەكتى ماسەلەلەرگە ەرەكشە كوڭىل ءبولىندى. نۇرلىبەك دوسىباي, «ەگەمەن قازاقستان»