كۇي ورداسىنىڭ كۇيى بولماي تۇر...

تاتتىمبەت تارشىلىق كورىپ تۇر. قاراعاندىدا وسىدان 65 جىل بۇرىن ىرگەتاسى قالانىپ, ۇلى كۇيشىنىڭ اتى بەرىلگەن ونەر كوللەدجىنىڭ ءالى كۇنگە دەيىن عيماراتى جوق. كوللەدج كوشپەندىلەردىڭ كۇيىن كەشۋگە ءماجبۇر. قازىر بۇرىنعى قان ورتالىعىندا وتىرعان وقۋ ورنى وسى ۋاقىتقا دەيىن 4 عيمارات اۋىستىرىپتى. كوشىپ-قونىپ جۇرگەندە قانشاما اسپاپتار سىنعان... كەڭجايلاۋ كۇيلەردى تار بولمەدە مەحناتتى ازاپپەن بىرگە تارتىپ وتىرعان ونەر يەلەرىنە وبال-اق... ۇستازدار مەن ستۋدەنتتەردىڭ ايتۋىنشا, شىرقاي ءان سالىپ, شىر اينالا بيلەۋگە قۇرقىلتايدىڭ ۇياسىنداي تار عيمارات ءتىپتى دە قولايسىز. مۋزىكالىق اسپاپتاردى ورنالاستىرۋ, ساحنا جاساق­تاۋ, كورەرمەن تارتۋ جانە ەڭ ماڭىز­دىسى, ءبىر-بىرىنە بوگەت جاساماي ءدارىس الۋ مۇمكىن ەمەس. ءارى بۇل ورىن ونەر كول­لەدجىنە قويىلاتىن ساني­تارلىق-تەحنيكالىق, ەپيدە­ميولوگيالىق تالاپتارعا ورەس­كەل قايشى. عيماراتتىڭ تار دالىزدەرىندە اۋىر مۋزىكالىق اسپاپتاردى الىپ ءجۇرۋدى بىلاي قويعاندا, ەكى ادامنىڭ قاتار ءجۇرۋى دە مۇڭ بولىپ تۇر. ال سىنىپ جەتپەي قالعان ستۋدەنتتەر وسى دالىزدە تۇرىپ ءدارىس الۋعا, ەمتيحان سىناقتارىنا دايىندالۋعا ءماجبۇر. كوللەدج باسشىلىعى تار كا­بينەتتەردى بىرىكتىرىپ, كەڭەيتكەن. بىراق ءاۋ باستا وزگە سالاعا بەيىم­دەلىپ جاسالعان عيماراتتىڭ جايى كەلىسپەي تۇر. تاتتىمبەت اتىن­داعى ونەر كوللەدجى ۇرمەلى اسپاپتار وركەسترىنىڭ ديريجەرى قايىر­جان قاسىموۆتىڭ ايتۋىنشا, دىبىس­تار گۋىلدەپ, شىعارمالاردىڭ تازا ورىندالۋىنا كەدەرگى كەلتىرەدى ەكەن. ءارى ءدال ىرگەدەگى وزگە سىنىپ­تارداعى ساباقتارعا بوگەت جاسايدى. ساحنا دەگەن اتىمەن جوق. ەسەسىنە ەمتيحان, اكادەميالىق كونتسەرتتەر وسىندا وتەدى. ارينە, تالاپقا ساي كەلمەيدى. بىراق باسقا امال دا جوق. − بىزدە 500-گە جۋىق ستۋدەنت بار. 19 ماماندىق بويىنشا شاكىرت تاربيەلەپ وتىرمىز. تەاتر ارتىستەرى, مادەنيەت قىزمەتكەرلەرى, كاسىبي ءانشى-كۇيشىلەر مەن كىتاپحاناشىلارعا ءبىلىم ۇستارتىپ كەلەمىز. ءبىر كەم دۇنيە – عيمارات. وسى جاعدايدا وتىرىپ, جاقسى ناتيجەلەرگە قول جەتكىزۋگە تىرىسامىز. بىلتىر سىرتتان باقىلاۋ رەيتينگىسى بويىنشا رەسپۋبليكادا تاتتىمبەت كوللەدجى ءبىرىنشى ورىن الدى. ءبىزدىڭ دە كونتسەرت بەرگىمىز, دامىعىمىز كەلەدى. بىراق, رەپەتيتسيا جاسايتىن ورىن جوق. ءبىلىم باسقارماسى دىبىس ستۋدياسىن, ينتەراكتيۆتى تاقتا بەرمەكشى. ونى قايدا ورناتپاقپىز؟ تاجىريبەلىك ساباقتار جاتاق­حانا­دا, قالاداعى تەاترلاردا وتەدى. بيىل كوللەدجدىڭ قۇرىلعانىنا 65 جىل تولادى. تۇيتكىلدى ماسەلەنى وڭتايلى شەشۋگە وبلىس باسشىلىعى قام جاساپ جاتىر دەيدى. عيمارات بەرىلىپ جاتسا, – ۇلكەن توي سول بولماق, – دەدى كوللەدج ديرەكتورى, بەلگىلى ءانشى مەيىرحان ادامبەكوۆ. بۇل بىرنەشە جىلدان بەرى شەشىمىن تاپاي كەلە جاتقان ماسەلە. ءماجىلىس دەپۋتاتى, «نۇر وتان» فراكتسياسىنىڭ مۇشەسى نۇرلان دۋلاتبەكوۆ عيماراتتىڭ جاعدايى ادام شوشىرلىق ەكەن. بۇل قاراعاندىنىڭ مادەني مۇرا­سى ەمەس پە؟ سوندىقتان, وتە وكىنىشتى. ءبىز ماسەلەنى ءبىلىم جانە عىلىم, مادەنيەت جانە سپورت مينيسترلىكتەرىنىڭ الدىنا قويىپ, تۇبەگەيلى شەشۋگە اتسالىسامىز. ويتكەنى, تاتتىمبەت كوللەدجىنىڭ مۇشكىل ءحالى ءبارىمىزدى الاڭداتادى. تاياۋ ارادا جاڭا عيماراتقا كوشى­رىلۋى ءۇشىن تاباندى جۇمىس جۇرگى­زەمىز, دەپ ۋادە بەرىپ وتىر. جاعداي وسىلاي بولسا-داعى, سوڭعى 5 جىلدا كوللەدجدىڭ 40-تان استام ستۋدەنتى حالىقارالىق بايقاۋلاردا باق سىناپ, جۇلدەلى ورىنداردان كورىنگەن. ءان ورتا­لىعىن قان ورتالىعىنان جاڭا عيماراتقا دەرەۋ كوشىرسەك, الداعى ۋاقىتتا بۇل جەتىستىكتەردىڭ ەسەلەنە تۇسەتىنىنە كۇمانىمىز جوق. ميراس اسان, «ەگەمەن قازاقستان» قاراعاندى