تۇلكى گەولوگتاردى جاتىرقامايدى

ۇزىنقۇلاقتان «گەولوگتار لاگەرىندە تۇلكى تۇرىپ جاتىر ەكەن» دەگەندى ەستىسىمەن, دەرەۋ ىزدەستىرە باستاعانبىز. جاڭا كەن ورىندارىن تابۋمەن اينالىساتىن «گەوبايتينفو» جشس-ءنىڭ بارلاۋ پارتياسى بۇگىندە وبلىس ورتالىعىنان تىم شالعاي قاراسۋ اۋدانىنداعى كيروۆ كەن ورنىندا جۇمىس ىستەيدى. وعان ەڭ جاقىن دەگەن ەلدى مەكەننىڭ ءوزى 18 شاقىرىم جەردە ورنالاسقان. قازىر ينتەرنەتتىڭ بارمايتىن جەرى بار ما؟ ءبىز دە وركەنيەتتىڭ وسى جەتىستىگى ارقىلى گەولوگتاردى دەرەۋ تاۋىپ الدىق. بارلاۋ ەكسپەديتسياسىنىڭ مۇشەلەرى تۇراتىن لاگەردى ءبىرازدان بەرى تۇلكىنىڭ ءمىرشايى توڭىرەكتەپتى. گەولوگتار ونى قىزىق كورىپ, پەچەنە, نان بەرسە, انادايدان قاشىپ كەتىپ ءجۇرىپتى دە, بىرتە-بىرتە ادامدارعا ابدەن ۇيرەنىپ العانى سونداي, قازىر تاماقتى ولاردىڭ قولىنان الىپ جەيدى ەكەن. لاگەر اينالاسىنان ۇزاپ كەتپەيدى, ءتىپتى ديزەل ستانساسىنىڭ ءدۇرسىلىن دە شىبىن شاققان قۇرلى كورمەيدى. گەولوگتار ونى ياشكا دەپ اتاپ كەتىپتى. − ءوزى ەرەسەك ەمەس, تۇلكىنىڭ ءالى ءمىرشايى بولسا كەرەك, ءسۇپ-سۇيكىمدى, اسىرەسە, شوشقانىڭ مايى مەن ناندى جاقسى كورەدى. ءوزىمىز تاماقتانعاندا تۇلكىنىڭ سىباعاسىن الىپ قوياتىن بولدىق. ياشكاعا ۇيرەنىپ قالدىق, كەلمەسە كۇتىپ وتىرامىز, − دەيدى گەولوگ ۆلاديمير مولوساي. گەولوگتار نان مەن مايعا, پەچەنەگە, ءتىپتى كونفەتكە ۇيرەنىپ العان قۋ تۇلكى ەندى تىشقان اۋلاۋدى قوياتىن بولار دەپ ويلاپتى. − ول ويىمىز بەكەر ەكەن, ءبىر رەت ياشكانىڭ تىشقان اۋلاعانىنا كۋا بولدىق. بيىككە سەكىرەدى دە, قارعا تۇمسىعىمەن سۇڭگيدى, − دەيدى ۆلاديمير. لاگەر ورنا­لاسقان توڭىرەكتە نەگىزى تۇلكى كوپ, بىراق ولاردىڭ ەشقايسىسى دا بۇلارعا جاقىندامايدى, گەولوگتار ولاردىڭ جورتقانىن الىس­تان عانا قىزىقتايدى. ياشكا عانا تاڭەرتەڭ دە, تۇستە دە, تۇنگە قاراي دا كەلىپ تۇرادى. − وسى جاقىندا ياشكانىڭ اقىلدىلىعىنا تاڭقالدىق, − دەيدى تاعى ۆلاديمير. كۇندىز كەلگەندە ول ءبىز بەرگەن ماي مەن نان­دى تىستەپ العانمەن جەگەن جوق, اپارىپ قارعا كومىپ قويدى. ءمۇم­كىن بىزگە كەلگەندە توق بولعان شىعار, بىراق توقپىن دەپ تاماقتى تاستاي سالمادى, ەرتەڭىن ويلادى-اۋ شاماسى. راسىندا, دالاداعى اڭنىڭ وزىنەن باسقا سەنەرى بول­ماعاندىقتان دا تابي­عات وعان قاعىلەزدىك قاسيەت بەرگەن بولار؟ ياشكا كەلگەن سايىن ۆلاديمير ونى ۇيالى تەلەفونىنا سۋرەتكە ءتۇسىرىپ وتىرادى ەكەن. سونىڭ بىرنەشەۋىن «ەگەمەننىڭ» وقىر­ماندارى كورسىن دەپ, بىزگە دە سالىپ جىبەردى. ءنازيرا جارىمبەتوۆا, «ەگەمەن قازاقستان» قوستاناي