«بارىس» جارىستى جالعاستىرادى

  بۇرناعى كۇنى قۇرلىقتىق حوككەي ليگاسىنىڭ كەزەكتى تۋرى اياسىندا استانانىڭ «بارىسى» ءوز مۇز ايدىنىندا ءنوۆوسىبىردىڭ «سيبير» كومان­داسىمەن كۇش سىناسىپ, شيەلەنىستى وتكەن ويىندا 2:1 ەسەبىمەن جەڭىسكە جەتتى. استانالىق ۇجىم ءۇشىن بۇل تۇراقتى چەم­پيوناتتاعى 31-ءشى جەڭىس ەدى. سونىڭ ارقا­سىندا جەرلەستەرىمىز وسىمەن سەگىزىنشى رەت ءتۋرنيردىڭ پلەي-وفف كەزەڭىنە شىعىپ وتىر. ويىننىڭ نەگىزگى ۋاقىتىندا سوعىلعان قوس شايبا ءبىرىنشى كەزەڭگە تيەسىلى بولدى. ماتچتىڭ 8-مينۋتىندا قوناقتاردىڭ شابۋىلشى­سى كيريلل ۆوروبەۆ ەسەپ اشسا, «بارىس» تاراپىنان قارىمتا گولدى 14-مينۋتتا داستين بويد سوقتى. الما-كەزەك شابۋىلمەن وتكەن كەزدەسۋدىڭ اياعىنا دەيىن وسى ەسەپ وزگەرمەي, كوماندالار قوسىمشا ۋاقىت ويناۋعا ءماجبۇر بولدى. ال وۆەرتايمنىڭ سوڭعى سەكۋندتارىندا نايدجەل دوۋستىڭ قۇلاشتاي سوققان شايباسى «بارىسقا» اۋاداي قاجەت ءۇش ۇپايدى اكەلدى. ءتۋرنيردىڭ كەلەسى كەزەڭىندەگى, ياعني پلەي-وفف سىنىنداعى «بارىستىڭ» قارسى­لاسى بەلگىلى. ول – چەليابىنىڭ «تراكتور» كومانداسى. قازىر جەرلەستەرىمىزدىڭ ەنشىسىندە 89 ۇپاي بار. كوماندا «شىعىس» ديۆيزيونى بويىنشا تۋرنير كەستەسىندە بەسىنشى ورىندا تۇر. ەندى ولار قالعان ەكى ويىندى دا ءوز ايدىنىندا وتكىزەدى. استانا حوككەي كلۋبىنا قارسى «مەتاللۋرگ» (نوۆوكۋزنەتسك) پەن «اۆانگارد» (ومبى) كوماندالارى وينايتىن بولادى. ەسكە سالار بولساق, استانانىڭ «بارىسى» 2008-2009 جىلدارداعى ماۋسىمنان باستاپ تۇراقتى چەمپيوناتتىڭ پلەي-وفف كەزەڭىنە ۇزدىكسىز شىعىپ كەلەدى. تەك 2015 جىلدىڭ 16 ماۋسىمىندا عانا ولار ۇزدىك سەگىزدىكتىڭ قاتارىنا قوسىلا الماعان ەدى. قايرات ءابىلدينوۆ, «ەگەمەن قازاقستان» استانا