قاردان ءمۇسىن جاساۋدىڭ حاس شەبەرى

اپپاق قاردان جاسالعان مىنا مۇسىندەردى اۋىلدىڭ قاراپايىم تۇرعىنى جاسادى دەگەنگە سەنەسىز بە؟ قۇددى, كاسىبي ءمۇسىنشىنىڭ قولىنان شىققانداي. بۇل تاماشا تۋىندىلاردىڭ اۆتورى نۇرلان ماناقوۆ سەمەيدەن 55 شاقىرىم جەردەگى, بورودۋليحا اۋدانىنا قاراستى كامىشەنكا دەگەن اۋىلدا تۇرادى. بۇگىندە اۋىل جۇرتىنىڭ قىزىعا تاماشالاپ, سۋرەتكە تۇسە­تىن سۇيىكتى ورنىنا اينالعان مۇسىندەردىڭ جاسالۋ تاريحى دا قىزىق. − بۇل مۇسىندەردى نەگىزى نەمەرەمە ارناپ جاساعان ەدىم. ەكى جارىم جاستاعى نەمەرەم: «اتا, ايۋ جاساپ بەرشى» دەپ قيىل­دى ءبىر كۇنى. نەمەرەدەن نەڭدى ايايسىڭ؟ «ويباي-اۋ, سەن ءۇشىن بۇكىل الماتىنىڭ زووپاركىن كوشىرىپ اكەلۋگە دايىنمىن عوي, ق ۇلىنىم!» دەپ ءۇيدىڭ الدىنا اياز اتاسىن, ايۋىن, ارىستانىن, مايمىلىن, اتەشىن جاساپ بەردىم. قازىر اۋىلدىڭ ۇلكەن-كىشىسىنىڭ ءبارى وسىندا كەلىپ فوتوعا تۇسەدى. قىزىق نارسە ەكەن بۇل ءوزى, − دەيدى التىن قولدى ازامات. اۋىلدىڭ كوركىنە اينالعان قار مۇسىندەردى كورگەننەن كەيىن قىزىعۋشىلار قاتارى ارتىپ, «بىزگە دە جاساپ بەرىڭىز» دەۋشىلەر كوبەيىپ, تاپسىرىس قارشا بوراپتى. الايدا, كەزىندە سپورتتى, ونىڭ ىشىندە گرەك-ريم كۇرەسىن جانىنا سەرىك ەتىپ, بۇگىندە جەكە كاسىپكەرلىكپەن اينالىسىپ جۇرگەن كەيىپكەرىمىز بۇعان ۋاقىتىنىڭ جوقتىعىن, قاردان ءمۇسىن جاساۋعا اۋەستىك رەتىندە قارايتىنىن ايتادى. تارباعاتاي اۋدانىنىڭ تۋما­سى كەزىندە اقسۋاتتا تۇرعان شا­عىندا اۋىل بالالارىمەن بىرگە مۇز ايدىنىن جاساپ, قىردىڭ قارا دو­مالاقتارىمەن بىرگە اسىر سالىپ, ءماز-ءمايرام كۇي كەشكەن ءسات­تەرىن دە ساعىنىشپەن ەسكە الدى. − سىرتتان كوز سالعان ادامعا بىلىنبەۋى مۇمكىن. بىراق اق قار, كوك مۇزدان كەلىستىرىپ ءمۇسىن جا­ساۋ دەگەنىڭىز عاجاپ نارسە. ءدۇ­نيەنىڭ بارلىعىن ۇمىتىپ, كا­دىمگىدەي تەرلەپ-تەپشىپ, ەبىل-دەبىلىڭ شىعىپ جۇمىس ىستەيسىڭ. بويىڭ جەڭىلدەپ, ءبىر راحاتتانىپ قالاسىڭ. اقىندار جالىنداتىپ جىر جازىپ, انشىلەر اۋەلەتە ءان شىرقاپ, كۇيشىلەر كۇمبىرلەتە كۇي شەرتىپ وزىنشە شەر تارقاتادى. دەمالادى. بىرەۋلەر اتقا ءمىنىپ, تازى جۇگىرتىپ, ەندى بىرەۋلەر قۇس سالىپ تىنىعادى. اركىمنىڭ ءوزىنىڭ اۋەستىگى بار عوي. بۇل دا سونداي دۇنيە, − دەيدى نۇرلان ماناقوۆ. ازامات قاسىم, «ەگەمەن قازاقستان» شىعىس قازاقستان وبلىسى