تەرىسكەيدىڭ تابيعاتى قىزىقتىرىپتى

وبلىستىق تاريحي-ولكەتانۋ مۇراجايىنا قازاقستانداعى شۆەتسيا كورولدىگى ەلشىلىگىنىڭ «IK Foundation» قورى «اپوستولى ليننەيا» ەنتسيكوپەدياسىن تارتۋ ەتتى. سالتاناتتى راسىمگە ەلىمىزدەگى شۆەتسيا كورولدىگىنىڭ توتەنشە جانە وكىلەتتى ەلشىسى حريستيان كاميلل ارنايى كەلدى. ءحVىىى عاسىردا شۆەد اپوستولى ءارى بوتانيك كارل ليننەي ءوزىنىڭ شاكىرتتەرىن الەمنىڭ ءار تاراپىنا اتتاندىرىپ, بەيتانىس ەل مەن جەردىڭ تىنىس-تىرشىلىگى جايلى ماعلۇماتتار جيناستىرۋدى تاپسىرادى. ونىڭ ءىزباسارلارىنىڭ ءبىرى يوگانن پەتەر فالك قازاقستاننىڭ تەرىسكەي ايماعىن شارلاپ, ەرتىس, ەسىل وزەندەرىنىڭ جاعالاۋلارىن قونىستانعان ەلدى مەكەندەر جانە پەتروپاۆل قالاسىنىڭ تابيعات, جاعراپيالىق ەرەكشەلىكتەرىنە قاتىستى زەرتتەۋلەر جۇرگىزەدى. ساپاردان ورالعان سوڭ العان اسەرلەرى مەن باعا جەتپەس دەرەك­تەردى قاعازعا ءتۇسىرىپ, ۇستازىنا تابىستايدى. «IK Foundation» قورى تا­بيعاتتىڭ تىلسىم سىرلارىن زەرتتەۋمەن كوپتەن بەرى اينالىسىپ كەلەدى. ونىڭ توراعاسى لارس يانسەن يوگانن فالكتىڭ جيعان-تەرگەن جازبالارىن سولتۇستىك ءوڭىردىڭ تىڭ اقپاراتتارىمەن تولىقتىرىپ, ەنتسيكلوپەديا ەتىپ شىعارعان. وندا تەرىسكەيدىڭ فاۋناسى مەن فلوراسى, ەتنوستار, ەسىل وزەنىنە قاتىستى دەرەكتەر توپتاستىرىلعان. ءتۇرلى يلليۋستراتسيالىق سۋرەتتەرمەن بەزەندىرىلگەن. اعىلشىن تىلىندە جا­رىق كورگەن كارل ليننەي ءشا­كىرتتەرىنىڭ جازبالارى 11 تومدى قۇرايدى. وسى ارقىلى سكانديناۆيا ەلىنىڭ تۇرعىندارى سولتۇستىك قازاقستانعا ەرەكشە قىزىعۋشىلىق تانىتىپ وتىر, دەيدى ەلشى. ءومىر ەسقالي, «ەگەمەن قازاقستان» سولتۇستىك قازاقستان وبلىسى