تاعى دا قۇبىر جارىلدى

وبلىس ورتالىعىنداعى قامزين مەن گاگارين كوشەلەرىنىڭ قيىلىسىندا تاعى دا قۇبىر جارىلدى. كوشە تولى سۋ. قالا اكىمدىگى تۇرعىنداردى اۋىز سۋسىز قالدىرماس ءۇشىن ماماندار جۇمىس ىستەۋدە دەپ حابارلادى. قامزين, گاگارين كوشەلەرىنىڭ بويىنداعى تۇرعىن ۇيلەرگە, قامزين مەن سەمەنچەنكو كوشەلەرىنىڭ بويىنداعى جەكە سەكتورداعى ۇيلەرگە سۋ بەرۋ ۋاقىتشا توقتاتىلدى. تۇرعىنداردىڭ ايتۋىنشا, بۇل ارالىقتا قۇبىر ءجيى جارىلادى ەكەن. ال قالالىق «سۋ ارناسى» جشس بىلتىر بۇل جەردەگى ابدەن توزىعى جەتكەن قۇبىرلاردى اۋىستىرىپ, جوندەمەك بولىپتى. بۇعان دەيىن, ياعني 12-13 اقپاندا لوموۆ كوشەسى بويىنداعى سۋ قۇبىرى جارىلىپ, اپات ورىن العانىن جازدىق. پاتەرلەرىمىز سۋسىز, جارىقسىز قالعان-دى. مەكتەپتەردە ساباق توقتاپ, بالاباقشالار جابىلدى. تەك 13 اقپان كۇنى عانا قالاعا سۋ بەرىلگەن. قازىر مۇز قاتقان جاياۋ جۇرگىنشىلەر جولى مەن كوشەلەرگە قۇم سەبىلىپ, قالپىنا كەلتىرۋ جۇمىستارى جۇرگىزىلۋدە. بىلتىر دا قۇبىرلار جارىلىپ, قاقاعان قىستا وبلىس ورتالىعىنىڭ 7,5 مىڭ تۇرعىنى 5 كۇن بويى سۋىق پاتەرلەردە قالعان ەدى. ەندى, مىنە, تاعى سول جاعداي قايتالانىپ وتىر. فاريدا بىقاي, «ەگەمەن قازاقستان» پاۆلودار