وكىلەتتىكتەردى قايتا ءبولۋ بويىنشا جاڭا زاڭ جوبالارى ازىرلەندى

بارشاڭىزعا بەلگىلى, بيىلعى جىلدىڭ 25 قاڭ­تارىن­دا مەملەكەت باسشىسى نۇرسۇلتان نازارباەۆ ءوزىنىڭ وكىلەتتىگىن مەملەكەتتىك بيلىك تارماقتارى اراسىندا قايتا ءبولۋ ماسەلەسى بو­يىنشا ارنايى ۇندەۋ جولداعان بولاتىن. ەلباسى ءوز سوزىندە پرەزيدەنتتىڭ كەيبىر وكىلەتتىكتەرىن پارلامەنت پەن ۇكىمەتكە بەرۋدىڭ ەكى نەگىزگى باعىتى بويىنشا تاپسىرما بەردى. مەملەكەت باسشىسىنىڭ زاڭ جۇزىندە بەكىتىلگەن وكىلەتتىگىن قايتا ءبولۋ ماسەلەسى بويىنشا ادىلەت مينيسترلىگىنىڭ جۇزەگە اسىرىپ جاتقان جۇمىستارى جونىندە ورتالىق كوممۋنيكاتسيالار قىزمەتىندە وتكەن اقپارات الماسۋ الاڭىندا زاڭناما دەپارتامەنتىنىڭ ديرەكتورى دارحان يگەمباەۆ ايتىپ بەردى. ول مەملەكەتتىك بيلىك تارماقتارى اراسىندا وكىلەت­تىكتەردى قايتا ءبولۋ جۇمىستارىن ءتيىستى دەڭ­گەي­دە اتقارۋ ءۇشىن ەلباسىنىڭ وكىمىمەن ارنايى جۇمىس توبى قۇرىلعانىن اتاپ ءوتتى. ونىڭ قۇرامىنا مەم­لە­كەت­تىك ورگاندار وكىلدەرى, مەملەكەت جانە قوعام قاي­رات­ كەرلەرى كىردى. پرەزيدەنت وكىلەتتىگىن قايتا ءبولۋ جۇمىسى ەكى باعىت بويىنشا جۇزەگە اسىرىلادى: ءبىرىنشى باعىت – كونستيتۋتسيالىق دەڭگەيدە بيلىك تارماقتارى اراسىنداعى قارىم-قاتىناستاردى تەڭدەستىرۋ; ەكىنشىسى – ۇكىمەت پەن باسقا اتقارۋشى ورگاندارعا پرەزيدەنتتىڭ زاڭمەن بەلگىلەنگەن الەۋمەتتىك-ەكونوميكالىق ۇدەرىستەردى رەتتەۋ جونىندەگى وكىلەتتىگىنىڭ بولىگىن بەرۋ. وسى ورايدا, دەپارتامەنت ديرەكتورى ەكىنشى باعىت بويىنشا جۇمىستاردى اتقارۋ ادىلەت مينيسترلىگىنە تاپسىرىلعانىن اتاپ ءوتتى. «ادىلەت مينيسترلىگىنىڭ جانى­نان جۇمىس توبى قۇرىلىپ, ولار 298 زاڭ, 11 كونس­تيتۋتسيالىق زاڭ مەن 20 كودەكستىڭ ماتىندەرىنە تالداۋ جاسادى. ناتيجەسىندە, پرەزيدەنتتىڭ زاڭمەن بەلگىلەنگەن الەۋمەتتىك-ەكونوميكالىق ۇدەرىستەردى رەتتەۋ ماسەلەلەرى بويىنشا ەكى زاڭ جوباسىنىڭ تۇجىرىمداماسى ازىرلەندى. ولار: «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنىڭ تۇجىرىمداماسى جانە «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا مەملەكەتتىك بيلىكتىڭ تارماقتارى اراسىندا وكىلەتتىكتەردى قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ جوباسىنىڭ تۇجىرىمداسى», دەپ اتاپ ءوتتى سپيكەر. ايتا كەتەيىك, بۇگىنگى تاڭدا اتالعان ەكى زاڭ جوباسى اشىق نورماتيۆتىك قۇقىقتىق اكتىلەردىڭ ينتەرنەت-پورتالىندا جاريالانعان. ايدار ورىسباەۆ, «ەگەمەن قازاقستان» استانا