ماسەلەنى ماسا ويانباي تۇرعاندا شەشۋ كەرەك

وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ مالىمەتىنشە, بىلتىر شىبىن-شىركەيدى ۋلاۋ ءۇشىن وڭىردەگى ءۇش قالاعا 170 ميلليون تەڭگە بولىنگەن كورىنەدى. ءدارى-دارمەكتىڭ ءبىر ءليترى بىلتىر 2232 تەڭگەگە جەتكەن. بيىل 600 ميلليون تەڭگەدەي ءبولىنىپتى. ويتكەنى, ەكسپو كورمەسى وتەتىن 2017 جىلدىڭ كوكتەم, جاز ايلارىندا وڭىردە شىبىن-شىركەيلەردى ازايتپاي بولماس. وبلىستىق اكىمدىكتەگىلەر «بۇل كورمە ءبىزدىڭ ءوڭىر ءۇشىن دە وتە ماڭىزدى. وبلىسقا تۋريستەردى تارتۋ كەرەك جانە ولاردىڭ كەلۋلەرىنە شىركەيلەر بوگەت بولماۋى كەرەك», دەپ وتىر. بىلتىر بالەنباي جىل تاسى­ماعان ەرتىس وزەنى ارناسىنان استى. ال شىبىن-شىركەي دەگەنىڭىز وزەن تاسۋىنان سوڭ, ءتىپتى ەكى ەسە قاپتادى-اي دەيسىڭ. بيولوگ قانات احمەتوۆ – ماسا, شىبىن-شىركەيدىڭ ءوسىپ-ءونۋى, تابيعاتقا, ادامعا تيگىزەر پايداسى مەن زيانى جايلى زەرتتەپ جۇرگەن عالىم. ونىڭ ايتۋىنشا, بىزگە شىبىن, شىركەي, ماسادان بۇرىن ويانۋى­مىز كەرەك ەكەن. ينەلىك ۇياسىنان ۇشىپ شىققانعا دەيىن شىركەيدىڭ تىپتەن كوبەيۋى بەلەڭ الادى. وب­لىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنداعىلار بيىل شىبىن-شىركەيدى ۋلاۋ جۇمىس­تارىنا 595 ميلليون تەڭگە بولىنگەنىن ايتىپ وتىر. 516 ميلليون تەڭگە بيولوگيالىق جانە حيميالىق ءدارى-دارمەكتەردى ساتىپ الۋعا جۇمسالاتىن بولسا, 69 ميلليون تەڭگە دەزينفەكتسيالاۋ قىزمەتىنە جانە 10 ميلليون تەڭگە عىلىمي تۇرعى­دا قولداۋ جۇمىستارىنا باعىتتالادى ەكەن. بيىل بۇل باعىتتاعى جۇ­مىستار الدىمەن ەرتىس وزەنىنىڭ جاعالاۋىنا, سونىمەن قاتار, وزەن بويىندا ورنالاسقان اقتوعاي, جەلەزين, ەرتىس, قاشىر, لەبياجى, ماي جانە پاۆلودار اۋداندارىنىڭ اۋماعىندا جۇرگىزىلەدى. ال بىل­تىرعى وبلىسقا جاسالعان ماسا, شىبىن-شىركەيلەردىڭ بەت قاراتپاس «جورىعىن» ەستىپ, ءبىزدىڭ بيولوگتارمەن بىرلەسە زەرتتەۋ جاساپ كورگەن ومبىلىق عالىمدار «ەرتىس وزەنى جاعاسىندا قورشاعان ورتا بۇزىلدى ما, تالاي جىلداردان بەرى قۇستار ازايدى, سۇر قازدار, قارلىعاشتار مۇلدە كورىنبەيدى. ال بۇل قۇستاردىڭ ازىعى – شىبىن-شىركەي مەن ماسا. قالاي ايتساق تا تابيعاتتىڭ تەپە-تەڭدىگىن ساقتاۋدى قاتاڭ نازاردا ۇستاۋىمىز كەرەك», دەپ وتىر. فاريدا بىقاي, «ەگەمەن قازاقستان» پاۆلودار