قر مادەنيەت جانە سپورت ءمينيسترى ارىستانبەك مۇحامەدي ۇلى اۆستريادا ءوتىپ جاتقان الەم چەمپيوناتىندا قازاقستاندىق بياتلونشىلارعا جاسالعان دوپينگ-سىنامالارىنىڭ قورىتىندىسى جايلى Facebook جەلىسىندەگى پاراقشاسىندا ءبولىستى.
«... دوستار, قازىر عانا بۇكىلالەمدىك انتيدوپينگ اگەنتتىگى (WADA) ءبىزدىڭ بياتلونشىلارىمىزعا جاسالعان دوپينگ-سىنامالارىنىڭ قورىتىندىسى بويىنشا سپورتشىلارىمىزدىڭ قانىنان تىيىم سالىنعان زاتتار شىقپاعانى تۋرالى رەسمي تۇردە قاعاز الدىق! بۇعان دەيىن ايتقانىمداي, سپورتشىلارىمىز تازا!
مەن باسىنان كوماندامىزعا سەنىم ارتتىم جانە سەنىمدى اقتاعانىنا ريزا بولىپ وتىرمىن. بۇل بارىمىزگە ۇلكەن ساباق بولدى. ال مىناۋ WADA قۇجاتتارى, نومىرلەردىڭ استىندا سپورتشىلارىمىزدىڭ ەسىمدەرى جاسىرىلعان», – دەدى مينيستر.
ايتا كەتەيىك, اۆستريادا جەرگىلىكتى جانارماي قۇيۋ بەكەتتەرىنىڭ بىرىندە بەلگىسىز سپورتشىلار مەديتسينالىق قالدىقتار سالىنعان قوراپتار مەن جارىس قۇجاتتارىن تاستاپ كەتكەن. دوپينگكە قارسى ۇلتتىق ورتالىقتىڭ جۇرگىزگەن ساراپتاماسىنىڭ ناتيجەسىندە اتالمىش قوراپتار مەن قۇجاتتار قازاقستان دەلەگاتسياسىنا تيەسىلى ەكەندىگى انىقتالدى.
